ପୁଣି ଏମ୍ସରେ ଚମତ୍କାର: ୯ଘଣ୍ଟାରେ ଯୋଡାଶିଶୁ ଅଲଗା

ପୁଣିଥରେ କମାଲ କରି ଦେଖାଇଛନ୍ତି ଏମ୍ସର ଡାକ୍ତର । ଦିଲ୍ଲୀର ଅଲ୍ ଇଣ୍ଡିଆ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ବା ଏମ୍ସର ଡାକ୍ତରଙ୍କୁ ମିଳିଛି ବଡ଼ ସଫଳତା । ମାତ୍ର ୯ଘଣ୍ଟାର ଅପରେଶନ ପରେ ସଫଳତାର ସହ ଦୁଇ ଯୋଡ଼ା ଶିଶୁଙ୍କୁ ଅଲଗା କରିପାରିଛନ୍ତି ଏମ୍ସର ସ୍ୱତନ୍ତ୍ର ଡାକ୍ତରୀ ଟିମ୍ । ସୂଚନା ମୁତାବକ ଉଭୟ ଶିଶୁ ଗତବର୍ଷ ଜୁଲାଇ ୭ରେ ଜନ୍ମ ହୋଇଥିଲେ । ସେମାନଙ୍କ ସ୍ୱାସ୍ଥ୍ୟାବସ୍ଥା ଠିକ୍ ନଥିବାରୁ ଉଭୟଙ୍କୁ ୫ମାସ ପାଇଁ ଆଇସିୟୁରେ ରଖାଯିବା ସହ ସେମାନଙ୍କ ଚିକିତ୍ସା କରାଯାଉଥିଲା । ବର୍ତ୍ତମାନ ଦୁଇ ଭଉଣୀ ଅଲଗା ହୋଇପାରିଛନ୍ତି । ଏବେ ଉଭୟଙ୍କ ସ୍ୱାସ୍ଥ୍ୟାବସ୍ଥା ସମ୍ପୂର୍ଣ୍ଣ ଭଲ ଥିବା ଜଣାପଡିଛି । ଏମ୍ସର ଡାକ୍ତରଙ୍କ ଦ୍ୱାରା କରାଯାଇଥିବା ଏହି ଚମତ୍କାର ଏବେ ସବୁ ସ୍ଥାନରେ ଚର୍ଚ୍ଚାର ବିଷୟ ପାଲଟିଛି । ଦୁଇ ଭଉଣୀଙ୍କ ପେଟ ଓ ଛାତି ଯୋଡି ହୋଇଥିବା ବେଳେ ଡାକ୍ତରମାନେ ସଫଳତାର ସହ ଉଭୟଙ୍କୁ ଅଲଗା ଅଲଗା କରିପାରିଛନ୍ତି । ପ୍ରାୟ ୯ଘଣ୍ଟା ଧରି ଚାଲିଥିବା ଏହି ଅସ୍ତ୍ରୋପଚାର ପରେ ଏମ୍ସର ଶିଶୁରୋଗ ବିଶେଷଜ୍ଞ ମିନୁ ବାଜପାୟୀ କହିଛନ୍ତି, ଗର୍ଭଧାରଣର ଚତୁର୍ଥ ମାସରେ ଦୁଇ ଶିଶୁ ଯୋଡି ହୋଇଥିବା ଦେଖିବାକୁ ମିଳିଥିଲା । ଉଭୟଙ୍କ ଉପରେ ସେବେଠାରୁ ଡାକ୍ତରୀ ଟିମ୍ ନଜରରେ ରଖିଥିଲେ । ସେମାନେ ଉତ୍ତର ପ୍ରଦେଶର ବରେଲିର ବାସିନ୍ଦା । ଦୀର୍ଘ ୯ଘଣ୍ଟାର ଅପରେଶନ ପରେ ଶିଶୁ ଦ୍ୱୟଙ୍କୁ ଏବେ ଅଲଗା କରାଯାଇଛି । ମାତ୍ର ୧୧ମାସ ବୟସରେ ଶିଶୁ ଦ୍ୱୟଙ୍କୁ ସଫଳତାର ସହ ଅପରେଶନ କରି ଅଲଗା କରିଛନ୍ତି ଏମ୍ସର ଡାକ୍ତରୀ ଟିମ୍ ।