ମଣିପୁର ଭିଡ଼ିଓ ଭାଇରାଲ ଘଟଣା: ସପ୍ତମ ଅଭିଯୁକ୍ତ ଗିରଫ

ବହୁ ଚର୍ଚ୍ଚିତ ମଣିପୁର ଭିଡ଼ିଓ ଭାଇରାଲ ମାମଲାରେ ସମ୍ପୃକ୍ତ ଆଉଜଣେ ଅଭିଯୁକ୍ତକୁ ଆଜି ଗିରଫ କରିଛି ପୋଲିସ । ଗତକାଲିର ଗିରଫଦାରୀକୁ ମିଶାଇ ଜଣେ ନାବାଳକଙ୍କ ସମେତ ଏହି ଘଟଣାରେ ଲିପ୍ତ ଥିବା ୭ଜଣଙ୍କୁ ଏଯାବତ୍ ଗିରଫ କରାଯାଇସାରିଲାଣି । ଏହି ମାମଲାରେ ସମ୍ପୃକ୍ତ ଥିବା ଅନ୍ୟମାନଙ୍କୁ ଗିରଫ କରିବାକୁ ମଣିପୁର ପୋଲିସ ଦୈନିକ ତଲାସି ଜାରି ରଖିଛି । ଗତରାତିରେ ସପ୍ତମ ଅଭିଯୁକ୍ତଙ୍କୁ ଥୌବାଲ ଜିଲ୍ଲାରୁ ଗିରଫ କରାଯାଇଥିବା କଥା ପୋଲିସ ଅଧିକାରୀମାନେ କହିଛନ୍ତି । ଆଜି ସପ୍ତମ ଗିରଫଦାରି ଖବରକୁ ସୁନିଶ୍ଚିତ କରି ମଣିପୁର ପୋଲିସ ଟୁଇଟ୍ କରି କହିଛି ଯେ, ଭାଇରାଲ ଭିଡ଼ିଓ ମାମଲାରେ ଜଣେ ନାବାଳକଙ୍କ ସମେତ ମୋଟ୍ ୭ଜଣ ଅଭିଯୁକ୍ତଙ୍କୁ ଗିରଫ କରାଗଲାଣି । ଭିଡ଼ିଓଟି ହେଉଛି ମେ’ ୪ତାରିଖ ଦିନ ୨ଜଣ ମହିଳାଙ୍କୁ ଉଲଗ୍ନ କରି ବାଟ ଚଲାଇବାର ଘଟଣା । ସୂଚନା ମୁତାବକ, ମଣିପୁରର କାଙ୍ଗକୋପି ଜିଲ୍ଲା ଅନ୍ତର୍ଗତ ବି ଫାଇନୋମ୍ ଗାଁ ନିକଟ ରାଜପଥରେ ‘କୁକି-ଜୋମି’ ସମ୍ପ୍ରଦାୟର ୨ଜଣ ମହିଳାଙ୍କୁ ଉଲଗ୍ନ କରାଯିବା ସହ ଯୌନ ଉତ୍ପୀଡନ ଦେଇ ରାସ୍ତାରେ ବୁଲାଯାଇଥିଲା । ପରେ ଏହାର ଭିଡ଼ିଓ ସାମାଜିକ ଗଣମାଧ୍ୟମରେ ଗତ ବୁଧବାର ଭାଇରାଲ ହେବାପରେ ଦେଶବ୍ୟାପୀ ତୀବ୍ର ପ୍ରତିକ୍ରିୟା ଦେଖାଦେଇଛି । ଘଟଣାଟି ମେ’ ୪ତାରିଖରେ ଘଟିଥିଲା । ସେଦିନ ଅପରାହ୍ନ ପ୍ରାୟ ୩ଟା ବେଳେ ୮ଶହରୁ ୧ହଜାର ଦୁର୍ବୁତ୍ତ ଅସ୍ତ୍ରଶସ୍ତ୍ର ଧରି ବି ଫାଇନୋମ୍ ଗାଁରେ ପ୍ରବେଶ କରିଥିଲେ । ପରେ ଏହି ଘଟଣା ଦେଶବ୍ୟାପୀ ଆଲୋଡ଼ନ ସୃଷ୍ଟି କରିବା ସହ ଏହା ବିରୋଧରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା । ପରେ ପୋଲିସ ତତ୍ପର ହୋଇ ତଲାସ ଆରମ୍ଭ କରି ଜୁଲାଇ ୨୦ତାରିଖଦିନ ପ୍ରଥମ ଅଭିଯୁକ୍ତଙ୍କୁ ଗିରଫ କରିଥିଲା । ପରେ ସେଦିନ ଆଉ ୩ଜଣ ଅଭିଯୁକ୍ତଙ୍କୁ ମଧ୍ୟ ଗିରଫ କରାଯାଇଥିଲା ।