ସଂସଦରେ ବିଜେଡ଼ିର ମହିଳା ସଂରକ୍ଷଣ ଦାବି

ପୂର୍ବରୁ ଲୋକସଭା ଓ ବିଧାନସଭାରେ ମହିଳାଙ୍କ ଲାଗି ୩୩ ପ୍ରତିଶତ ସିଟ୍ ସଂରକ୍ଷଣ ଦାବି ଉଠାଇଥିଲା ବିଜେଡ଼ି । ଏବେ ରାଜ୍ୟସଭାରେ ମହିଳା ସଂରକ୍ଷଣ ଦାବିକୁ ପୁନର୍ବାର ଉଠାଇଛନ୍ତି ବିଜେଡ଼ି ସାଂସଦ ଡ. ସସ୍ମିତ ପାତ୍ର । ସଶକ୍ତ ଭାରତ ଲାଗି ମହିଳାଙ୍କ ପ୍ରତିନିଧିତ୍ୱକୁ ବିଜେଡ଼ି ଅଗ୍ରାଧିକାର ଦେଇଆସୁଛି । ହେଲେ କେନ୍ଦ୍ରସରକାର ଏହାକୁ ନେଇ ନିଜର ପ୍ରତିଶ୍ରୁତି ରକ୍ଷା କରୁନାହାଁନ୍ତି ବୋଲି ଅଭିଯୋଗ କରିଛନ୍ତି ସସ୍ମିତ୍ । ସେହିପରି ବିଜେଡ଼ି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବି କେନ୍ଦ୍ର ନିକଟରେ ବାରମ୍ବାର ଏ ସମ୍ପର୍କରେ ଦାବି କରିଆସୁଛନ୍ତି । ସୂଚନା ମୁତାବକ ଗତ ୨୦୧୯ରେ ମୁଖ୍ୟମନ୍ତ୍ରୀ ୩୩ପ୍ରତିଶତ ଲୋକସଭା ଟିକେଟ୍ ମହିଳାଙ୍କୁ ଦେଇ ଐତିହାସିକ ପଦକ୍ଷେପ ନେଇଥିଲେ । ସେହିପରି ବିଜେଡ଼ି ପ୍ରତିନିଧି ମଣ୍ଡଳ ବିଭିନ୍ନ ରାଜନୈତିକ ଦଳଙ୍କୁ ବୁଝାଇ ସମର୍ଥନ ବି ମାଗିଥିଲେ । ବିଜେଡ଼ିର ଏହି ପଦକ୍ଷେପକୁ ଅନେକ ରାଜନୈତିକ ଦଳ ସମର୍ଥନ ବି କରିଥିଲେ । ହେଲେ ଏଯାବତ୍ ମହିଳା ସଂରକ୍ଷଣ ବିଲ୍ ପାସ୍ ହୋଇପାରିଲାନି ବୋଲି ଅଭିଯୋଗ କରିଛି ବିଜେଡ଼ି । ତେଣୁ ତୁରନ୍ତ ମହିଳା ସଂରକ୍ଷଣ ବିଲ୍ ପାରିତ ନେଇ ରାଜ୍ୟସଭାରେ ଦାବି ଦୋହରାଇଛନ୍ତି ବିଜୁ ଜନତା ଦଳ ସାଂସଦ ସସ୍ମିତ୍ ପାତ୍ର । ଏହାଦ୍ୱାରା ଦେଶକୁ ସଶକ୍ତ ମହିଳା ପ୍ରତିନିଧି ମିଳିବା ସହ ୬୬କୋଟି ମହିଳାଙ୍କ ସ୍ୱପ୍ନ ପୂରଣ ହେବ ବୋଲି ସେ କହିଛନ୍ତି ।