ମୁଖ୍ୟମନ୍ତ୍ରୀ ଯୋଗି ଆଦିତ୍ୟନାଥଙ୍କୁ ହତ୍ୟା ଧମକ

ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ହତ୍ୟା ଧମକ । ଜରୁରୀକାଳୀନ ସେବା ପାଇଁ ଜାରି ହୋଇଥିବା ନମ୍ବରକୁ ଆସିଲା ଧମକ ପୂର୍ଣ୍ଣ ମେସେଜ । ମେସେଜରେ ଲେଖା ହୋଇଛି ଖୁବଶୀଘ୍ର ଯୋଗୀ ଆଦିତ୍ୟନାଥଙ୍କୁ ହତ୍ୟା କରିବି । ଏନେଇ ଥାନାରେ ଅଭିଯୋଗ ପରେ ଅଜଣା ବ୍ୟକ୍ତିଙ୍କ ବିରୋଧରେ ମାମଲା ରୁଜୁ କରିଛି ୟୁପି ପୋଲିସ ।
ସରକାରଙ୍କ ଦ୍ବାରା ଜାରି ହୋଇଥିବା ଏମର୍ଜେନ୍ସି ନମ୍ବର 112କୁ ଆସିଥିଲା ଏପରି ଧମକପୂର୍ଣ୍ଣ ମେସେଜ ।

ଏହି ଧମକ ପୂର୍ଣ୍ଣ ମେସେଜ ପାଇବା ପରେ 112ର ଅପରେସନ କମାଣ୍ଡର ସୁଶାନ୍ତ ଗଲ୍ଫ ସିଟି ପୋଲିସ ଷ୍ଟେସନରେ ଏକ ମାମଲା ଦାଖଲ କରିଥିଲେ । ଆଇପିସି ଧାରା 506, 507 ଏବଂ ଆଇଟି ଆକ୍ଟ 66 ଅନୁଯାୟୀ ଅଜଣା ଅଭିଯୁକ୍ତ ବିରୋଧରେ ଏକ ମାମଲା ରୁଜୁ ହୋଇଛି

ସୂଚନା ଅନୁସାରେ ଗତ 23 ତାରିଖରେ ପ୍ରଧାନମନ୍ତ୍ରୀଙ୍କୁ ମଧ୍ୟ ହତ୍ୟା ଧମକ ଆସିଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେରଳ ଗସ୍ତ ସମୟରେ ଆତ୍ମଘାତି ବିସ୍ଫୋରଣ ହେବା ନେଇ କେରଳର ବିଜେପି କାର୍ଯ୍ୟାଳୟରୁ ଏକ ଚିଠି ମିଳିଥିଲା । ଏହାପରେ ପୋଲିସ ଓ ଗୁଇନ୍ଦା ବିଭାଗ ତଦନ୍ତ ଆରମ୍ଭ କରିଥିଲା । ଘଟଣାର ଗୋଟିଏ ଦିନ ପରେ ହତ୍ୟା ଧମକ ଦେଇଥିବା ଅଭିଯୁକ୍ତକୁ ଗିରଫ କରାଯାଇଥିବା କେରଳ ପୋଲିସ ସ୍ପଷ୍ଟ କରିଥିଲା ।