ନିରପେକ୍ଷ(ଭୁବନେଶ୍ୱର): ବାଲିଅନ୍ତା ଥାନା ପୁଲିସ ଅଭିଯୋଗକାରିଣୀଙ୍କ ଅଭିଯୋଗ ଭିତ୍ତିରେ ତଦନ୍ତ କରିବା ସହ ସନ୍ତୋଷ କୁମାର ନାୟକ(26) ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛନ୍ତି । ସୂଚନା ଯୋଗ୍ୟ ଯେ, ଅଭିଯୋଗକାରିଣୀ ଏବଂ ତାଙ୍କର ଜଣେ ବନ୍ଧୁ ରହିବା ଲାଗି ଅପାର୍ଟମେଣ୍ଟ ସନ୍ଧାନରେ ଥିବା ବେଳେ ନିମ୍ନୋକ୍ତ ଅଭିଯୁକ୍ତଙ୍କ ସହିତ ତାଙ୍କର ସାକ୍ଷାତ ହୋଇଥିଲା । ଅଭିଯୁକ୍ତ ଜଣକ ତାଙ୍କୁ ଏକ ଅପାର୍ଟମେଣ୍ଟ ଠିକ କରିଦେବା ଲାଗି ପ୍ରତିଶୃତି ଦେଇ ବାଲିଅନ୍ତା–ପୁରୀ କେନାଲ ରୋଡ଼ରେ ଥିବା ଲାବଣ୍ୟ ଅପାର୍ଟମେଣ୍ଟ ନିକଟକୁ ନେଇଯାଇଥିଲେ । ଅଭିଯୁକ୍ତ ଜଣକ ସେଠାରେ ମୁତୟନ ଥିବା ଜଣେ ସିକ୍ୟୁରିଟି ଗାର୍ଡଙ୍କ ସହିତ କିଛି ସମୟ ଗୋପନରେ କଥା ହୋଇ ଅପାର୍ଟମେଣ୍ଟ ଖାଲି ଥିବା, ଅଭିଯୋଗକାରିଣୀଙ୍କୁ କହିଥିଲେ ଏବଂ ଏକ ନିର୍ଦ୍ଦିଷ୍ଟ ୟୁପିଆଇ ନମ୍ବରରେ ୨୦,୦୦୦ ଟଙ୍କା ପଠାଇବା ଲାଗି ମଧ୍ୟ କହିଥିଲେ। ଅଭିଯୁକ୍ତ କହିବା ମୁତାବକ ଅଭିଯୋଗକାରିଣୀ ପ୍ରଥମେ ୧୦,୦୦୦ ଟଙ୍କା ଅନଲାଇନ ଜରିଆରେ ପଠାଇବା ପରେ ଆଉ ୫,୦୦୦ ଟଙ୍କା କ୍ୟାସ ଆକାରରେ ଦେଇଥିଲେ ।
ଟଙ୍କା ପାଇବା ପରେ ଅଭିଯୁକ୍ତ ଜଣକ ଅଭିଯୋଗକାରିଣୀଙ୍କୁ ଏକ ଡୁପ୍ଳିକେଟ ଚାବି ଦେଇ ତା ପରଦିନ ସେଠାରେ ଯାଇ ରହିବା ଲାଗି କହିଥିଲେ । ତା ପରଦିନ ଅଭିଯୁତ ଜଣକ ଅଭିଯୋଗକାରିଣୀଙ୍କୁ ପନର୍ବାର ଫୋନ କରି ଅଧିକ ୩,୦୦୦ ଟଙ୍କା ପଠାଇବା ଲାଗି କହିବାରୁ, ଘର ସିଫ୍ଟ କରିବା ପରେ ଯାଇ ବାକି ଟଙ୍କା ଦେବେ ବୋଲି ଅଭିଯୋଗକାରିଣୀ ଉତ୍ତର ଦେଇଥିଲେ । ପରେ ଅଭିଯୋଗକାରିଣୀ ଯାଇ ଉକ୍ତ ଡୁପ୍ଳିକେଟ ଚାବି ସାହାଯ୍ୟରେ ଘର ଖୋଲିବା ଲାଗି ପ୍ରୟାସ କରିଥିଲେ ମଧ୍ୟ ତାଲା ଆଉ ଖୋଲି ନଥିଲା । ସେ ତୁରନ୍ତ ଯାଇ ସେଠାରେ ମୁତୟନ ଥିବା ଜଣେ ସିକ୍ୟୁରିଟି ଗାର୍ଡଙ୍କୁ ଏ ବିଷୟରେ ପଚାରିବାରୁ ସେ ଚାବି ଉକ୍ତ ଘରର ନୁହଁ ବୋଲି କହିଥିଲେ । ପରେ ଅଭିଯୋଗକାରିଣୀ, ଟଙ୍କା ପଠାଇ ଥିବା ୟୁପିଆଇ ନମ୍ବରରେ ଯୋଗଯୋଗ କରିବାରୁ, ସେ ଏ ସମ୍ପର୍କରେ କିଛି ବି ଜାଣିନଥିବା କହିଥିଲେ । ଅଭିଯୋଗକାରିଣୀ ଜଣକ ଶେଷରେ ଅଭିଯୁକ୍ତଙ୍କୁ ଘଟଣା ସମ୍ପର୍କରେ ପଚାରିବାରୁ, ଅଭିଯୁକ୍ତ ଜଣକ ତାଙ୍କୁ ନାନା ପ୍ରକାର ଧମକ ଦେଇଥିଲେ । ଠକାମିର ଶିକାର ହୋଇଥିବା ଜାଣିବା ପରେ ସେ ବାଲିଅନ୍ତା ଥାନାରେ ଏନେଇ ଅଭିଯୋଗ କରିଥିଲେ ।
