ବିଡିଏକୁ ବାଜିବ ୫-ଟି ଛାଟ

ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ ବା ବିଡିଏରେ ଚାଲିଛି ଦଲାଲ ରାଜ୍ । ଏଣୁ ଏବେ ବିଡ଼ିଏକୁ ବାଜିବ ୫-ଟିର ଛାଟ । ଏବେ ବିଡ଼ିଏରେ ଟଙ୍କା ନଦେଲେ ଏହି କାର୍ଯ୍ୟାଳୟରେ ଲୋକଙ୍କ ଫାଇଲ ଘୁଞ୍ଚିବାର ନାଁ ଧରୁନି । ୫-ଟି ଛାଟକୁ ଭୃକ୍ଷେପ ନକରି କିଛି ନିର୍ଦ୍ଦିଷ୍ଟ ଅଧିକାରୀ ଫାଇଲ ପିଛା ଦର ଧାର୍ଯ୍ୟ କରିବା ସହ ନିଜର ପକେଟ୍ ଗରମ କରୁଛନ୍ତି । ଯେଉଁଥିପାଇଁ ଅଯଥାରେ ହନ୍ତସନ୍ତ ହେଉଛନ୍ତି ସାଧାରଣ ଲୋକେ । ଏଭଳି ଅର୍ଥ ରୋଜଗାର ଯୋଗୁଁ ପଦୋନ୍ନତି ପରେ ବି କିଛି ଅଧିକାରୀ ବିଡିଏ ଛାଡି ଯାଉନଥିବା ଚର୍ଚ୍ଚା ହେଉଛି । ଅଭିଯୋଗ ଅନୁଯାୟୀ ବିଡିଏର ଆଲର୍ଟମେଣ୍ଟ୍ ସେକ୍ସନରେ ଥିବା ଅଧିକାରୀମାନେ ବେଶ ହାତ ଗରମ କରିବାରେ ଲାଗିଛନ୍ତି । କାର୍ଯ୍ୟାଳୟର କିଛି ତଳିଆ କର୍ମଚାରୀଙ୍କୁ ନିଜର ଏଜେଣ୍ଟ୍ ଭାବେ ବ୍ୟବହାର କରି ଲୋକଙ୍କଠାରୁ ମନଇଚ୍ଛା ଅର୍ଥ ନେଉଛନ୍ତି । ଘର କିମ୍ବା ପ୍ଲଟ୍ ଆଲର୍ଟମେଣ୍ଟ୍ ପାଇଁ ଅତିକମରେ ୫୦ହଜାର ଟଙ୍କା ଲୋକଙ୍କଠାରୁ ନିଆଯାଉଥିବା ଅଭିଯୋଗ ହୋଇଛି ।

କେବଳ ସେତିକି ନୁହେଁ ମାଲିକାନା ପରିବର୍ତ୍ତନ ପାଇଁ ୧ଲକ୍ଷ ଟଙ୍କା ପର୍ଯ୍ୟନ୍ତ ଦାବି କରାଯାଉଛି । ବିଡିଏଠାରୁ ଯେଉଁମାନେ ଆବଣ୍ଟନ ସ୍କିମରେ ପ୍ଲଟ୍ କିଣିଥିଲେ, ସେମାନେ ଏହାକୁ ବିକ୍ରି କରିବାକୁ ଚାହିଁଲେ ବିଡିଏଠାରୁ ଅନୁମତି ନେବାର ନିୟମ ରହିଛି । ହେଲେ ଏଥିପାଇଁ ଲାଞ୍ଚ ନଦେଲେ ଫାଇଲ ହଲୁନଥିବା କିଛି ହିତାଧିକାରୀ ନିଜର ନାଁ ଗୋପନ ରଖି ଏଭଳି ସାଂଘାତିକ ଅଭିଯୋଗ କରିଛନ୍ତି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ବିଡିଏ କାର୍ଯ୍ୟାଳୟକୁ ଦୁର୍ନୀତିମୁକ୍ତ ରଖିବାର ଉତ୍ତର ଦାୟୀତ୍ୱ ମୁଣ୍ଡାଇଥିବା ବିଡିଏ ସଚିବ ଏହି ଘଟଣା ସମ୍ପର୍କରେ ଅବଗତ ଅଛନ୍ତି କି ନାହିଁ, ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଯାହାପରେ ଏବେ ଏହି ବିଭାଗ ମୁଖ୍ୟତଃ ଆଲର୍ଟମେଣ୍ଟ୍ ସେକ୍ସନ ଉପରେ କଡ଼ା ନଜର ରଖାଯାଇଥିବା ସୂଚନା ମିଳିଛି । ଯେ କୌଣସି ସମୟରେ ଏହି କାର୍ଯ୍ୟାଳୟରେ ଗାଦି ମାଡ଼ି ବସିଥିବା ଅଧିକାରୀଙ୍କ ଉପରେ ୫-ଟି ଛାଟ ବାଜିପାରେ ବୋଲି ଏବେ ଜୋରଦାର ଚର୍ଚ୍ଚା ହେଉଛି ।