ମୁସଲିମ୍ କୋଟାକୁ ନେଇ ମୁହାଁମୁହିଁ

ତେଲେଙ୍ଗାନାରେ ମୁସଲିମ୍ କୋଟାକୁ ନେଇ ବଡ଼ ବୟାନ ଦେଇଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହା । ଯଦି ତେଲେଙ୍ଗାନାରେ ବିଜେପି ସରକାର ଗଠନ କରେ ତେବେ ଶେଷ ହେବ ମୁସଲିମ୍ କୋଟା । ରବିବାର ହାଇଦ୍ରାବାଦ ନିକଟ ଚେଭଲାଠାରେ ଆୟୋଜିତ ବିଜୟ ସଙ୍କଳ୍ପ ସଭାରେ ଶାହା ଦେଇଥିବା ଏହି ମନ୍ତବ୍ୟକୁ ନେଇ ସୃଷ୍ଟି ହୋଇଛି ରାଜନୈତୀକ ଝଡ । ମୁହାଁମୁହିଁ ହୋଇଛନ୍ତି ଏଆଇଏମଆଇଏମ୍ ମୁଖ୍ୟ ଆସାଦୁଦ୍ଦିନ୍ ଓୱେସି ଓ ଗୃହମନ୍ତ୍ରୀ ଅମିତ୍ ଶାହା । ଅମିତ୍ ଶାହାଙ୍କ ଏଭଳି ଟିପ୍ପଣୀକୁ ନେଇ ପାଲଟା ଆକ୍ରମଣ କରିଛନ୍ତି ଓୱେସିି । ତେଲେଙ୍ଗାନାର ମୁସଲମାନ ସମ୍ପ୍ରଦାୟ ସମ୍ପ୍ରଦାୟ ସମ୍ପର୍କରେ ବିଜେପି ଦେଇଥିବା ଏଭଳି ଟିପ୍ପଣୀ ଅଭଦ୍ରଜନକ । ମୁସଲମାନଙ୍କ ବିରୋଧରେ କେବଳ ଅଭଦ୍ର ଭାଷା ପ୍ରୟୋଗ କରିବା ଛଡ଼ା ବିଜେପି ପାଖରେ ଆଉ କୌଣସି ମୁଦ୍ଦା ନାହିଁ ।

ଭାରତୀୟ ଜନତା ପାର୍ଟି ତେଲେଙ୍ଗାନାରେ କେବଳ ଫେକ୍ ଏନକାଉଣ୍ଟର, ସର୍ଜ୍ଜିକାଲ ଷ୍ଟ୍ରାଇକ, କର୍ଫ୍ୟୁ, ଅପରାଧୀଙ୍କୁ ଜେଲରୁ ମୁକ୍ତି ଓ ବୁଲଡୋଜର ବ୍ୟତୀତ ଆଉ କିଛି ବି ଦେଇପାରିବନି । ତେଲେଙ୍ଗାନାକୁ ନେଇ ବିଜେପିର ଏଭଳି ଆଭିମୁଖ୍ୟ କାହିଁକି ବୋଲି ଟ୍ୱିଟ୍ କରି ପ୍ରଶ୍ନ କରିଛନ୍ତି ଏଆଇଏମଆଇଏମ ମୁଖ୍ୟ ଆସାଦୁଦ୍ଦିନ୍ ଓୱେସି । ଏହାସହ ଓୱେସିି କହିଛନ୍ତି, ଯଦି ଗୃହମନ୍ତ୍ରୀ ଏସସି, ଏସଟି ଓ ଅନ୍ୟାନ୍ୟ ସମ୍ପ୍ରଦାୟଙ୍କ ବିରୋଧରେ କୌଣସି ମନ୍ତବ୍ୟ ଦିଅନ୍ତି ତେବେ ଏହା ତାଙ୍କ ପାଇଁ ଅସହ୍ୟନିୟ ହେବ । ଯଦି ଗୃହମନ୍ତ୍ରୀ ସତରେ ଏଭଳି କୋଟା ବ୍ୟବସ୍ଥା ଶେଷ କରିବାକୁ ଚାହୁଁଛନ୍ତି ତେବେ ମୋଟ୍ ୫୦ପ୍ରତିଶତ ସଂରକ୍ଷଣ ବିଲକୁ ହଟାନ୍ତୁ । ଏଥିପାଇଁ ଗୃହମନ୍ତ୍ରୀ ସାମ୍ବିଧାନିକ ସଂଶୋଧନ ଆଣନ୍ତୁ ବୋଲି କହିଛନ୍ତି ଓୱେସି । ତେଲେଙ୍ଗାନା ସରକାର ରାଜ୍ୟର ସାଧାରଣ ଲୋକଙ୍କ ପାଇଁ କାମ କରିବା ଆବଶ୍ୟକ । ଏଠାରେ କେବଳ ଆସାଦୁଦ୍ଦିନ୍ ଓୱେସିଙ୍କ ଇସାରା ଓ ଏଜେଣ୍ଡାରେ କେସିଆର ସରକାର ଚଲାଇଛନ୍ତି ବୋଲି ଅଭିଯୋଗ କରିଛନ୍ତି ଅମିତ ଶାହା ।