ହତ୍ୟା ଅଭିଯୋଗ ରେ ଜଣେ ଗିରଫ

ଶ୍ରୀ ଲିଙ୍ଗରାଜ ଥାନା ପୁଲିସ ଅଭିଯୋଗକାରୀ ଶ୍ରୀ ମହେନ୍ଦ୍ର ସେଠୀଙ୍କ ଅଭିଯୋଗ କ୍ରମେ ଉପରୋକ୍ତ ମାମଲାର ତଦନ୍ତ କରିବା ସହିତ ଚନ୍ଦନ କୁମାର ସେଠି(25)ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛନ୍ତି । ସୂଚନାଯୋଗ୍ୟ ଯେ, ଗତ ୩ବର୍ଷ ପୂର୍ବେ ତା ୦୩.୦୩.୨୦୨୧ ରିଖରେ ଅଭିଯୋଗକାରୀଙ୍କର ଝିଅ ଝିଲ୍ଲୀଙ୍କର ସାମାଜିକ ରୀତିନୀତି ଅନୁଯାୟୀ ନିମ୍ନୋକ୍ତ ଅଭିଯୁକ୍ତଙ୍କ ସହିତ ବିବାହ ହୋଇଥିଲା । ବିବାହ ପରେ ଅଭିଯୁକ୍ତ ସ୍ବାମୀ ଚନ୍ଦନ ଓ ତାଙ୍କର ପରିବାର ସଦସ୍ୟ ଅଧିକ ଟଙ୍କା, ସୁନା, ଏବଂ କାର ଭଳି ଯୌତୁକ ଦାବି କରି ଝିଲ୍ଲୀଙ୍କୁ ଶାରୀରିକ ତଥା ମାନସିକ ନିର୍ଯାତନା ଦେଉଥିବା ନେଇ ଅଭିଯୋଗକାରୀ ତାଙ୍କର ଅଭିଯୋଗରେ ଉଲ୍ଲେଖ କରିଥିଲେ । ଏନେଇ ଗତ ତା ୨୪.୦୨.୨୦୨୪ ରିଖରେ ଉଭୟ ଦମ୍ପତିଙ୍କ ମଧ୍ୟରେ ଝଗଡା ଲାଗିଥିବାର ଝିଅଙ୍କ ଠାରୁ ଖବର ପାଇବା ପରେ ଅଭିଯୋଗକାରୀ ସେଠାକୁ ଯାଇଥିଲେ ଏବଂ ବୁଝାମଣା କରି ଫେରିଥିଲେ ।

ଏହାର କିଛି ସମୟରେ ପରେ ଅଭିଯୋଗକାରୀ ତାଙ୍କର ଝିଅର ମୃତ୍ଯୁ ଖବର ପାଇବା ପରେ ସେ ଘଟଣାସ୍ଥଳକୁ ଆସିଥିଲେ ଓ ତାଙ୍କର ଝିଅଙ୍କୁ ମୃତ ଅବସ୍ଥାରେ ଦେଖି ତାଙ୍କୁ ହତ୍ୟା କରାଯାଇଥିବା ସନ୍ଦେହ କରି ଏନେଇ ଶ୍ରୀ ଲିଙ୍ଗରାଜ ଥାନାରେ ଅଭିଯୋଗ କରିଥିଲେ । ଅଭିଯୋଗ ଆଧାରେ ପୁଲିସ ମାମଲା ରୁଜୁ କରି ତଦନ୍ତ କରିବା ସହ ମରଶରୀରକୁ ଜବତ କରିଥିଲେ ଏବଂ ମାଜିଷ୍ଟ୍ରେଟଙ୍କ ଉପସ୍ଥିତିରେ ପଞ୍ଚନାମା କରାଯାଇଥିଲା । ପ୍ରାଥମିକ ତଦନ୍ତରୁ ଜଣା ପଡିଛି ଯେ, ଅଭିଯୁକ୍ତ ଚନ୍ଦନଙ୍କ କହିବ ଅନୁସାରେ ଘଟଣା ଦିନା ଉଭୟ ସ୍ବାମୀ ଓ ସ୍ତ୍ରୀଙ୍କ ମଧ୍ୟରେ ଝଗଡା ଲାଗିଥିଲା ।

ଘଟଣାଦିନ ସନ୍ଧ୍ୟାରେ ଚନ୍ଦନ ଖାଇବା ପାଇଁ ବାହାରକୁ ଯାଇଥିଲେ ଏବଂ ଫେରିବା ବେଳେ ତାଙ୍କ ସ୍ତ୍ରୀଙ୍କୁ ନିଜ ଘରେ ଲାଗିଥିବା ଏକ ଲୁହା ଦଣ୍ଡରେ ଗୋଟିଏ ଶାଢ଼ୀ ରେ ଝୁଲୁଥିବାର ଦେଖିଥିଲେ । ସେ ତୁରନ୍ତ ତାଙ୍କୁ ଓଲ୍ହାଇ ନିଜ ଅଟୋରେ ତାଙ୍କର ଭାଉଜଙ୍କ ସହାୟତାରେ ପ୍ରଥମେ ଲିଙ୍ଗରାଜ ସ୍ଥିତ ବିଏମସି ହସ୍ପିଟାଲକୁ ନେଇଯାଇଥିଲେ। ସେଠାରେ ପ୍ରାଥମିକ ପରୀକ୍ଷଣରେ ଉନ୍ନତ ଚିକିତ୍ସା ପାଇଁ ମେଡ଼ିକାଲ ଅଫିସର ତାଙ୍କୁ କ୍ୟାପିଟାଲ୍ ହସ୍ପିଟାଲ୍କୁ ନେବାପାଇଁ ପରାମର୍ଶ ଦେଇଥିଲେ। କ୍ୟାପିଟାଲ୍ ହସ୍ପିଟାଲ୍କୁ ଆଣିବା ପରେ ମେଡ଼ିକାଲ ଅଫିସର ତାଙ୍କୁ ମୃତ ବୋଲି ଘୋଷଣା କରିଥିଲେ। ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଜାରି ରହିଛି ।