ଜାଗା ବ୍ୟବସାୟ ନା ରେ ଠକେଇ ଅଭିଯୁକ୍ତ ଗିରଫ

ନିରପେକ୍ଷ(ଭୁବନେଶ୍ୱର) : ନୟାପଲ୍ଲି ଥାନା ପୁଲିସ ଅଭିଯୋଗକାରୀ ସନ୍ତୋଷ କୁମାର ସାହୁଙ୍କ ଅଭିଯୋଗ ଆଧାରରେ ଉପରୋକ୍ତ ମାମଲା ରୁଜୁ କରିବା ସହ ତଦନ୍ତ କରି ସୁଧାଂଶୁ ବେହେରା(39) ଅଭିଯୁକ୍ତଙ୍କୁ ଆଜି କୋର୍ଟ ଚାଲାଣ କରିଛନ୍ତି । ସୂଚନାଯୋଗ୍ୟ ଯେ, ଅଭିଯୁକ୍ତ ସୁଧାଂଶୁ ସମୟ ସମୟରେ ଜାଗା ବ୍ୟବସାୟ କରିବା ପାଇଁ ସିଆରପିଏଫ କ୍ଯାମ୍ପସ କୁ ଆସୁଥିବାରୁ ଗତ ୨୦୨୧ ମସିହାରେ ଅଭିଯୋଗକାରୀ ତାଙ୍କର ଯୋଗାଯୋଗରେ ଆସିଥିଲେ । ଅଭିଯୁକ୍ତ ଜଣକ ଭରତପୁର ଥାନା ଅନ୍ତର୍ଗତ ଅନ୍ଧାରୁଆ ଅଞ୍ଚଳରେ କିଛି ଜାଗା ବ୍ୟବସାୟ କରିବା ପାଇଁ ଚାହୁଁଥିବାରୁ ସେ ଅଭିଯୋଗକାରୀଙ୍କ ଠାରୁ ଅଗ୍ରୀମ ୧୬ଲକ୍ଷ ଟଙ୍କା ବିଭିନ୍ନ ମାଧ୍ୟମରେ ନେଇଥିଲେ ଏବଂ ପ୍ରତିବଦଳରେ ତାଙ୍କ ନାମରେ ୨୦୦୦ବର୍ଗ ଫୁଟର ଗୋଟିଏ ପ୍ଲଟ ୩୧ଜୁଲାଇ ୨୦୨୨ ସୁଦ୍ଧା କରାଇଦେବାକୁ ପ୍ରତିସୂତି ଦେଇଥିଲେ ।

ଏହା ପରେ ଅଭିଯୁକ୍ତ ଜଣକ ଅଭିଯୋଗକାରୀଙ୍କୁ ଅତ୍ୟଧିକ ଅଗ୍ରୀମ ଟଙ୍କା ମାଗିଥିଲେ, କିନ୍ତୁ ଅଭିଯୋଗକାରୀ ତାଙ୍କୁ ଟଙ୍କା ଦେବାକୁ ମନା କରିଦେବାରୁ ଅଭିଯୁକ୍ତ ଜଣକ ଯୋଗାଯୋଗ କରିବା ବନ୍ଦ କରିଦେଇଥିଲେ । ଗତ ତା ୦୫.୦୭.୨୦୨୩ ରିଖରେ ଅଭିଯୋଗକାରୀ ତାଙ୍କର କିଛି ବନ୍ଧୁଙ୍କ ସହିତ ଅଭିଯୁକ୍ତଙ୍କୁ ସାକ୍ଷାତ କରିବାକୁ ତାଙ୍କ ଘରକୁ ଯାଇଥିଲେ ଏବଂ ଉକ୍ତ ପ୍ଲଟ କୁ ତାଙ୍କ ନାମରେ କରାଇବାକୁ କହିଥିଲେ। ଅଭିଯୁକ୍ତ ଜଣକ ତାଙ୍କ ପାଖରେ ସେମିତି କିଛି ପ୍ଲଟ ନଥିବା ଜଣାଇବା ସହ ସେ ଅଗ୍ରୀମ ଟଙ୍କା ଫେରାଇ ଦେବାକୁ କହି ଗୋଟିଏ ଚେକ ଦେଇଥିଲେ ।

ପରବର୍ତ୍ତୀ ସମୟରେ ଅଭିଯୋଗକାରୀ ଉକ୍ତ ଚେକ କୁ ଜମା କରିବା ସମୟରେ ସମ୍ପୃକ୍ତ ଏକାଉଣ୍ଟ ରେ ପର୍ଯ୍ୟାପ୍ତ ଟଙ୍କା ନଥିବା ଜାଣିବାକୁ ପାଇଥିଲେ। ଅଭିଯୋଗକାରୀ ଏନେଇ ଅଭିଯୁକ୍ତଙ୍କୁ ପୁନର୍ବାର ଯୋଗାଯୋଗ କରିବାରୁ ସେ ଟଙ୍କା ଦେବାକୁ ମନା କରିବା ସହ ଭୟଙ୍କର ପରିଣାମର ଧମକ ଦେଇଥିଲେ । ଏନେଇ ନୟାପଲ୍ଲି ଥାନାରେ ମାମଲା ରୁଜୁ ହେବା ପରେ ପୁଲିସ ତଦନ୍ତ କରି ନିମ୍ନୋକ୍ତ ଅଭିଯୁକ୍ତଙ୍କୁ ଗିରଫ କରି ଥାନାକୁ ଆଣିଥିଲେ । ପଚରା ଉଚରା ବେଳେ ଅଭିଯୁକ୍ତ ନିଜର ଅପରାଧ ସ୍ଵୀକାର କରିଥିଲେ । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।