ଇଡ଼ି ସ୍କାନରରେ ଛତିଶଗଡ଼ ମୁଖ୍ୟମନ୍ତ୍ରୀ

ନିରପେକ୍ଷ(ବ୍ୟୁରୋ) : ଛତିଶଗଡ଼ରେ ପୁଣିଥରେ ଇଡିର ଜୋରଦାର ଚଢାଉ । ଇଡ଼ି ସ୍କାନରରେ ମୁଖ୍ୟମନ୍ତ୍ରୀ ଭୁପେଶ ବାଘେଲ । ଅନଲାଇନ୍ ମହାଦେବ ବେଟିଂ ଆପ୍ ପ୍ରମୋଟର୍ସ ମୁଖ୍ୟମନ୍ତ୍ରୀ ବାଘେଲଙ୍କୁ ୫୦୮କୋଟି ଟଙ୍କା ଦେଇଥିବା ଜାଣିବାକୁ ପାଇଛି ଇଡ଼ି । ଏହି ମାମଲାରେ ଗିରଫ ହୋଇଥିବା ଜଣେ ଅଭିଯୁକ୍ତ ଅସିମ ଦାସ ପ୍ରବର୍ତ୍ତନ ନିର୍ଦ୍ଦେଶାଳୟ ବା ଇଡ଼ି ଆଗରେ ଏହି କଥା ସ୍ୱିକାର କରିଥିବା ଜଣାପଡ଼ିଛି । ଯାହାକୁ ନେଇ ଏବେ ତଦନ୍ତ ଚଳାଇଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଅସୀମ ଦାସ ଏବଂ କନଷ୍ଟେବଳ ଭୀମ ସିଂ ଯାଦବଙ୍କୁ ରାୟପୁରର ସ୍ୱତନ୍ତ୍ର କୋର୍ଟ ୭ଦିନ ପାଇଁ ଇଡ଼ି ରିମାଣ୍ଡରେ ପଠାଇଦେଇଛନ୍ତି । ପରବର୍ତ୍ତି ଶୁଣାଣୀ ନଭେମ୍ବର ୧୦ରେ ହେବ । ଅନଲାଇନ୍ ବେଟିଂ ଆପ୍ ମାମଲାରେ ଇଡ଼ି ରାୟପୁର ଏବଂ ଭିଲାଇରେ ଜୋରଦାର ଚଢାଉ ଜାରି ରଖିଛି ।

ଏହି ଚଢାଉ ବେଳେ ଇଡ଼ିକୁ ୫କୋଟି ୪୮ଲକ୍ଷ ଟଙ୍କା ମିଳିଥିଲା । ଏହାସହ ସଂସ୍ଥାର ୧୫କୋଟି ଟଙ୍କାର ଜମାରାଶିକୁ ଫ୍ରିଜ୍ କରାଯାଇଥିବା ଜଣାପଡ଼ିଛି । ରିଲାଏ ହାଉସିଂ ବୋର୍ଡରୁ ବର୍ଷା ଦାସ ନାମକ ଜଣେ ଡ୍ରାଇଭରଙ୍କ ଘରୁ ବି ଅଢେଇକୋଟି ଟଙ୍କା ଜବତ କରାଯାଇଛି । କୁହାଯାଉଛି ବର୍ଷା ଦାସ ଅନଲାଇନ ବେଟିଂ ଆପର ଆଇଡ଼ି ଅପରେଟ୍ କରୁଥିଲେ । ହେଲେ ଇଡ଼ି ଆଶଙ୍କା କରିଛି ଯେ, ବର୍ଷାଙ୍କ ଘରୁ ମିଳିଥିବା ଟଙ୍କା ନିର୍ବାଚନରେ ଖର୍ଚ୍ଚ କରିବାକୁ ରଖାଯାଇଥିଲା । ଅପରପକ୍ଷରେ ଏଭଳି ଅଭାବନୀୟ ଘଟଣାକୁ ନେଇ ଭୂପେଶ ବାଘେଲ କେନ୍ଦ୍ର ବିରୋଧରେ ମନଭରି ବର୍ଷିଛନ୍ତି । ଭୁପେଶ କହିଛନ୍ତି, ମୁଖ୍ୟମନ୍ତ୍ରୀଙ୍କ ଭଳି ଜଣେ ଗୁରୁତ୍ୱପୂର୍ଣ୍ଣ ଲୋକଙ୍କ ଉପରେ ଏଭଳି କଳଙ୍କ ଲଗାଇବା ନିହାତି ନିନ୍ଦନୀୟ । ତାଙ୍କୁ ଏହି ଘଟଣାରେ ଜୋର ଜବରଦସ୍ତ ଟଣା ଯାଉଛି । ଆଗକୁ ସାଧାରଣ ନିର୍ବାଚନ ଥିବାରୁ କେନ୍ଦ୍ରସରକାର ଜାଣିଶୁଣି ଏଭଳି ଇଡ଼ି ଭୟ ଦେଖାଇବା ସହ ତାଙ୍କୁ ଏଥିରେ ସମ୍ପୃକ୍ତ କରାଯାଉଛି ।