ମହାନଦୀକୁ ଡେଇଁ ଯୁବକ ନିଖୋଜ

ହୀରାକୁଦର ୧୨ଟି ଗେଟ୍ ଦେଇ ଏବେ ସୁସୁ ଗର୍ଜ୍ଜନ କରି ମହାନଦୀକୁ ଯାଉଛି ବନ୍ୟାପାଣି । ମହାନଦୀରେ ଜଳସ୍ତର ଏବେ ବିପଦ ସଙ୍କେତ ଟପିବା ଉପରେ । ଚାରିଆଡ଼େ ଅଥଳଥଳ ପାଣି । ନଦୀକୁ ଚାହିଁଲେ ଭୟ ଲାଗୁଛି । ଏଭଳି କ୍ଷେତ୍ରରେ ମହାନଦୀକୁ ଡେଇଁ ଜଣେ ଯୁବକ ଆଜି ନିଖୋଜ ହୋଇଯାଇଥିବା ଜଣାପଡ଼ିଛି । ଆଜି ଭୋର ସମୟରେ ଏଭଳି ଅଭାବନୀୟ ଘଟଣା ଘଟିଛି । ଟାଉନଥାନା ଅନ୍ତର୍ଗତ ଚାଉରପୁର ବ୍ରିଜ ଉପରୁ ପାଣିକୁ ଡେଇଁ ଯୁବକ ଜଣଙ୍କ ନିଖୋଜ ହୋଇଯାଇଛି । ଯୁବକ ଜଣଙ୍କ ଗୋବିନ୍ଦ ତୋଲା ଅଞ୍ଚଳର ବୋଲି ଜଣାପଡ଼ିଛି । ଖବରପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଖୋଜାଖୋଜି ଜାରି ରଖିଛି । ଏବେ ମହାନଦୀର ପାଣିର ସ୍ରୋତ ଅଧିକ ଥିବାରୁ ଖୋଜାଖୋଜି ସମ୍ଭବପର ହୋଇପାରୁନାହିଁ । ଏସବୁ ସତ୍ତ୍ୱେ ଯୁବକ ଜଣଙ୍କୁ ଠାବ କରିବାକୁ ଅଗ୍ନିଶମବାହିନୀ ଆପ୍ରାଣ ଉଦ୍ୟମ ଚଳାଇଛି ।