ନିରପେକ୍ଷ(ବ୍ୟୁରୋ) : ଭାରତରେ ଦେଖାଦେଇଛି ଆର୍ôଥକ ମାନ୍ଦାବସ୍ଥା । ଦେଶରେ ନିତ୍ୟ ବ୍ୟବହୃତ ସାମଗ୍ରୀର ଦର ଏବେ ଆକାଶଛୁଆଁ । ହୁହୁ ହୋଇ ବଢିଚାଲିଛି ଅତ୍ୟାବଶ୍ୟକୀୟ ପେଟ୍ରୋଲର ଦର । ହେଲେ ଖୁବଶୀଘ୍ର ପେଟ୍ରୋଲ ଲିଟର ହେବ ୧୫ଟଙ୍କା । ଏଭଳି କହିଛନ୍ତି, କେନ୍ଦ୍ର ସଡ଼କ ପରିବହନ ମନ୍ତ୍ରୀ ନିତୀନ ଗଡ଼କରୀ । ଆଜି ରାଜସ୍ଥାନର ଉଦୟପୁରରେ ଆୟୋଜିତ ଏକ ସଭାରେ ଏଭଳି ମନ୍ତବ୍ୟ ଦେଇଛନ୍ତି ଗଡକରୀ । ପରେ ସେ କେନ୍ଦ୍ର ସରକାରଙ୍କ ଅନେକ ଯୋଜନା ବିଷୟରେ କହିବା ସହ ଆଗାମୀ ନିର୍ବାଚନରେ ପୁଣିଥରେ ବିଜେପି ସରକାରଙ୍କୁ ସମର୍ଥନ କରିବାକୁ ଆହ୍ୱାନ କରିଛନ୍ତି । ଉଦୟପୁରରେ ଗଡ଼କରୀ ୫ହଜାର ୬୨୫ କୋଟି ଟଙ୍କାର ୧୧ଟି ରାଜମାର୍ଗର ଶିଳାନ୍ୟାସ ବି କରିଥିଲେ ।
ଏହାସହ ସେ କଂଗ୍ରେସ ସରକାରଙ୍କ ୬୦ବର୍ଷର ବିଫଳତାର କାହାଣୀ ମଧ୍ୟ ବଖାଣିଛନ୍ତି । ନୀତିନ ଗଡକରୀ ତାଙ୍କ ଅଭିଭାଷଣରେ କହିଛନ୍ତି, ବର୍ତ୍ତମାନ କୃଷକ କେବଳ ଖାଦ୍ୟ ଯୋଗାଣକାରୀ ନୁହଁନ୍ତି ବରଂ ଆଗକୁ ଶକ୍ତି ଯୋଗାଣକାରୀ ମଧ୍ୟ ସାବ୍ୟସ୍ତ ହେବ । ଇଥାନଲ ଓ ସୌର ଉର୍ଜ୍ଜା ଉତ୍ପାଦନ କରି ଶକ୍ତି ଯୋଗାଣ ହୋଇପାରିବ । ଅଗଷ୍ଟରେ ଏକ ନିର୍ଦ୍ଦିଷ୍ଟ କମ୍ପାନୀର ଗାଡି ଲଞ୍ଚ୍ ହୋଇଛି । ଆଉ ସେହି ଗାଡିଗୁଡିକ ଚାଷୀଙ୍କ ଦ୍ୱାରା ପ୍ରସ୍ତୁତ ଇଥାନଲରେ ଚାଲିବ ।
୬୦ପ୍ରତିଶତ ଇଥାନଲ, ୪୦ପ୍ରତିଶତ ବିଦ୍ୟୁତ୍ ନିଆଗଲେ ହାରାହାରି ୧୫ଟଙ୍କାରେ ବିକ୍ରି ହୋଇପାରିବ ପେଟ୍ରୋଲ । ଏହାଦ୍ୱାରା ୧୬ଲକ୍ଷ କୋଟି ଟଙ୍କା ଆମଦାନୀ ହେବା ସହ ଉକ୍ତ ଟଙ୍କା କୃଷକଙ୍କ କାମରେ ବି ଲାଗିବ । ବାହାନର ଉଦ୍ୟୋଗ କାରବାରକୁ ଦ୍ୱିଗୁଣିତ କରି ୧୫ଲକ୍ଷ କୋଟି ଟଙ୍କା କରିବା ବିଜେପି ସରକାରଙ୍କ ମୂଳ ଉଦ୍ଦେଶ୍ୟ । ଏପରିକ୍ଷେତ୍ରରେ ଏବେ ବାହାନ ଉଦ୍ୟୋଗ କାରବାର ହେଉଛି ୭.୫ଲକ୍ଷ କୋଟି ଟଙ୍କା । ଏହି କାରବାର ପାଇଁ ୪ଲକ୍ଷ କୋଟି ଲୋକଙ୍କୁ ରୋଜଗାର ବି ମିଳିଛି ବୋଲି କହିଛନ୍ତି କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ । ଏଥିପାଇଁ ଉଦ୍ୟୋଗ ସରକାରଙ୍କୁ ସବୁଠାରୁ ଅଧିକ ସେବାକର ଉପଲବ୍ଧ କରାଉଛି । ଯାହାଫଳରେ ଆଗାମୀ ଦିନରେ ଏହି ବ୍ୟବସାୟକୁ ବୃଦ୍ଧି କରାଯାଇ ୧୫ଲକ୍ଷ କୋଟି କାରବାରରେ ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି ।
