ଜ୍ଞାନବ୍ୟାପୀ ମସଜିଦର ସର୍ଭେ ଆରମ୍ଭ

କଡ଼ାସୁରକ୍ଷା ବଳୟ ମଧ୍ୟରେ ଆଜିଠାରୁ ଆରମ୍ଭ ହୋଇଛି ବାରଣାସୀସ୍ଥିତ ଜ୍ଞାନବ୍ୟାପୀ ମସଜିଦର ସର୍ଭେ । ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ବା ‘ଏଏସଆଇ’ର ଏକ ଟିମ୍ ଉତ୍ତରପ୍ରଦେଶରେ ଥିବା ଏହି ମସଜିଦର ବୈଜ୍ଞାନିକ ସର୍ବେକ୍ଷଣ ଆରମ୍ଭ କରିଛି । ସୂଚନା ମୁତାବକ, ମସଜିଦ୍ ସର୍ବେକ୍ଷଣ ପାଇଁ ଅନୁମତି ଦେଇଥିବା ବାରଣାସୀ ଡିଷ୍ଟ୍ରିକ୍ଟ କୋର୍ଟଙ୍କ ଆଦେଶ ବିରୋଧରେ ମସଜିଦ୍ ପରିଚାଳନା କମିଟି ସୁପ୍ରିମକୋର୍ଟରେ ଦାଖଲ କରିଥିଲା ଏକ ପିଟିସନ୍ । ପରେ ସର୍ଭେ କରାଯାଉଛି ବୋଲି ଏ ସମ୍ପର୍କରେ ଲୋକେ ସୂଚନା ପାଇଥିବା କହିଛନ୍ତି । ଆବଶ୍ୟକ ଉପକରଣ ଧରି ରବିବାର ଏଏସଆଇ ଟିମ୍ ବାରଣାସୀରେ ପହଞ୍ଚିଥିଲେ । ହେଲେ ସିଲ୍ କରାଯାଇଥିବା ୱାଜୁଖାନା ଅଞ୍ଚଳକୁ ଛାଡ଼ି ‘ଏଏସଆଇ’ ଜ୍ଞାନବ୍ୟାପୀ ମସଜିଦ୍ ପରିସରରେ ସର୍ଭେ କରିପାରିବ ବୋଲି ଅଦାଲତ ରାୟ ପ୍ରକାଶ କରିଥିଲେ । ହିନ୍ଦୁଙ୍କ ପକ୍ଷରୁ ପ୍ରତିନିଧିତ୍ୱ କରୁଥିବା ଆଇନଜୀବୀ ସାମ୍ବାଦିକମାନଙ୍କୁ କହିଛନ୍ତି, ହିନ୍ଦୁ ଓ ମୁସଲମାନ ପ୍ରତିନିଧିଙ୍କ ସମେତ ‘ଏଏସଆଇ’ର ୩୦ଜଣିଆ ଟିମ୍ ଏବେ ଏହି ମସଜିଦରେ ଉପସ୍ଥିତ ଅଛନ୍ତି । ଆମେ ସୁନିଶ୍ଚିତ, ସମଗ୍ର ମସଜିଦ୍ ପରିସର ହେଉଛି ମନ୍ଦିରର । ତେଣୁ ସର୍ଭେ ଫଳାଫଳ ନିଶ୍ଚିତ ଭାବେ ହିନ୍ଦୁମାନଙ୍କୁ ସୁହାଇବ ବୋଲି କହିଛନ୍ତି ଆଇନଜୀବୀ ।