ଯୁବକ ଙ୍କୁ ମରଣାନ୍ତକ ଆକ୍ରମଣ ଅଭିଯୁକ୍ତଙ୍କୁ କାବୁ କଲା ପୋଲିସ

ନିରପେକ୍ଷ(ଭୁବନେଶ୍ୱର) : ବାଲିଅନ୍ତା ଥାନା ପୁଲିସ ଅଭିଯୋଗକାରୀ ଅବଦୁଲା ଅନସାରୀଙ୍କ ଅଭିଯୋଗ ଭିତ୍ତିରେ ତଦନ୍ତ କରିବା ସହ ନିମ୍ନୋକ୍ତ ଅଭିଯୁକ୍ତ ଗୁଣ ପୃଷ୍ଟି(32) ଙ୍କୁ ଗିରଫ କରି କୋର୍ଟ ଚାଲାଣ କରିଛନ୍ତି । ସୂଚନା ଯୋଗ୍ୟ ଯେ, ଅଭିଯୋଗକାରୀ ଜଣେ ଲେବର କଣ୍ଟ୍ରାକ୍ଟର ହୋଇଥିବା ବେଳେ ସେ ଏମଟି ପୋର୍ଟେବଲ କମ୍ପାନୀରେ ୧୪ ଜଣ ଲେବରଙ୍କୁ ନିୟୋଜିତ କରିଛନ୍ତି । ଗତ ତା. ୨୯.୦୧.୨୦୨୪ ରିଖ ଅପରାହ୍ନରେ ଅଭିଯୋଗକାରୀ ଏବଂ ସମ୍ପୃକ୍ତ ଲେବର ମାନେ ଭୁବନପୁର କେନାଲ ବସ୍ତିର ଯୁବକ ମାନଙ୍କ ସହ ମିଶି ଭୁବନପୁର ହନୁମାନ ପଡିଆରେ କ୍ରିକେଟ ଖେଳୁଥିବା ବେଳେ ଉଭୟ ପକ୍ଷ ମଧ୍ୟରେ ଝଗଡା ଆରମ୍ଭ ହୋଇଥିଲା ଏବଂ ଏହା କ୍ରମଶଃ ଭୀଷଣ ରୂପ ନେଇଥିଲା ।

ଏହି ସମୟରେ ନିମ୍ନୋକ୍ତ ଅଭିଯୁକ୍ତ ଏବଂ ତାଙ୍କର ଅନ୍ୟ ସହଯୋଗୀ ମାନେ ପଡିଆ ମଧ୍ୟକୁ ପଶିବା ଆସିବା ସହିତ ସାକିର ଅଲ୍ଲୀ ନାମକ ଜଣେ ଯୁବକଙ୍କୁ କ୍ରିକେଟ ଷ୍ଟମ୍ପ, ବ୍ୟାଟ ଏବଂ ଇଟା ସାହାଯ୍ୟରେ ମରଣାନ୍ତକ ଆକ୍ରମଣ କରିଥିଲେ । ଏହି ଆକ୍ରମଣ ଯୋଗୁଁ ତାଙ୍କ ଶରୀରର ଏକାଧିକ ସ୍ଥାନରେ ଗୁରୁତର ଆଘାତ ଲାଗିବା ସହିତ ସେ ଘଟଣା ସ୍ଥଳରେ ଅଚେତ ହୋଇ ପଡିଯାଇଥିଲେ । ପରେ ଅଭିଯୋଗକାରୀ ଏବଂ ତାଙ୍କ କମ୍ପାନୀର ସଦସ୍ୟ ମାନେ ଘଟଣା ସ୍ଥଳରୁ ଆହତ ଯୁବକଙ୍କୁ ଉଦ୍ଧାର କରି ହାଇଟେକ ମେଡ଼ିକାଲକୁ ସ୍ଥାନାନ୍ତର କରିଥିଲେ । ଅଭିଯୋଗକାରୀ ଏନେଇ ଥାନାରେ ଲିଖିତ ଅଭିଯୋଗ କରିବା ପରେ, ପୁଲିସ ମାମଲାର ତଦନ୍ତ କରିବା ସହିତ ନିମ୍ନୋକ୍ତ ଅଭିଯୁକ୍ତଙ୍କୁ କାବୁ କରିଥିଲେ । ପଚରାଉଚରା ବେଳେ ଅଭିଯୁକ୍ତ ଜଣକ ନିଜର ଅପରାଧ ସ୍ଵୀକାର କରିଥିଲେ । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।