ବଢୁଛି ନକଲି ଦୁଗ୍ଧ କାରବାର; ସାରା ଦେଶରେ ହେବ ଯାଞ୍ଚ

ସାରା ଦେଶର ଯାଞ୍ଚ ହେବ ଦୁଗ୍ଧ-ଦୁଗ୍ଧଜାତ ସାମଗ୍ରୀ ବା ଦ୍ରବ୍ୟର ଗୁଣବତ୍ତା । କ୍ଷୀରରେ ଅପମିଶ୍ରଣ ରୋକିବା ପାଇଁ ଖାଦ୍ୟ ସୁରକ୍ଷା ଓ ମାନକ ପ୍ରାଧିକରଣ ଦେଶବ୍ୟାପୀ ଏହି ଗୁଣବତ୍ତା ଯାଞ୍ଚ ମିଶନ ଆରମ୍ଭ କରିବାକୁ ଯାଉଛି । କ୍ଷୀର ପ୍ରକ୍ରିୟାକରଣ ବ୍ୟବସାୟ କରୁଥିବା ବିଭିନ୍ନ ସଂସ୍ଥା ଓ ଗ୍ରାମାଞ୍ଚଳର ଫାର୍ମରୁ ନମୂନା ସଂଗ୍ରହ କରାଯାଇ ଏହି ଯାଞ୍ଚ କରାଯିବା ନେଇ ପ୍ରକ୍ରିୟା ଆରମ୍ଭ ହୋଇଛି ।FSSAI ର ଏକାଧିକ ଟିମ ଏହି କାର୍ଯ୍ୟରେ ନିୟୋଜିତ ହେବେ । ପ୍ରାୟ ସମସ୍ତ ଜିଲ୍ଲାରୁ କ୍ଷୀର ଓ କ୍ଷୀରଜାତ ସାମଗ୍ରୀର ନମୂନା ସଂଗ୍ରହ କରାଯିବ । କ୍ଷୀର, ଛେନା, ପନିର, ଘିଅ, ଲହୁଣି, ଦହି ଓ କ୍ଷୀର ପ୍ରସ୍ତୁତ ଆଇସକ୍ରିମର ନମୂନା ସଂଗ୍ରହ କରି ଏହି ଟିମ ଲ୍ୟାବକୁ ପଠାଇବ ।

ଖାଦ୍ୟ ସୁରକ୍ଷା ଓ ଗୁଣବତ୍ତା ସମ୍ପର୍କରେ ଏହି ଅଭିଯାନ ଆରମ୍ଭ କରାଯାଉଥିବା ଫାସି କହିଛି । କ୍ଷୀର ଓ କ୍ଷୀରଜାତ ସମସ୍ତ ସାମଗ୍ରୀର ବ୍ୟବହାର ବହୁଳ ଭାବେ ଭାରତୀୟ ସମାଜରେ ହୋଇଥାଏ ।
। ତେଣୁ ଏହାର ମାନ ପରୀକ୍ଷା କରାଯିବା ନେଇ ପ୍ରକ୍ରିୟା ଆରମ୍ଭ କରାଯାଇଥିବା ସଂସ୍ଥା କହିଛି ।2018 ରେ ମଧ୍ୟ FSSAI ଏପରି ଅଭିଯାନ ଦେଶବ୍ୟାପି କରିଥିଲା । ବିଭିନ୍ନ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରୁ ମୋଟ 6,432 ସଂଗ୍ରହ କରାଯାଇ ଲ୍ୟାବରେ ଏହାର ମାନ ଯାଞ୍ଚ କରାଯାଇଥିଲା । ଦେଶର ମୋଟ 1103 ସହର ଓ ଜିଲ୍ଲାରୁ ଏହି ନମୂନା ସଂଗ୍ରହ କରିଥିଲା ପ୍ରାଧିକରଣ । ଯେଉଁ ସହରର ଲୋକସଂଖ୍ୟା 50 ହଜାର ଉପରେ ସେହି ସହରରେ ଏହି ସାମଗ୍ରୀର ଗୁଣବତ୍ତା ଯାଞ୍ଚକୁ ଅଧିକ ପ୍ରାଥମିକତା ଦିଆଯାଇଥିଲା । ସେହିପରି 2020 ରେ ପାନ-ଇଣ୍ଡିଆ ମିଲ୍କ ପ୍ରଡକ୍ଟ ସର୍ଭେ ମଧ୍ୟ କରାଯାଇଥିଲା । ଏଥିରେ ମୋଟ 542 ଜିଲ୍ଲାରୁ କ୍ଷୀରଜାତ ଦ୍ରବ୍ୟର ନମୂନା ସଂଗ୍ରହ କରାଯାଇ ଗୁଣବତ୍ତା ପରୀକ୍ଷା କରାଯାଇଥିଲା ।