ମେଟ୍ରୋ ଟ୍ରେନରେ ଦିଲ୍ଲୀ ବିଶ୍ୱବିଦ୍ୟାଳୟ ଗଲେ ପ୍ରଧାନମନ୍ତ୍ରୀ ମୋଦି

ନିରପେକ୍ଷ (ବ୍ୟୁରୋ/ନୂଆଦିଲ୍ଲୀ)30/୦୬: ଦିଲ୍ଲୀ ବିଶ୍ୱବିଦ୍ୟାଳୟର ଶତବାର୍ଷିକୀ ସମାବର୍ତ୍ତନ ଉତ୍ସବରେ ଯୋଗଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମୁଖ୍ୟ ଅତିଥି ଭାବେ ଯୋଗ ଦେବା ପାଇଁ ଆଜି ମେଟ୍ରୋ ଟ୍ରେନ୍‌ ଚଢ଼ି ଦିଲ୍ଲୀ ବିଶ୍ବବିଦ୍ୟାଳୟକୁ ଯାଇଛନ୍ତି। ପ୍ରଧାନମନ୍ତ୍ରୀ ମୋଦୀଙ୍କ ମେଟ୍ରୋ ଟ୍ରେନ୍‌ ଯାତ୍ରାକାଳୀନ ଦୃଶ୍ୟ ଏବେ ସାମାଜିକ ଗଣମାଧ୍ୟମରେ ସମ୍ପ୍ରସାରିତ ହେଉଛି। ସେଥିରେ ଦେଖାଯାଉଛି, ପ୍ରଧାନମନ୍ତ୍ରୀ ମୋଦୀ ‘ଡିଏମ୍‌ଆର୍‌ସି’ର ସାଧାରଣ ନାଗରିକମାନଙ୍କ ନିମନ୍ତେ ଉଦ୍ଦିଷ୍ଟ ନୀତିନିୟମ ମାନୁଛନ୍ତି। ମେଟ୍ରୋରେ ଯାଉଥିବା ସହଯାତ୍ରୀଙ୍କ ସହିତ କଥାବାର୍ତ୍ତା ମଧ୍ୟ କରୁଛନ୍ତି।

ମେଟ୍ରୋରେ ତରୁଣ ସହଯାତ୍ରୀଙ୍କ ସହିତ ବସି ଦିଲ୍ଲୀ ବିଶ୍ବବିଦ୍ୟାଳୟକୁ ଯାତ୍ରା କରିଥିବାରୁ ଅତ୍ୟନ୍ତ ଆନନ୍ଦିତ ବୋଲି ବ୍ୟକ୍ତ କରି ପ୍ରଧାନମନ୍ତ୍ରୀ ତାଙ୍କ ‘ଟ୍ବିଟର୍‌ ପ୍ରୋଫାଇଲ୍‌’ରେ ଉକ୍ତ ଯାତ୍ରାକାଳୀନ ଫଟୋ ସେୟାର୍‌ କରିଛନ୍ତି। ଆଜି ଦିଲ୍ଲୀ ବିଶ୍ବବିଦ୍ୟାଳର ନର୍ଥ କ୍ୟାମ୍ପ୍‌ସ୍‌ରେ ପ୍ରଧାନମନ୍ତ୍ରୀ ମୋଦୀ ୩ଟି ଅଟ୍ଟାଳିକା ନିର୍ମାଣ ପାଇଁ ଶିଳାନ୍ୟାସ କରିବା ସହିତ ଗୋଟାଏ ସେଟ୍‌ ‘କଫି ଟେବଲ୍‌ ବୁକ୍‌’ ଉନ୍ମୋଚନ କରିବେ। ବିଶ୍ବବିଦ୍ୟାଳୟ ପରିସରରେ ନିର୍ମାଣ ହେବାକୁ ଥିବା ଏହି ଅଟ୍ଟାଳିକା ସବୁ ଗୋଟାଏ କମ୍ପ୍ୟୁଟର୍‌ ସେଣ୍ଟର୍‌ ଓ ଏକାଡେମିକ୍‌ ବ୍ଲକ୍‌ର ପ୍ରଯୁକ୍ତିବିଦ୍ୟା ଅଧ୍ୟାପକମାନଙ୍କ ପାଇଁ ଉଦ୍ଦିଷ୍ଟ। ଅତ୍ୟାଧୁନିକ ଭିତ୍ତିଭୂମି ସହିତ ଏହି ୭+୧ ମହଲାବିଶିଷ୍ଟ ଅଟ୍ଟାଳିକା ସବୁ ନିର୍ମାଣ କରାଯିବ।