ନାବାଳିକା କନ୍ୟା କୁ ଅପହରଣ ,ଅଭିଯୁକ୍ତ କୁ କାବୁ କଲା ପୋଲିସ

ନିରପେକ୍ଷ(ଭୁବନେଶ୍ୱର): ଏୟାରପୋର୍ଟ ଥାନା ପୁଲିସ ଅଭିଯୋଗକାରୀଙ୍କ ଅଭିଯୋଗ ଭିତ୍ତିରେ ତଦନ୍ତ କରିବା ସହ ହେମନ୍ତ କୁମାର ସାହୁ(33)ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛନ୍ତି । ସୂଚନା ଯୋଗ୍ୟ ଯେ, ଅଭିଯୋଗକାରୀ ଏବଂ ତାଙ୍କ ପତ୍ନୀ ଏୟାରପୋର୍ଟ ଥାନା ଅଞ୍ଚଳରେ ଗତ ଦୁଇବର୍ଷ ହେବ ରହିଆସୁଥିବା ବେଳେ ଦିନ ମଜୁରିଆ ଭାବେ କାର୍ଯ୍ୟ କରନ୍ତି । ସେମାନଙ୍କର ଏକ ନାବାଳିକା କନ୍ୟା ଗତ ଛଅମାସ ହେବ ସେମାନଙ୍କ ସହିତ ରହୁଥିଲେ । ନିମ୍ନୋକ୍ତ ଅଭିଯୁକ୍ତ ଜଣକ ଅଭିଯୋଗକାରୀଙ୍କ ଘର ନିକଟରେ ରହୁଥିବାରୁ ସେ ତାଙ୍କ ନାବାଳିକା କନ୍ୟାଙ୍କ ସଂସ୍ପର୍ଶରେ ଆସିଥିଲେ ଓ ତାଙ୍କୁ ବିବାହ କରିବାର ମିଥ୍ୟା ପ୍ରତିଶୃତି ଦେଉଥିଲେ ।

ଗତ ତା.୦୧.୦୩.୨୦୨୪ ରିଖ ଦିନ ସକାଳେ ଅଭିଯୋଗକାରୀ ଏବଂ ତାଙ୍କ ପତ୍ନୀ କର୍ମ ସ୍ଥଳକୁ ବାହାରି ଯିବା ପରେ, ଅଭିଯୁକ୍ତ ଜଣକ କଥା ହେବା ଛଳରେ ଅଭିଯୋଗକାରୀଙ୍କ କନ୍ୟାଙ୍କୁ ଡାକିବା ସହିତ ତାଙ୍କୁ ଅପହରଣ କରିନେଇଥିଲେ । ସେହିଦିନ ସନ୍ଧ୍ୟାରେ କର୍ମସ୍ଥଳରୁ ଫେରିବା ପରେ ଅଭିଯୋଗକାରୀ ଏବଂ ତାଙ୍କ ପତ୍ନୀ ନିଜ କନ୍ୟାଙ୍କୁ ବହୁ ଖୋଜଖୋଜି କରିଥିଲେ ମଧ୍ୟ ତାଙ୍କୁ ଆଉ ପାଇନଥିଲେ ।

ଏନେଇ ଥାନାରେ ଅଭିଯୋଗ ହେବା ପରେ, ପୁଲିସ ତଦନ୍ତ କରିବା ସହିତ ଏକ ବିଶ୍ଵସ୍ତ ସୂତ୍ରରୁ ସୂଚନା ପାଇ ପୋଖରିପୁଟ ଅଞ୍ଚଳରେ ଚଢଉ କରିବା ସହିତ ନିମ୍ନୋକ୍ତ ଅଭିଯୁକ୍ତ କାବୁ କରିବାରେ ସକ୍ଷମ ହୋଇଥିବା ବେଳେ ଅଭିଯୋଗକାରୀଙ୍କ ନାବାଳିକା କନ୍ୟାଙ୍କୁ ଉଦ୍ଧାର କରିଥିଲେ । ପଚରାଉଚରା ବେଳେ ଅଭିଯୁକ୍ତ ଜଣକ, ନିଜ ଦୋଷ ସ୍ଵୀକାର କରିଥିଲେ । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।