ବିବାହର ପ୍ରତିଶୃତି ଦେଇ ଲକ୍ଷାଧିକ ଟଙ୍କା ହଡପ

ନିରପେକ୍ଷ(ଭୁବନେଶ୍ୱର): ଲକ୍ଷ୍ମୀସାଗର ଥାନା ପୁଲିସ ଅଭିଯୋଗକାରିଣୀଙ୍କ ଅଭିଯୋଗ କ୍ରମେ ଉପରୋକ୍ତ ମାମଲା ରୁଜୁକରି ତଦନ୍ତ କରିବା ସହିତ ପ୍ରଦୀପ୍ତ କୁମାର ମୁଖି(35)ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛନ୍ତି । ସୂଚନାଯୋଗ୍ୟ ଯେ, ଅଭିଯୋଗକାରିଣୀ ଜଣକ ଲକ୍ଷ୍ମୀସାଗର ଥାନା ଅନ୍ତର୍ଗତ ବିଡିଏ କଲୋନୀ ଅଞ୍ଚଳରେ ରହୁଥିବା ଜଣେ ଭଦ୍ର ବ୍ୟକ୍ତିଙ୍କ ଘରେ ଘରୋଇ ସହାୟିକା ଭାବେ କାର୍ଯ୍ୟ କରନ୍ତି । ନିମ୍ନୋକ୍ତ ଅଭିଯୁକ୍ତ ଜଣକ ଗତ ୨୦୨୨ ମସିହାରୁ ନିଜ ଅଟୋରେ ଅଭିଯୋଗକାରିଣୀଙ୍କୁ ଉକ୍ତ ଭଦ୍ର ବ୍ୟକ୍ତିଙ୍କ ଘରକୁ ନବାଆଣିବା କରୁଥିଲେ। ଏହି ନବାଆଣିବା ମଧ୍ୟରେ ଅଭିଯୋଗକାରିଣୀ ଏବଂ ନିମ୍ନୋକ୍ତ ଅଭିଯୁକ୍ତଙ୍କ ମଧ୍ୟରେ ସମ୍ପର୍କ ଘନିଷ୍ଠ ହୋଇଥିଲା ।

ଅଭିଯୁକ୍ତ ଜଣକ ଭବିଷ୍ୟତରେ ତାଙ୍କୁ ବିବାହ କରିବାର ମିଥ୍ୟା ପ୍ରତିଶୃତି ଦେଇ କାର କିଣିବା, ଦୋକାନ କରିବା ଏବଂ ପୋଖରୀ ଖୋଳିବା ଆଦି ବିଭିନ୍ନ ଆଳ ଦେଖାଇ ଅନେକ ସମୟରେ ତାଙ୍କ ଠାରୁ ଟଙ୍କା ମାଗି ନେଇଥିଲେ । ଅଭିଯୁକ୍ତଙ୍କ କଥାରେ ବିଶ୍ବାସ କରି ଅଭିଯୋଗକାରିଣୀ ତାଙ୍କୁ କ୍ୟାସ, ଏଟିଏମ, ଫୋନ-ପେ, ଓ ଗୁଗୁଲ-ପେ ଜରିଆରେ ୧୧,୨୦,୦୦୦ ଟଙ୍କା ଦେଇଥିବା ନେଇ ଥାନାରେ ଅଭିଯୋଗ କରିଥିଲେ । ସେହିପରି ଗତ ତା.୧୮.୧୨.୨୦୨୨ ରିଖ ଦିନ ଅଭିଯୋଗକାରିଣୀ ଏବଂ ଉକ୍ତ ଭଦ୍ରବ୍ୟକ୍ତି ନିମ୍ନୋକ୍ତ ଅଭିଯୁକ୍ତ ତଥା ତାଙ୍କ ପରିବାର ସଦସ୍ୟଙ୍କ ସହିତ ଆଲୋଚନା କରିବା ଲାଗି ଗୁଡିମାଳ ମନ୍ଦିରକୁ ଯାଇଥିବା ବେଳେ, ସେଠାରେ ଅଭିଯୁକ୍ତ ଜଣକ ଅଭିଯୋଗକାରିଣୀଙ୍କ ଠାରୁ ନେଇଥିବା ଟଙ୍କା ପୂର୍ବରୁ ଫେରାଇ ଦେଇଥିବା କହିବା ସହିତ ଆଉ ବଳକା ୫୦,୦୦୦ ଟଙ୍କାଙ୍କୁ ଖୁବ ଶୀଘ୍ର ଫେରାଇ ଦେବେ ବୋଲି କହିଥିଲେ ।

ଏହି ଘଟଣା ପରେ ଅଭିଯୋଗକାରିଣୀ ଯେତେବେଳେ ଅଭିଯୁକ୍ତଙ୍କୁ ଫୋନ କରି ନିଜ ଟଙ୍କା ଫେରାଇ ଦେବା ଲାଗି କହିଥିଲେ, ପ୍ରତିଉତ୍ତରରେ ଅଭିଯୁକ୍ତ ଜଣକ ତାଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରିଥିଲେ । ଅଭିଯୋଗକାରିଣୀଙ୍କ ଏହି ଅଭିଯୋଗ ଆଧାରରେ ପୁଲିସ ମାମଲା ରୁଜୁ କରି ତଦନ୍ତ କରିବା ସହିତ ଏକ ବିଶ୍ଵସ୍ତ ସୂତ୍ରରୁ ସୂଚନା ପାଇ ଚଢଉ ଜରିଆରେ ନିମ୍ନୋକ୍ତ ଅଭିଯୁକ୍ତଙ୍କୁ କାବୁ କରିବାରେ ସକ୍ଷମ ହୋଇଥିଲେ । ତଦନ୍ତ ବେଳେ ଅଭିଯୁକ୍ତ ଜଣକ, ନିଜ ଦୋଷ ସ୍ଵୀକାର କରିଥିଲେ । ଅଭିଯୁକ୍ତ ପ୍ରଦୀପ୍ତ କୁମାର ମୁଖୀଙ୍କ ନାମରେ ପୂର୍ବରୁ ମଧ୍ୟ ଧୂଷୂରୀ ଥାନାରେ ୨୦୨୨ ମସିହାରେ ଏକ ମାମଲା ରହିଥିବା ତଦନ୍ତ ବେଳେ ଜଣାପଡିଛି । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଜାରି ରହିଛି ।