୪୫ କେଜି ଓଜନର ୧୫ ଗୋଟି ଲୁହାବାର ଚୋରୀ

ନିରପେକ୍ଷ(ଭୁବନେଶ୍ୱର) : ଇନଫୋଭ୍ୟାଲି ଥାନା ପୁଲିସ ଅଭିଯୋଗକାରୀ ସୟଦ ଇଶାକ ଅଲ୍ଲୀଙ୍କ ଅଭିଯୋଗ କ୍ରମେ ଉପରୋକ୍ତ ମାମଲାର ତଦନ୍ତ କରିବା ସହିତ ଦେବୀପ୍ରସାଦ@ପିନୁ @ଲୁଙ୍ଗା ନାୟକ(30) ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛନ୍ତି । ସୂଚନାଯୋଗ୍ୟ ଯେ, ଗତ ତା.୨୪.୦୨.୨୦୨୪ ରିଖ ରାତିରେ ଇନଫୋଭ୍ୟାଲି ଥାନା ଅନ୍ତର୍ଗତ ଡିଏନ ନ୍ୟୁ କଲୋନୀରେ ଥିବା ଏକ ନିର୍ମାଣାଧୀନ କୋଠାରୁ ମୋଟ ୪୫ କେଜି ଓଜନର ୧୫ ଗୋଟି ଲୁହାବାର ଚୋରୀ ହୋଇଥିବା ନେଇ ଅଭିଯୋଗକାରୀ, ଥାନାରେ ଅଭିଯୋଗ କରିଥିଲେ । ଅଭିଯୋଗକାରୀଙ୍କ ଏହି ଅଭିଯୋଗ ଆଧାରରେ ପୁଲିସ ମାମଲା ରୁଜୁ କରିବା ସହିତ ତଦନ୍ତ କାର୍ଯ୍ୟକୁ ତ୍ବରାନ୍ବିତ କରିଥିଲେ ।

ଘଟଣା ସ୍ଥଳ ଓ ଏହାର ଆଖପାଖ ଅଞ୍ଚଳରେ ଲାଗିଥିବା ସିସିଟିଭି ଯାଞ୍ଚ ସମୟରେ, ଦୁଇଜଣ ଯୁବକ ଏକ ସ୍କୁଟି ଯୋଗେ ଘଟଣା ସ୍ଥଳକୁ ଆସି ଉକ୍ତ ଲୁହାବାର ସବୁକୁ ଚୋରିକରିନେଇଥିବା ପୁଲିସ ଜାଣିବାକୁ ପାଇଥିବା ବେଳେ ଉଭୟ ଅଭିଯୁକ୍ତଙ୍କୁ ଚିହ୍ନଟ କରିବାରେ ସଫଳ ହୋଇଥିଲେ । ମାମଲାର ତଦନ୍ତ ସମୟରେ ପୁଲିସ ଗତକାଲି ଦୁଇଜଣ ଅଭିଯକ୍ତଙ୍କୁ ଏହି ମାମଲାରେ ଗିରଫ କରି କୋର୍ଟ ଚାଲାଣ କରିଥିବା ବେଳେ ସେମାନଙ୍କ ନିକଟରୁ ସମସ୍ତ ୧୫ ଗୋଟି ଲୁହାବାର ଏବଂ ଏକ ସ୍କୁଟିକୁ ଜବତ କରିଥିଲେ । ପୁଲିସ ଆଜି ଏକ ବିଶ୍ଵସ୍ତ ସୂତ୍ରରୁ ସୂଚନା ପାଇ ଚଢଉ କରିବା ସହିତ ନିମ୍ନୋକ୍ତ ଅନ୍ୟ ଜଣେ ଅଭିଯୁକ୍ତଙ୍କୁ ଗିରଫ କରିବାରେ ସକ୍ଷମ ହୋଇଥିଲେ ।

ତଦନ୍ତ ବେଳେ ଅଭିଯୁକ୍ତ ଜଣକ, ଏହି ଅପରାଧରେ ସାମିଲ ଥିବା କଥା ସ୍ଵୀକାର କରିଥିଲେ । ଅଭିଯୁକ୍ତ ଦେବୀପ୍ରସାଦ ଓରଫ ଲୁଙ୍ଗା ନାୟକଙ୍କ ନାମରେ ପୂର୍ବରୁ ମଧ୍ୟ ଇନଫୋଭ୍ୟାଲି ଥାନାରେ ୨୦୨୨ ମସିହାରେ ଏକ ଚୋରୀ ମାମଲା ରହିଥିବା ତଦନ୍ତ ବେଳେ ଜଣାପଡିଛି । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଜାରି ରହିଛି ।