ଲୁଧିଆନା କାରଖାନାରେ ଗ୍ୟାସ୍ ଲିକ୍‌: ୯ ମୃତ, ୧୧ ଅସୁସ୍ଥ

ପଞ୍ଜାବର ଲୁଧିଆନା ଅନ୍ତର୍ଗତ ଗିଆସ୍‌ପୁରା ଅଞ୍ଚଳର ଏକ କାରଖାନାରେ ଆଜି ଗ୍ୟାସ୍ ଲିକ୍ ହେବାରୁ ୯ଜଣଙ୍କର ଜୀବନ ଚାଲିଯାଇଛି । ମୃତକଙ୍କ ସଂଖ୍ୟା ଆଗକୁ ବଢିପାରେ ବୋଲି ଆଶଙ୍କା କରାଯାଉଥିବା ବେଳେ ୧୧ଜଣଙ୍କୁ ଅସୁସ୍ଥ ଅବସ୍ଥାରେ ଉଦ୍ଧାର କରାଯାଇଛି । ପ୍ରଭାବିତ ଅଞ୍ଚଳକୁ କର୍ଡନ୍ କରାଯାଇ ଉଦ୍ଧାରକାର୍ଯ୍ୟ ଜାରି ରହିଛି । ଘଟଣାସ୍ଥଳକୁ ଡାକ୍ତର, ଆମ୍ବୁଲାନ୍ସ ଏବଂ ଦମକଳ ବାହିନୀ ପଠାଯାଇଥିବା ବେଳେ ଏମାନେ ସମସ୍ତେ ଉଦ୍ଧାରକାର୍ଯ୍ୟରେ ନିୟୋଜିତ ଅଛନ୍ତି ।

ଲୁଧିଆନାର ସବ୍ ଡିଭିଜିନାଲ ମାଜିଷ୍ଟ୍ରେଟ୍ ସ୍ୱାତୀ ତିୱାନା ଗଣମାଧ୍ୟକୁ କହିଛନ୍ତି, ଏହା ସମ୍ପୂର୍ଣ୍ଣ ଏକ ଗ୍ୟାସ୍ ଲିକ୍ ଘଟଣା । ଜାତୀୟ ବିପର୍ଯ୍ୟୟ ପ୍ରଶମନ ବଳ ଏବେ ଘଟଣାସ୍ଥଳରେ ପହଞ୍ଚି ଅନ୍ୟାନ୍ୟ ଲୋକମାନଙ୍କୁ ଉଦ୍ଧାର କରିବା ସହ ସେମାନଙ୍କୁ ଅନ୍ୟଯାଗାକୁ ସ୍ଥାନାନ୍ତର କରାଯାଉଛି । ଏହି ଘଟଣାରେ ୯ଜଣଙ୍କର ମୃତ୍ୟୁ ହୋଇସାରିଥିବା ବେଳେ ୧୧ଜଣ ଗୁରୁତର ଅସୁସ୍ଥ ହୋଇପଡ଼ିଛନ୍ତି । ଏହା କି ପ୍ରକାରର ଗ୍ୟାସ୍ ଓ ତାହା କେଉଁଠୁ ଲିକ୍ ହୋଇଛି ସେ ସମ୍ପର୍କରେ ଏଯାବତ୍ କିଛିବି ସ୍ପଷ୍ଟ ହୋଇପାରିନି । ଏନଡିଆରଏଫ୍ ଟିମ୍ ଘଟଣାର ତଦନ୍ତ କରିବ ବୋଲି କହିଛନ୍ତି ବରିଷ୍ଠ ସରକାରୀ ଅଧିକାରୀ । ଯଥାସମ୍ଭବ ସାହାଯ୍ୟ ଯୋଗାଇ ଦିଆଯାଉଛି ଏବଂ ଘଟଣା ସଙ୍କ୍ରାନ୍ତରେ ସବିଶେଷ ବିବରଣୀ ଅବିଳମ୍ବେ ପ୍ରଦାନ କରାଯିବ ବୋଲି କହିଛନ୍ତି ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ୍ ।