ଭୁବନେଶ୍ୱର (ନିରପେକ୍ଷ): ଆଜି ଭୁବନେଶ୍ବର ପ୍ରଥମଶ୍ରେଣୀ ବିଚାର ବିଭାଗୀୟ ଅଦାଲତ-୨ ର ବିଚାରପତି ଶ୍ରୀ ଗିରିଶ ଚନ୍ଦ୍ର ମୁଦୁଲି, ଓ ଭୁବନେଶ୍ବର ପ୍ରଥମଶ୍ରେଣୀ ବିଚାର ବିଭାଗୀୟ ଅଦାଲତ-୫ ର ବିଚାରପତି ଶ୍ରୀ ସବ୍ୟସାଚୀ ପଣ୍ଡା ଦୁଇଟି ପୃଥକ ଚୋରୀ ମାମଲାର ବିଚାର କରି ଆସାମୀ ଅନିଲ ବଳ ଓ ମଣ୍ଟୁ ପାଇକରାୟଙ୍କୁ ସଜା ଶୁଣାଇଛନ୍ତି । ଅଭିଯୋଗକାରୀ ଡୋମି ମଣ୍ଡଳ ମଞ୍ଚେଶ୍ଵର ଥାନା ଅନ୍ତର୍ଗତ ବିହାରୀ ଗ୍ଯାସ କମ୍ପାନୀରେ ଜଣେ ସିକ୍ୟୁରିଟି ଗାର୍ଡ ଭାବେ କାର୍ଯ୍ୟ କରୁଥିଲେ । ଗତ ତା.୨୮.୧୦.୨୦୨୩ ରିଖ ଦିନ ଅଭିଯୁକ୍ତ ଅନିଲ ବଳ କମ୍ପାନୀ ମେସରେ ପଶି ଦୁଇଟି ଗ୍ଯାସ ସିଲିଣ୍ଡର ଚୋରୀ କରୁଥିବା ସମୟରେ ଅଭିଯୋଗକାରୀ ଜଣକ ତାଙ୍କୁ କାବୁ କରିବାରେ ସକ୍ଷମ ହୋଇଥିବା ବେଳେ ପୁଲିସ ଜିମା ଦେଇଥିଲେ । ଏହି ଘଟଣାକୁ କେନ୍ଦ୍ରକରି ଅଭିଯୋଗକାରୀଙ୍କର ଅଭିଯୋଗ ଭିତ୍ତିରେ ମଞ୍ଚେଶ୍ଵର ଥାନା କେସ ନଂ- ୪୫୭/୨୦୨୩ ଦଫା- ୩୭୯ ରେ ମାମଲା ରୁଜୁ କରାଯିବା ସହିତ ଥାନାର ତତ୍କାଳୀନ ଆସିଷ୍ଟାଣ୍ଟ-ସବ-ଇନ୍ସପେକ୍ଟର ଶ୍ରୀ ବସନ୍ତ କୁମାର ପ୍ରଧାନଙ୍କୁ ଏହାର ତଦନ୍ତ ଭାର ଦିଆଯାଇଥିଲା । ଶ୍ରୀ ପ୍ରଧାନ ଏହି ମାମଲାକୁ ସଠିକ ଭାବରେ ତଦନ୍ତ କରିବା ସହିତ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ ।
ସେହିପରି ଅଭିଯୋଗକାରୀ ଶ୍ରୀ ବିଶ୍ଵମୋହନ ରାଉତ ଖଣ୍ଡଗିରି ଥାନା ଅନ୍ତର୍ଗତ ସୌଭାଗ୍ୟ ନଗର ଅଞ୍ଚଳରେ ରହୁଥିଲେ । ଗତ ତା.୦୬.୧୦.୨୦୨୩ ରିଖ ଦିନ ଅଭିଯୁକ୍ତ ମଣ୍ଟୁ ପାଇକରାୟ ଅଭିଯୋଗକାରୀଙ୍କ ଘରର ଝରକା ଜାଲି କାଟି ଭିତରେ ଥିବା ଦୁଇଟି ମୋବାଇଲ ଫୋନ, ଚାର୍ଜର, ମନିପର୍ସ ଏବଂ ଇୟରଫୋନ ଚୋରୀ କରି ନେଇଯାଇଥିଲେ । ଏହି ଘଟଣାକୁ କେନ୍ଦ୍ରକରି ଅଭିଯୋଗକାରୀଙ୍କର ଅଭିଯୋଗ ଭିତ୍ତିରେ ଖଣ୍ଡଗିରି ଥାନା କେସ ନଂ- ୪୨୯/୨୦୨୩ ଦଫା- ୩୮୦ ରେ ମାମଲା ରୁଜୁ କରାଯିବା ସହିତ ଥାନାର ତତ୍କାଳୀନ ଆସିଷ୍ଟାଣ୍ଟ-ସବ-ଇନ୍ସପେକ୍ଟର ଶ୍ରୀ ବିଶ୍ବଜିତ ସାମନ୍ତରାୟଙ୍କୁ ଏହାର ତଦନ୍ତ ଭାର ଦିଆଯାଇଥିଲା । ଶ୍ରୀ ସାମନ୍ତରାୟ ଏହି ମାମଲାକୁ ସଠିକ ଭାବରେ ତଦନ୍ତ କରିବା ସହିତ ସମ୍ପୃକ୍ତ ଅଭିଯୁକ୍ତ ମଣ୍ଟୁ ପାଇକରାୟଙ୍କୁ ଖୁବ ଶୀଘ୍ର ଗିରଫ କରିବାରେ ସକ୍ଷମ ହୋଇଥିଲେ ।
