ସୈତାନ ସ୍ୱାମୀର ଜଘନ୍ୟ କାଣ୍ଡ ,ସ୍ତ୍ରୀ କୁ ପିଟି ପିଟି କଲା ହତ୍ୟା

ନିରପେକ୍ଷ: ହିନ୍ଦୋଳ(୫/୮) : ନରରାକ୍ଷସ ସ୍ୱାମୀର ଭୟାନକ କାଣ୍ଡ ।ଭୁଲିଗଲା ସବୁ ସମ୍ପର୍କ ସ୍ତ୍ରୀକୁ ଅଧରାତିରେ ପଟିପିଟି ହତ୍ୟା କଲା ନୃଶଂସ ସ୍ୱାମୀ l ଢେଙ୍କାନାଳ ଜିଲ୍ଲା ହିନ୍ଦୋଳ ଉପଖଣ୍ତ ବାଲିମି ଥାନା ଅନ୍ତର୍ଗତ ଦୁଦୁରୁକୋଟ ବାଘୁଆ ସାହିରେ ଏଭଳି ଅଭାବନୀୟ ଘଟଣା ଘଟିଛି l ଗ୍ରାମର ପ୍ରତାପ ସାମଲ (୪୨ ବର୍ଷ) ତାଙ୍କ ସ୍ତ୍ରୀ ମୀନତି ସାମଲ (୩୮ ବର୍ଷ)ଙ୍କୁ ପିଟିପିଟି ହତ୍ୟା କରିଥିବା ନେଇ ବାଲିମି ଥାନାରେ ଲିଖିତ ଅଭିଯୋଗ ହୋଇଛି।

ସୂଚନାନୁଯାୟୀ, ଅଭିଯୁକ୍ତ ପ୍ରତାପ ଅନେକ ଥର ମଦ ନିଶାରେ ସ୍ତ୍ରୀ ମୀନତିଙ୍କୁ ପିଟାପିଟି କରନ୍ତି । ଫଳରେ ମୀନତି ବାପଘରକୁ ଚାଲି ଯାଇଥିଲେ। ଶୁକ୍ରବାର ପ୍ରତାପ ସ୍ତ୍ରୀକୁ ଡାକି ଆଣିଥିଲା। ରାତିରେ ଖାଇସାରି ଦୁଇ ପୁଅକୁ ଶୋଇବା ପରେ ଅଧାରାତିରେ ସ୍ତ୍ରୀକୁ ପ୍ରତାପ ଘରୁ ବାହାରକୁ ଡାକି ଆଣିଥିଲା। ଏହାପରେ ତାର ମୁଣ୍ତକୁ ଶକ୍ତ ପ୍ରହାର ଦେଇଥିଲା l ମୀନତି ଚିତ୍କାର କରିବାରୁ ସାନପୁଅ ଉଠି ପଡୋଶୀଙ୍କ ସହାୟତାରେ ଗୁରୁତର ଅବସ୍ଥାରେ ମାକୁ ଆମ୍ବୁଲାନ୍ସ ଡାକି ହିନ୍ଦୋଳ ଡାକ୍ତରଖାନାକୁ ନେଇଥିଲେ l ସେଠାରେ ଡାକ୍ତର ମୀନତିକୁ ମୃତ ଘୋଷଣା କରିଥିଲେ l ମୃତଙ୍କ ବାପା ଶିବରାମ ସାମଲ ବାଲିମି ଥାନାରେ ହତ୍ୟା ନେଇ ପରିବାର ଲୋକଙ୍କ ନାମରେ ଲିଖିତ ଅଭିଯୋଗ କରିଛନ୍ତି। ବାଲିମି ଥାନା ଅଧିକାରୀ ଅମିତ୍ କୁମାର ବିଶ୍ୱାଳ ଶବକୁ ଜବତ କରିବା ସହ ଶାଶୁ ଶ୍ୱଶୁର ସମେତ ପରିବାର ବର୍ଗଙ୍କୁ ଥାନାକୁ ନେଇ ପଚରାଉଚୁରା ଜାରି ରଖିଥିବା ଜଣାପଡିଛି ।