ପରଲୋକରେ ସଙ୍ଗୀତ ନିର୍ଦ୍ଦେଶକ ସ୍ୱରୂପ ନାୟକ

ନିରପେକ୍ଷ/ବ୍ୟୁରୋ(୨୭/୧௦) : ସବୁଦିନ ପାଇଁ ନିରବିଯାଇଛି ଓଡ଼ିଆ ସଙ୍ଗୀତ ଜଗତର ଲୋକପ୍ରିୟ ନିର୍ଦ୍ଦେଶକ ସ୍ୱରୂପ ନାୟକଙ୍କ ସ୍ୱର । ବିଶିଷ୍ଟ ସଙ୍ଗୀତ ନିର୍ଦ୍ଦେଶକ, ଗୀତିକାର, କଣ୍ଠଶିଳ୍ପୀ ତଥା ତଥା ଅଭିନେତା ସ୍ୱରୂପ ନୟକ ଆଉ ଏ ଇହଧାମରେ ନାହାଁନ୍ତି । ୭୦ରୁ ଅଧିକ ଓଡ଼ିଆ ଫିଲ୍ମରେ ସେ ସଙ୍ଗୀତ ନିର୍ଦ୍ଦେଶନା ଦେଇଥିବା ବେଳେ ୮୦ରୁ ଅଧିକ ଓଡ଼ିଆ ଚଳଚ୍ଚିତ୍ରରେ ଗୀତ ରଚନା କରିଥିବା ସ୍ୱରୂପ ଦୀର୍ଘଦିନ ଧରି କ୍ୟାନସର ରୋଗରେ ପିଡିତ ଥିଲେ । ଆଜି ଏକ ଘରୋଇ ହସ୍ପିଟାଲରେ ତାଙ୍କର ମୃତ୍ୟୁ ହୋଇଯାଇଛି । ଓଡ଼ିଆ ଆଧୁନୀକ ସଙ୍ଗୀତ ଜଗତର ଅନ୍ୟତମ ସ୍ରଷ୍ଟା ଭାବେ ବେଶ୍ ପରିଚିତ ସ୍ୱରୂପ କେବଳ ଯେ ଓଡ଼ିଆ ଭାଷାରେ ସଙ୍ଗୀତ ନିର୍ଦ୍ଦେଶନା ଦେଇଥିଲେ ତାହା ନୁହେଁ । ସେ ଅନେକ ବଙ୍ଗଳା ଏବଂ ହିନ୍ଦୀ ଚଳଚ୍ଚିତ୍ରରେ ମଧ୍ୟ ନିଜ ସଙ୍ଗୀତର ଯାଦୁରେ ଶ୍ରୋତାଙ୍କୁ ବିମୋହିତ କରିଥିଲେ ।

୧୯୪୬ମସିହା ଫେବୃଆରୀ ୮ତାରିଖରେ କଟକରେ ଜନ୍ମଗ୍ରହଣ କରିଥିବା ସ୍ୱରୂପ ୧୯୬୨ରେ ମୁକ୍ତିପ୍ରାପ୍ତ ଜୟଦେବ ଚଳଚ୍ଚିତ୍ରରେ ଶିଶୁ କଳାକାର ଭାବେ ବଡ଼ ପରଦାରେ ଅଭିନୟ ଜୀବନ ଆରମ୍ଭ କରିଥିଲେ । ବଡ଼ ହେବା ପରେ ସ୍ୱରୂପ ସତୀ ଅନସୂୟା, ସୁନା ସଂସାର, କଳାମାଣିକ, କଣ୍ଢେଇ ଆଖିରେ ଲୁହ, ଯଶୋଦା ଆଦି ସମେତ ବେଶ୍ କେତୋଟି ଓଡ଼ିଆ ଛବିରେ ଅଭିନେତା ଭାବେ ନଜର ଆସିଥିଲେ । ହେଲେ ସ୍ୱରୂପ ନାୟକ ଗୀତିକାର-ସଙ୍ଗୀତକାର ଭାବେ ଓଡ଼ିଉଡରେ ବିଶେଷ ସଫଳତା ହାସଲ କରିପାରିଛନ୍ତି । ତାଙ୍କ ସ୍ୱରୋପିତ ପ୍ରଥମ ଓଡ଼ିଆ ଛବି ହେଉଛି ଦୁର୍ଗା ନନ୍ଦଙ୍କ ପ୍ରଯୋଜିତ ତଥା ପ୍ରଶାନ୍ତ ନନ୍ଦଙ୍କ ନିର୍ଦ୍ଦେଶିତ ହୀରାନୀଳା । ଏହାପରେ ସ୍ୱରୂପ ଆଉ ପଛକୁ ଫେରି ଚାହିଁନଥିଲେ । ତାଙ୍କ ସଙ୍ଗୀତ ନିର୍ଦ୍ଦେଶିତ କେତେକ ଉଲ୍ଲେଖନୀୟ ଛବି ମଧ୍ୟରେ ରହିଛି ଲାଲପାନ ବିବି, ବଗଲା ବଗୁଲୀ, ଲକ୍ଷେ ଶିବ ପୂଜି ପାଇଛି ପୁଅ, ଯଶୋଦା, କୃଷ୍ଣା କାବେରୀ, କିଏ ହେବ ଶୁଆ ପୋଷିଲେ, ଶୁଭଦ୍ରା, ସକଳ ତୀର୍ଥ ତୋ ଚରଣେ ଭଳି ଅନେକ ଲୋକପ୍ରୟ ଚଳଚ୍ଚିତ୍ର । ଏହାସହ ସ୍ୱରୂପ ନାୟକ ଉଦଣ୍ଡୀ ସୀତା, ପଞ୍ଜୁରୀ ଭିତରେ ଶାରୀ, ମୋ କୋଳରେ ତୋ ଝୁଲଣା, ଏ ଯୁଗର କୃଷ୍ଣ ସୁଦାମା, ଆଇ ଲଭ୍ ୟୁ, ଅର୍ଜ୍ଜୁନ, ପ୍ରେମୀ ନମ୍ବର ୱାନ, ଶାଶୁଘର ଚାଲିଯିବି, ପ୍ରେମ ଋତୁ ଆସିଲାରେ, ପ୍ରଥମେ ପ୍ରଥମେ, ମୁଁ ତତେ ଲଭ୍ କରୁଛି, ରୋମିଓ ଦ ଲଭର ବୟ ଏବଂ ଅପ୍ନା ହାତ ଜଗନ୍ନାଥ ଆଦି ୬୦ରୁ ଅଧିକ ଓଡ଼ିଆ ଚଳଚ୍ଚିତ୍ରରେ ମଧ୍ୟ ଗୀତ ରଚନା କରିଥିଲେ । ଯାହାଙ୍କ ସ୍ଥାନ ଆଉ ପୂରଣ ହୋଇପାରିବନି । ସ୍ୱରୂପ ନାୟକଙ୍କ ଦେହାନ୍ତ ଯୋଗୁଁ ଓଲିଉଡରେ ଏକ ଅପୂରଣୀୟ ଶୂନ୍ୟସ୍ଥାନ ସୃଷ୍ଟି ହୋଇଛି ।