କମ୍ପାନୀ ଭିତରେ ଚାଷ କଲେ ଜମିହରା ପ୍ରଜା

ଢେଙ୍କାନାଳ : କମ୍ପାନୀ ଭିତରେ ଚାଷ କଲେ ଜମିହରା ପ୍ରଜା । କ୍ଷତିଗ୍ରସ୍ତ ଗ୍ରାମବାସୀ ହରାଇଥିବା ଜମିର ଉଚିତ୍ ପ୍ରାପ୍ୟ ପାଇ ନ ଥିବା ଅଭିଯୋଗରେ କମ୍ପାନୀ ପରିସରରେ ଆଜି ମାଣ୍ଡିଆ, କୋଳଥ, ମେଥିମୁଗ ଆଦି ବୁଣିଛନ୍ତି। ଢେଙ୍କାନାଳ ଜିଲ୍ଲା କୁରୁଣ୍ଟି ଅଞ୍ଚଳରେ ଥିବା ଲାନକୋ କମ୍ପାନୀ ଅଧିକୃତ ଜମିରେ ଆଜି ଏକତ୍ରିତ ହେଲେ ଦୁଇ ଗାଁର ଜମିହରା ପ୍ରଜା । ଯଦିଓ ଏବେ ସେଠାରେ ଆଉ କମ୍ପାନୀ କାର୍ଯ୍ୟକ୍ଷମ ନାହିଁ ଓ ଲାନକୋ କମ୍ପାନୀ ବିକ୍ରି ହୋଇସାରିଛି ତଥାପି କମ୍ପାନୀ କର୍ତ୍ତୃପକ୍ଷ ଜମି ଗୁଡ଼ିକୁ ଶାଗ ମାଛ ଦରରେ ବିକ୍ରି କରିଥିବା ଅଭିଯୋଗ ହୋଇଛି।

ତେବେ ପ୍ରାୟ ୧୨ଶହ ଏକର ଚାଷଜମିରେ ଆଜି ବୁଣାଯାଇଛି ଶୋରିଷ,ମେଥିମୁଗ,କୋଳଥ ଓ ମାଣ୍ଡିଆ। ସୂଚନା ଅନୁଯାୟୀ ଗତ ୨୦୦୭ ମସିହାରେ ଢେଙ୍କାନାଳ ଜିଲ୍ଲା ଓଡାପଡା ବ୍ଲକ କୁରୁଣ୍ଟି ସ୍ଥିତ ଲାନକୋ କମ୍ପାନୀକୁ ଖଡଗପ୍ରସାଦ ଓ କୁରୁଣ୍ଟି ଗାଁର ଶତାଧିକ ଚାଷୀ ୧୨ ଶହ ଏକର ଜମି ପ୍ରଦାନ କରିଥିଲେ।ବଦଳରେ କମ୍ପାନୀ ସେମାନଙ୍କୁ ଚାକିରୀ ସହ ସମସ୍ତ ସୁବିଧା ସୁଯୋଗ ଦେବା ପାଇଁ ପ୍ରତିଶୃତି ମଧ୍ୟ ଦେଇଥିଲା। ଦୀର୍ଘ ୧୫ବର୍ଷ ପରେ କମ୍ପାନୀ ତ ବନ୍ଦ ହୋଇ ଗଲା କିନ୍ତୁ ଜମିହରା ପ୍ରଜା ନିଜର ପ୍ରାପ୍ୟ ପାଇ ପାରି ନଥିଲେ।ଫଳରେ ଆଜି ପ୍ରାୟ ପଚାଷରୁ ଅଧିକ ଟ୍ରାକ୍ଟର ଧରି କମ୍ପାନୀ ପରିସରରେ ପଶି ଦୁଇ ଗ୍ରାମର ଜମିହରା ପ୍ରଜା ଚାଷ କାର୍ଯ୍ୟ ଆରମ୍ଭ କରିଛନ୍ତି ।