ମହାରାଷ୍ଟ୍ର ମହାନାଟକର ଅନ୍ତ

ଅଜିତ୍ ପାୱାରଙ୍କୁ ମିଳିଲା ଅର୍ଥ ବିଭାଗ

ନିରପେକ୍ଷ :ଦୀର୍ଘ ଦିନର ନାଟକ ପରେ ମହାରାଷ୍ଟ୍ର ରାଜନୀତିରେ ପଡ଼ିଛି ପୂର୍ଣ୍ଣଚ୍ଛେଦ । ଶିବସେନା-ବିଜେପି ସରକାରରେ ସାମିଲ ହୋଇଥିବା ଏନସିପି ନେତା ଅଜିତ୍ ପାୱାରଙ୍କୁ ମିଳିଛି ଗୁରୁତ୍ୱପୂର୍ଣ୍ଣ ଅର୍ଥ ବିଭାଗ । ଗତ ମାସରେ ଉପମୁଖ୍ୟମନ୍ତ୍ରୀ ଭାବେ ଶପଥଗ୍ରହଣ କରି ଦଳର ମୁଖ୍ୟ ତଥା ନିଜ ଦାଦା ଶରଦ ପାୱାରଙ୍କ ବିରୋଧରେ କରିଥିଲେ ବିଦ୍ରୋହ । ପରେ ଅଜିତଙ୍କ ଉପମୁଖ୍ୟମନ୍ତ୍ରୀ ପଦକୁ ନେଇ ଉଠିଥିଲା ବିବାଦ । ଏହାପରେ ଲାଗିରହିଥିବା ବିବାଦରେ ପଡ଼ିଛି ପୂର୍ଣ୍ଣଚ୍ଛେଦ ଓ ଅଜିତ୍ ଙ୍କୁ ମିଳିଛି ରାଜ୍ୟ ରାଜକୋଷର ଚାବିକାଠି । ସେହିପରି ରାଜ୍ୟ କ୍ୟାବିନେଟରେ ସ୍ଥାନ ପାଇଥିବା ୮ଜଣ ଏନସିପି ବିଧାୟକଙ୍କୁ ଶେଷରେ ସେମାନଙ୍କର ବିଭାଗ ବଣ୍ଟନ କରାଯାଇଛି ।

ଯୋଜନା ବିଭାଗ ବ୍ୟତୀତ ରାଜ୍ୟସରକାରଙ୍କ ଗୁରୁତ୍ୱପୂର୍ଣ୍ଣ ଅର୍ଥ ବିଭାଗ ସମ୍ଭାଳିବେ ଅଜିତ୍ ପାୱାର । ସେହିପରି ଛଗନ ଭୁଜବଳ ଖାଦ୍ୟ ଯୋଗାଣ ଓ ଖାଉଟି ସୁରକ୍ଷା ବିଭାଗର ଦାୟୀତ୍ୱ ତୁଲାଇବେ । ସୂଚନା ମୁତାବକ ଶରଦ ପାୱାରଙ୍କ ନେତୃତ୍ୱାଧୀନ ଏନସିପିରେ ବିଭାଜନ ଏବଂ ପରେ ଗତମାସରେ ଏହି ୯ଜଣ ବିଧାୟକଙ୍କୁ ଶିବସେନା-ବିଜେପି ସରକାରରେ ସାମିଲ କରାଯାଇଛି । ପରେ ମନ୍ତ୍ରୀମଣ୍ଡଳରେ ହୋଇଛି ଆବଣ୍ଟନ । ଅପରପକ୍ଷରେ ମନ୍ତ୍ରୀମଣ୍ଡଳ ସମ୍ପ୍ରସାରଣ ପରେ ବିଭାଗ ବଣ୍ଟନକୁ ନେଇ ଜୋରଦାର ବିତର୍କ ଆରମ୍ଭ ହୋଇଥିବା ବେଳେ ମେଣ୍ଟର କିଛି ପୁରୁଣା ସଦସ୍ୟଙ୍କ ମଧ୍ୟରେ ଦେଖାଦେଇଛି ଅସନ୍ତୋଷ । ଶିବସେନା ମୁଖପାତ୍ର କହିଛନ୍ତି, ମନ୍ତ୍ରୀମଣ୍ଡଳ ସମ୍ପ୍ରସାରଣ ଓ ବିଭାଗ ବଣ୍ଟନ ହେବା ନିଶ୍ଚିତ, ଏହା କେବଳ ସମୟର କଥା ଥିଲା । ତେବେ ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା ଗୋଷ୍ଠୀ ମନ୍ତ୍ରୀ ପଦ ପାଇଁ ପ୍ରତିଦ୍ୱନ୍ଦୀତା କରୁଥିବା ବିଧାୟକଙ୍କ ସଂଖ୍ୟାକୁ ନେଇ ଏବେ ଚିନ୍ତାରେ ପଡିଛନ୍ତି ।

ବାସ୍ତବ ପଦବୀରେ ଅସନ୍ତୁଳନକୁ ଦୃଷ୍ଟିରେ ରଖି ମନ୍ତ୍ରୀମଣ୍ଡଳ ସମ୍ପ୍ରସାରଣ ପରେ ସୁରୁଖୁରୁରେ ଚାଲିବ ବୋଲି ସନ୍ଦେହ ପ୍ରକାଶ ପାଇଛି । ସେହିପରି ମହାରାଷ୍ଟ୍ର ବିଧାନ ପରିଷଦରେ ବିରୋଧୀ ଦଳ ନେତା ଅମ୍ବେଦାସ ଦାନଭେ କହିଛନ୍ତି, ବିଜେପି କର୍ମୀଙ୍କ ମଧ୍ୟରେ ବହୁ ଅସନ୍ତୋଷ ରହିଛି । ୩ଦଳର ବିଧାୟକଙ୍କ ଆଶା ପୂରଣ କରିବା ଅତ୍ୟନ୍ତ କଷ୍ଟକର ବ୍ୟାପାର । ମନ୍ତ୍ରୀମଣ୍ଡଳ ସମ୍ପ୍ରସାରଣରେ ଶିବସେନାର ଏକନାଥ ସିନ୍ଦେଙ୍କ ନେତୃତ୍ୱାଧୀନ ଗୋଷ୍ଠୀର ସମ୍ଭାବ୍ୟ ଅବହେଳାକୁ ନେଇ ମଧ୍ୟ ଶ୍ରୀ ଦାନଭେ ପ୍ରଶ୍ନ ଉଠାଇଛନ୍ତି । ଯାହାକୁ ନେଇ ଶିବସେନା ଉଦ୍ଧବ ନେତା ସଞ୍ଜୟ ରାଉତ ଚିନ୍ତା ପ୍ରକଟ କରିଛନ୍ତି । ତେଣୁ ଆଗକୁ ମହାରାଷ୍ଟ୍ର ରାଜନୀତିରେ ଏହା ଅନ୍ତିମ ବିବାଦ ନା ଭବିଷ୍ୟତରେ ପୁଣି ଏକ ବିବାଦ ମୁଣ୍ଡ ଟେକିବ ତାହା ଉପରେ ଏବେ ସଭିଁଙ୍କ ନଜର ।