ପାହାଳ ବଜାର ଠାରେ “ପାହାଳ ଥାନା” ନବନିର୍ମିତ ଗୃହର ଶୁଭ ଉଦ୍ଘାଟନ

ନିରପେକ୍ଷ(ଭୁବନେଶ୍ୱର) : ଗତକାଲି ସନ୍ଧ୍ୟାରେ ଭୁବନେଶ୍ୱର ସହରାଞ୍ଚଳ ପୁଲିସ୍ ଜିଲ୍ଲା ଅନ୍ତର୍ଗତ ପାହାଳ ବଜାର ଠାରେ “ପାହାଳ ଥାନା” ନବନିର୍ମିତ ଗୃହର ଶୁଭ ଉଦ୍ଘାଟନ ହୋଇଯାଇଛି । ମାନ୍ୟବର ମୁଖ୍ୟ ମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ମୁଖ୍ୟ ଅତିଥି ଭାବେ ଭର୍ଚୁଆଲ ପ୍ରଣାଳୀରେ ଏହାର ଉଦ୍ଘାଟନ କରିଥିଲେ । ଅନ୍ୟ ଅତିଥି ମାନଙ୍କ ମଧ୍ୟରେ ଭୁବନେଶ୍ଵର-କଟକ ଦ୍ଵୈତ ନଗରୀର ପୁଲିସ କମିଶନର ଶ୍ରୀ ସଞ୍ଜୀବ ପଣ୍ଡା (ଆଇପିଏସ), ଅତିରିକ୍ତ ପୁଲିସ କମିଶନର ଶ୍ରୀ ଅବିନାଶ କୁମାର (ଆଇପିଏସ) ଓ ଭୁବନେଶ୍ଵର ଡିସିପି ଶ୍ରୀ ପ୍ରତୀକ ସିଂହ (ଆଇପିଏସ) ଙ୍କ ସମେତ ଅନ୍ୟାନ୍ୟ ବରିଷ୍ଠ ଅଧିକାରୀ ମାନେ ମଧ୍ୟ ଏହି ନୂତନ ଥାନା ଗୃହର ଉଦ୍ଘାଟନୀ ପର୍ବରେ ଉପସ୍ଥିତ ଥିଲେ ।

ଭୁବନେଶ୍ଵର ପୁଲିସ ଜିଲ୍ଲାରେ ଅପରାଧିକ କାର୍ଯ୍ୟକଳାପ ଓ ଅପରାଧୀଙ୍କ ଗତିବିଦ୍ଧିକୁ ରୋକିବା ନିମନ୍ତେ ତଥା ସହରର ପରିସୀମା ଏବଂ ଲୋକ ସଂଖ୍ୟାକୁ ଦୃଷ୍ଟିରେ ରଖି, ଜନସାଧାରଣଙ୍କୁ ତୁରନ୍ତ ସେବା ଓ ସୁରକ୍ଷା ଯୋଗାଇ ଦେବା ନିମନ୍ତେ ଏହି “ପାହାଳ ଥାନା” ର ପ୍ରତିଷ୍ଠା କରାଯାଇଅଛି ।ଉଲ୍ଲେଖ ଯୋଗ୍ୟ ଯେ, ଏହି ନବନିର୍ମିତ କୋଠାରେ ବିଭିନ୍ନ ପ୍ରକାରର ଅତ୍ୟାଧୁନିକ ବ୍ୟବସ୍ଥା ମାନ, ଯଥା- ସିସିଟିଏନ୍ ନେଟୱର୍କ ସାଙ୍ଗକୁ ପୁଲିସ ଅଧିକାରୀ ମାନେ କାମ କରିବା ଲାଗି ମଡ୍ୟୁଲାର ରୁମ୍ ମାନ କରାଯାଇଅଛି ।

ସେହିପରି ପୁଲିସ ଅଧିକାରୀ ମାନେ ବସି ଅଫିସ କାର୍ଯ୍ୟ କରିବା ଲାଗି ସ୍ବତନ୍ତ୍ର ବ୍ୟବସ୍ଥାମାନ କରାଯାଇଥିବା ବେଳେ କାର୍ଯ୍ୟରତ କର୍ମଚାରୀ ମାନଙ୍କ ଲାଗି ବିଶ୍ରାମ ଗୃହର ବନ୍ଦୋବସ୍ତ ମଧ୍ୟ କରାଯାଇଛି । ଏତଦବ୍ଯତୀତ ବିଭିନ୍ନ ସମୟରେ ଏକାଠି ବସି ଆଲୋଚନା କରିବା ଲାଗି ଏକ ବଡ କନଫରେନ୍ସ ହଲର ବ୍ୟବସ୍ଥା କରାଯାଇଥିବା ବେଳେ ପୁରୁଷ ଓ ମହିଳା ଅଭିଯୁକ୍ତଙ୍କ ଲାଗି ଦୁଇଟି ପୃଥକ ହାଜତ ସହିତ ମହିଳା ଓ ଶିଶୁ ଡେସ୍କର ମଧ୍ୟ ବ୍ୟବସ୍ଥା କରାଯାଇଛି । ସେହିଭଳି ଏହି ନବନିର୍ମିତ ଥାନା ଗୃହରେ ପୁଲିସ କର୍ମଚାରୀ ତଥା ସାଧାରଣ ଲୋକଙ୍କ ନିମନ୍ତେ ଅତ୍ୟାଧୁନିକ ଶୌଚାଳୟର ବ୍ୟବସ୍ଥା କରାଯାଇଛି ।