ଗାଡିଚୋର ଗିରଫ

ନିରପେକ୍ଷ(ଭୁବନେଶ୍ୱର) : ବାଲିପାଟଣା ଥାନା ପୁଲିସ ଉପରୋକ୍ତ ମାମଲାରେ ସମ୍ପୃକ୍ତ ଥିବା ଅଭିଯୋଗରେ ଏସକେ ଜାବର ଓରଫ ଜାବୁ(29),ରାହୁଲ ସା(30)ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛନ୍ତି । ସୂଚନାଯୋଗ୍ୟ ଯେ, ବାଲିପାଟଣା ଥାନାର ଥାନାଧିକାରୀଙ୍କ ନିର୍ଦ୍ଦେଶ କ୍ରମେ ସମ୍ପୃକ୍ତ ଥାନାର ଏକ ସ୍ପେଶାଲ ଟିମ ନିଜ ଅଞ୍ଚଳରେ ପେଟ୍ରୋଲିଂ କରୁଥିବା ସମୟରେ, ବସନ୍ତମାଳ ଛକ ନିକଟରେ ନିମ୍ନୋକ୍ତ ଦୁଇ ଅଭିଯୁକ୍ତ ଏକ ନମ୍ବର ବିହୀନ ଚୋରା ମୋଟରସାଇକେଲ ଯୋଗେ ଖୁବ ଦ୍ରୁତ ଗତିରେ ସେମାନଙ୍କ ଗାଡିକୁ ଅତିକ୍ରମ କରି ପଳାଇ ଯାଇଥିଲେ । ଏହା ଦେଖି ପେଟ୍ରୋଲିଂ ଟିମ ଉଭୟ ଅଭିଯୁକ୍ତଙ୍କର ପିଛା କରିବା ସହିତ କିଛିଦୂର ଯିବାପରେ ଉଭୟଙ୍କୁ ଅଟକାଇବାରେ ସକ୍ଷମ ହୋଇଥିଲେ ।

ଯାଞ୍ଚ ସମୟରେ ଉଭୟ ବ୍ୟବହାର କରୁଥିବା ଉକ୍ତ ଗାଡିଟି ଏକ ଚୋରା ଗାଡି ହୋଇଥିବା ପୁଲିସ ଜାଣିବାକୁ ପାଇଥିଲେ । ଉଭୟଙ୍କ ନିକଟରୁ ମିଳିଥିବା ତଥ୍ୟ ଆଧାରରେ ପୁଲିସ କିଛି ଦୂର ଅଗ୍ରସର ହେବା ପରେ ଅନ୍ୟ ଏକ ଚୋରା ସ୍କୁଟିକୁ ରାସ୍ତା କଡରେ ରଖାଯାଇଥିବା ଦେଖିବାକୁ ପାଇଥିଲେ । ପଚରା ଉଚରା ବେଳେ ଉଭୟ ଅଭିଯୁକ୍ତ ଉକ୍ତ ଦୁଇଟି ଗାଡ଼ିକୁ ଚୋରିକରି ଆଣିଥିବା ସ୍ଵୀକାର କରିଥିବାରୁ ଅଧିକ ତଦନ୍ତ ପୁଲିସ ସେମାନଙ୍କୁ ଥାନାକୁ ଆଣିଥିଲେ । ନିମ୍ନୋକ୍ତ ଦୁଇ ଅଭିଯୁକ୍ତଙ୍କ ମଧ୍ୟରୁ ଅଭିଯୁକ୍ତ ଏସକେ ଜାବର ଓରଫ ଜାବୁଙ୍କ ନାମରେ ବାଲିପାଟଣା ଥାନାରେ ଗୋଟିଏ ମାମଲା ରହିଥିବା ବେଳେ ରାହୁଲ ସା ଙ୍କ ନାମରେ ୩ ଟି ମାମଲା ରହିଥିବା ତଦନ୍ତ ବେଳେ ପୁଲିସ ଜାଣିବାକୁ ପାଇଛି । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।