ଆୟର୍ଲାଣ୍ଡରେ ଘର କିଣିଲେ ସରକାର ଦେବେ ୭୧ ଲକ୍ଷ

ନିରପେକ୍ଷ ବ୍ୟୁରୋ :ସମଗ୍ର ବିଶ୍ୱରେ ଏବେ ଜନସଂଖ୍ୟା ବୃଦ୍ଧି ମୁଖ୍ୟ ସମସ୍ୟା ଭାବେ ଉଭା ହୋଇଛି । ହେଲେ ଆୟର୍ଲାଣ୍ଡ ସରକାର କିନ୍ତୁ ନିଜ ଦେଶର ଜନସଂଖ୍ୟା ବୃଦ୍ଧି ପାଇଁ ଆରମ୍ଭ କରିଛନ୍ତି ନୂଆ ଯୋଜନା । ଯିଏ ଏଠାରେ ସମ୍ପତ୍ତି କିଣିବ ସ୍ଥାନୀୟ ସରକାରଙ୍କ ପକ୍ଷରୁ ତା’କୁ ମିଳିବ ୭୧ଲକ୍ଷ ଟଙ୍କା । ଏହି ଯୋଜନାର ମୂଳ ଉଦ୍ଦେଶ୍ୟ ହେଉଛି ଆୟର୍ଲାଣ୍ଡର ୩୦ ଦ୍ୱୀପପୁଞ୍ଜରେ ପରିତ୍ୟକ୍ତ ସମ୍ପତ୍ତିର ବ୍ୟବହାର ଏବଂ ପୁନଃରୁଦ୍ଧାର କରିବା । ଏହି ଯୋଜନା ଜୁଲାଇ ପହିଲାରୁ ଆରମ୍ଭ ହୋଇଛି । ଯୋଜନା ନିମନ୍ତେ ୩୦ଅଗଷ୍ଟ ପର୍ଯ୍ୟନ୍ତ ପଞ୍ଜୀକରଣ କରାଯାଇପାରିବ । ସେହିପରି ଯେଉଁମାନଙ୍କର ଆୟର୍ଲାଣ୍ଡ୍ ଭିସା ଅଛି ସେମାନେ ପଞ୍ଜୀକରଣ କରିପାରିବେ ।

ତେବେ ଏହି ଯୋଜନା ପାଇଁ ସର୍ବନିମ୍ନ ବୟସ ସୀମା ୧୮ବର୍ଷ ରଖାଯାଇଛି । କାଗଜପତ୍ର ଭାବେ ପାସପୋର୍ଟ, ଭିସା, ବୟସ ପ୍ରମାଣପତ୍ର, ଶିକ୍ଷାଗତ ଯୋଗ୍ୟତା, ମୂଳ ଠିକଣା, ଆୟ, କାର୍ଯ୍ୟ ଦକ୍ଷତା ଏବଂ ଆଇଡ଼ି ପ୍ରମାଣପତ୍ର ଆଦି ଜରୁରୀ । ତଥାପି ଏହି ଯୋଜନାରେ କିଛି ସର୍ତ୍ତ ମଧ୍ୟ ରହିଛି । ଯୋଜନାର ଲାଭ ଉଠାଇବାକୁ ଆପଣଙ୍କୁ ଆୟର୍ଲାଣ୍ଡର ଦ୍ୱୀପପୁଞ୍ଜରେ ଏକ ସମ୍ପତ୍ତି କିଣିବାକୁ ପଡିବ । ଏହା ୧୯୯୩ ପୂର୍ବରୁ ନିର୍ମିତ ଏବଂ ଅତି କମରେ ୨ବର୍ଷ ପାଇଁ ଖାଲିଥିବା ଏକ ସମ୍ପତ୍ତି ହେବା ଉଚିତ୍ । ଏହି ଯୋଜନାରେ ପ୍ରାୟ ୭୧ଲକ୍ଷ ଟଙ୍କା ଘର ମରାମତି, ସାଜସଜ୍ଜାରେ ବ୍ୟବହାର କରାଯାଇପାରିବ ବୋଲି ଜଣାପଡ଼ିଛି ।