ବ୍ଲୁ ଟିକ ହରାଇଲେ ନବୀନ ଓ ଯୋଗୀ

ହଠାତ୍ ବିଳମ୍ବିତ ରାତିରେ ଟ୍ୱିଟରରୁ ହଟିଯାଇଛି ବ୍ଲୁ ଟିକ୍ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସମେତ ବହୁ ବଲିଉଡ୍ ଷ୍ଟାର ହରାଇଛନ୍ତି ସେମାନଙ୍କ ବ୍ଲୁ ଟିକ୍ । ଏହାସହିତ ଓଡ଼ିଶାର ଶାସକଦଳର ଅନେକ ବଡବଡିଆ ନେତା ବି ହରାଇଛନ୍ତି ବ୍ଲୁ ଟିକ୍ । ଏପରି କି ବଲିଉଡ଼ର ଅନେକ ନାମୀଦାମୀ ଓ ଜଣାଶୁଣା ଅଭିନେତାଙ୍କର ବି ବ୍ଲୁ ଟିକ୍ ହଟିଯାଇଛି । ବଲିଉଡର ସେହେନସା ଅମିତାଭ୍ ବଚ୍ଚନ୍‌, କିଙ୍ଗ୍ ଖାନ୍ ଶାହାରୁଖ ଓ ଭାଇଜାନ୍ ସଲମାନ ପ୍ରମୁଖଙ୍କ ଆକାଉଣ୍ଟରୁ ବ୍ଲୁ ଟିକ୍ ହଟିଯାଇଛି । ସେହିପରି କ୍ରିକେଟ ଦୁନିଆର ଜଣାଶୁଣା ଲିଜେଣ୍ଡ୍ ବିରାଟ କୋହଲିଙ୍କର ବି ବ୍ଲୁ ଟିକ୍ ହଟାଇଛି ଟ୍ୱିଟର । ଟ୍ୱିଟର ତା’ର ସମସ୍ତ ଆକାଉଣ୍ଟରୁ ଲିଗାସି ଭେରିଫାଏଡ୍ ବ୍ଲୁ ଟିକ୍ ହଟାଇ ଦେଇଛି । ବର୍ତ୍ତମାନଠାରୁ କେବଳ ପେଡ୍ ଟ୍ୱିଟର ବ୍ଲୁ ଭେରିଫିକେସନ୍ ସେବାରେ ସବସ୍କ୍ରାଇବ୍ ହୋଇଥିବା ଆକାଉଣ୍ଟରେ ରହିବ ବ୍ଲୁ ଟିକ୍ । କମ୍ପାନୀ ପକ୍ଷରୁ ପ୍ରଥମେ ଏପ୍ରିଲ ୧ରେ ଲିଗାସି ବ୍ଲୁ ଟିକକୁ ହଟାଇବା ପାଇଁ ଯୋଜନା କରିଥିଲା ।

କିନ୍ତୁ ଏହି ପରିବର୍ତ୍ତନ ବଛା ବଛା ଆକାଉଣ୍ଟ୍ ରେ ଲାଗୁ ହୋଇଥିଲା । ସୂଚନା ମୁତାବକ ଜାକ୍ ଡୋର୍ସି ହେଉଛନ୍ତି ଟ୍ୱିଟରର ପ୍ରଥମ ମାଲିକ । ଯିଏ କି ଟ୍ୱିଟରକୁ ପ୍ରତିଷ୍ଠା କରିଥିଲେ । ସେତେବେଳେ ଟ୍ୱିଟର ସେହିମାନଙ୍କୁ ବ୍ଲୁ ଟିକ୍ ବ୍ୟାଚ୍ ପ୍ରଦାନ କରୁଥିଲା, ଯେଉଁମାନେ ଲୋକପ୍ରିୟ, ଜଣାଶୁଣା ବ୍ୟକ୍ତି ଏବଂ ଅଧିକ ଫଲୋୟର୍ସ ରଖୁଥିବେ । ପରେ ବିଶ୍ୱର ପ୍ରମୁଖ ଧନୀ ଏଲନ୍ ମସ୍କ୍ ଏହାକୁ ଅଧିଗ୍ରହଣ କରିବା ପରେ ଲଗାତାର ଏଥିରେ ପରିବର୍ତ୍ତନ କରିଚାଲିଛନ୍ତି । ଏଲନ୍ ବ୍ଲୁ ବ୍ୟାଚକୁ କମର୍ସିଆଲ ବା ପେଡ୍ ଭର୍ସନ୍ କରିଦେଇଛନ୍ତି । ଅର୍ଥାତ୍ ଯେ କେହି ଏହି ବ୍ଲୁ ଟିକ୍ ନିଜ ଆକାଉଣ୍ଟ୍‌ରେ ଲଗାଇପାରିବେ । ହେଲେ ଏଥିପାଇଁ ମାସକୁ ଏକ୍ସଟ୍ରା ଚାର୍ଜ ଦେବାକୁ ପଡ଼ିବ । ସୂଚନା ମୁତାବକ ଏବେ ଟ୍ୱିଟର ୩ ପ୍ରକାର ବ୍ୟାଚ୍ ପ୍ରଦାନ କରୁଛି । ଗୋଟିଏ ଗ୍ରେ ଦ୍ୱିତୀୟଟି ଅରେଞ୍ଜ୍ ଓ ତୃତୀୟଟି ବ୍ଲୁ ବ୍ୟାଚ୍ ।