ଆଦର୍ଶ ବିବାହ: ଅନାଥ ଝିଅକୁ ଜୀବନସାଥୀ କଲେ ପ୍ରମୋଦ

କୁହାଯାଏ ବିବାହ ଭଗବାନଙ୍କ ନିର୍ଦ୍ଦେଶରେ ହିଁ ହୋଇଥାଏ । ସାତଜନ୍ମ ପାଇଁ ଅଗ୍ନିକୁ ସାକ୍ଷୀରଖି ବିବାହ ବନ୍ଧନରେ ଆବଦ୍ଧ ହୋଇଥାଆନ୍ତି ସ୍ୱାମୀ-ସ୍ତ୍ରୀ । ଏହି ସମୟରେ ନବବିବାହିତାର ଆଖିରେ ଥାଏ ଆଖିଏ ସ୍ୱପ୍ନ । ଏହି ସ୍ୱପ୍ନମୁଠାକୁ ତୋଳିଧରି ଓ ଅନେକ ଆଶା ନେଇ ସେ ଶାଶୁଘରେ ପାଦ ଥାପେ । ବାପଘରକୁ ଭୁଲି ଶାଶୁ ଶ୍ୱଶୁରଙ୍କୁ ନିଜର ମା’ ବାପା ବୋଲି ଭାବେ । ହେଲେ ବେଳେ ବେଳେ ଆମେ ନିଆରା ଢଙ୍ଗରେ ବିବାହ ଦେଖିଥାଉ । ଏଭଳି ଏକ ଭିନ୍ନଧରଣର ବିବାହ ସମ୍ବଲପୁର ସହରର ଧନକଉଡ଼ାସ୍ଥିତ ଶିଶୁଯତ୍ନ କେନ୍ଦ୍ରରେ ହୋଇଛି । ହାତରେ ମେହେନ୍ଦି, ଆଖିରେ ଆଖିଏ ସ୍ୱପ୍ନ ନେଇ ଶିଶୁଯତ୍‌ନ କେନ୍ଦ୍ରରୁ ଶାଶୁଘରକୁ ଯାଇଛନ୍ତି ପୂଜା । ଧନକଉଡା ଅନାଥ ଆଶ୍ରମରେ ରହୁଥିବା ପୂଜା ପିଲାଟିବେଳୁ ଆଶ୍ରମରେ ରହି ଛୋଟରୁ ବଡ ହୋଇଛନ୍ତି । ପରେ ସେ ବିବାହଯୋଗ୍ୟ ହେବା ପରେ ହଠାତ୍ ତାଙ୍କ ପାଖକୁ ବରଗଡ ବରପାଲିସ୍ଥିତ ପଣ୍ଡା ପରିବାରରୁ ଆସିଥିଲା ବିବାହ ପ୍ରସ୍ତାବ ।

ପରେ ଆଶ୍ରମତ୍ତକର୍ତ୍ତୃପକ୍ଷ ଜିଲ୍ଲାପ୍ରଶାସନକୁ ଅବଗତ କରାଇବା ସହ ପୂଜାଙ୍କ ବିବାହ ସମ୍ପର୍ଣ୍ଣ କରିଛନ୍ତି । ଧନକଉଡା ଆଶ୍ରମରେ ସଜାହୋଇଥିଲା ସ୍ୱତନ୍ତ୍ର ବିବାହ ମଣ୍ଡପ ଓ ପହଞ୍ଚିଥିଲେ ବରଯାତ୍ରୀ । ବାଣା ବାଜାରେ ଫାଟି ପଡୁଥିଲା ସମଗ୍ର ପରିବେଶ । ବରପକ୍ଷଙ୍କୁ ସ୍ୱାଗତ କରିଥିଲେ ଜିଲ୍ଲା ପ୍ରଶାସନର ବହୁ ଉଚ୍ଚପଦସ୍ଥ ଅଧିକାରୀ । ସମ୍ପୂର୍ଣ୍ଣ ହିନ୍ଦୁ ରୀତିନୀତିରେ ସମ୍ପର୍ଣ୍ଣ ହୋଇଛି ବିବାହ । ପୂଜାକୁ ନିଜର ଜୀବନସାଥୀ ଭାବେ ବାଛିଛନ୍ତି ପ୍ରମୋଦ । ଏଭଳି ଏକ ଅନାଥ ଝିଅକୁ ବିବାହ କରି ତା’କୁ ନିଜର ଜୀବନସଙ୍ଗୀନୀ ବନାଇଛନ୍ତି ପ୍ରମୋଦ । ଜିଲ୍ଲାପ୍ରଶାସନ ଓ ଆଶ୍ରମ କର୍ତ୍ତୃପକ୍ଷ ଉଭୟ ବରକନ୍ୟାଙ୍କୁ ଆଶୀର୍ବାଦ ପ୍ରଦାନ କରିବା ସହ ସମଗ୍ର ଅଞ୍ଚଳରେ ପ୍ରମୋଦଙ୍କ ଏଭଳି କାର୍ଯ୍ୟକୁ ପ୍ରଶଂସା କରାଯାଉଛି ।