ପରଲୋକରେ ଆୟୁଷ୍ମାନ ଖୁରାନାଙ୍କ ବାପା

ପ୍ରତିଷ୍ଠିତ ଜ୍ୟୋତିଶାଚାର୍ଯ୍ୟ ତଥା ପି ଖୁରାନାଙ୍କର ଆଜି ସକାଳେ ଚଣ୍ଡିଗଡ଼ରେ ଦେହାନ୍ତ ହୋଇଛି। ବଲିଉଡ ଅଭିନେତା ଆୟୁଷ୍ମାନ ଖୁରାନାଙ୍କ ବାପା ଥିଲେ ପି ଖୁରାନା। ଦେହାନ୍ତ ପରେ ଆଜି ସନ୍ଧ୍ୟା ପ୍ରାୟ ୫.୩୦ରେ ତାଙ୍କର ଅନ୍ତିମସଂସ୍କାର କରାଯିବ। ଚଣ୍ଡିଗଡ଼ର ମଣିମାଜରା ଶ୍ମଶାନରେ ତାଙ୍କ ଅନ୍ତିମ ସଂସ୍କାର କରାଯିବ ବୋଲି ଜଣାପଡିଛି । ୨ଦିନ ଧରି ତାଙ୍କର ପଞ୍ଜାବର ମୋହାଲିସ୍ଥିତ ଫୋର୍ଟିସ୍ ହସ୍ପିଟାଲରେ ହୃଦ୍‌ରୋଗ ଯୋଗୁଁ ଚିକିତ୍ସା ଚାଲିଥିଲା। ହେଲେ ଆଜି ଚିକିତ୍ସାଧୀନ ଅବସ୍ଥାରେ ତାଙ୍କର ଦେହାନ୍ତ ହୋଇଛି।

ଆୟୁଷ୍ମାନଙ୍କ ଭାଇ ଅପାରଶକ୍ତି ଖୁରାନାଙ୍କ ମୁଖପାତ୍ର ଏ ସମ୍ପର୍କରେ ଏକ ବିବୃତି ଜାରି କରି କହିଛନ୍ତି ଯେ, ପିତାଙ୍କ ଆଜି ସକାଳ ୧୦.୩୦ ସମୟରେ ମୋହାଲିରେ ଦେହାନ୍ତ ହୋଇଛି। ସେ ଦୀର୍ଘ ସମୟ ଧରି ଏକ ଗମ୍ଭୀର ରୋଗରେ ପୀଡିତ ଥିଲେ। ଏଭଳି ଦୁଃଖର ସମୟରେ ଆମେ ଆପଣଙ୍କର ପ୍ରାର୍ଥନା ଏବଂ ପରିବାରକୁ ଦେଇଥିବା ସମର୍ଥନ ପାଇଁ କୃତଜ୍ଞ |