କେନ୍ଦ୍ରମନ୍ତ୍ରୀ ଅନୁରାଗ ଠାକୁରଙ୍କୁ ସୁପ୍ରିମକୋର୍ଟଙ୍କ ନୋଟିସ୍

ବିବାଦୀୟ ବୟାନ ଦେଇ ଫସିଲେ କେନ୍ଦ୍ରମନ୍ତ୍ରୀ ଅନୁରାଗ ଠାକୁର । ଏହି ବୟାନ ପାଇଁ ସୁପ୍ରିମକୋର୍ଟ ଦୁଇ ବିଜେପି ନେତାଙ୍କୁ ନୋଟିସ୍ ପଠାଇଛନ୍ତି । ସୂଚନା ମୁତାବକ ବିଜେପି ନେତା ତଥା କେନ୍ଦ୍ରମନ୍ତ୍ରୀ ଅନୁରାଗ ଠାକୁର ଓ ବିଜେପି ସାଂସଦ ପରଭେଶ ଶର୍ମା ଦେଇଥିବା ‘ଗୋଲି ମାରୋ ନାରା’ ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଏଭଳି ବିବାଦୀୟ ବୟାନ ପାଇଁ ଦୁଇ ବିଜେପି ନେତାଙ୍କ ନାଁରେ ଏଫଆଇ ରୁଜୁ କରିବାକୁ ହୋଇଥିବା ଆବେଦନକୁ ଗୁରୁତ୍ୱର ସହ ନେଇଛନ୍ତି ସୁପ୍ରିମକୋର୍ଟ । ଏହାସହ ଏହି ପ୍ରସଙ୍ଗ ଉପରେ ଜବାବ ରଖିବାକୁ ଦିଲ୍ଲୀ ସରକାର ଓ ଦିଲ୍ଲୀ ପୋଲିସ କମିଶନରଙ୍କୁ ସର୍ବୋଚ୍ଚ ଅଦାଲତ ନୋଟିସ ଜାରି କରିଛନ୍ତି ।

ବରିଷ୍ଠ ଆଇନଜୀବୀ ବ୍ରିନ୍ଦା କର୍ତ୍ତାଙ୍କ ଆବେଦନର ଶୁଣାଣି କରି ଏହି ନିଷ୍ପତି ଦେଇଛନ୍ତି କୋର୍ଟ । ‘ଦେଶ କେ ଗଦ୍ଦାରୋଁ କୋ ଗୋଲି ମାରୋ ନାର’ା ଅତ୍ୟନ୍ତ ଚିନ୍ତାଜନକ । ଗଦ୍ଦାରର ଅର୍ଥ ଦେଶଦ୍ରୋହୀ । ଏଠାରେ ‘ଗୋଲି ମାରୋ’ ଶବ୍ଦ ନିଶ୍ଚିତ ଭାବେ କୌଣସି ମେଡିସିନ୍ ପ୍ରେସକ୍ରିସପ୍ସନ ବଟିକା ସମ୍ପର୍କରେ ନୁହେଁ । ଏହାପରେ କୋର୍ଟ ନୋଟିସ ଜାରି କରି ପକ୍ଷ ରଖିବାକୁ କହିଛନ୍ତି । ଗତ ୨୦୨୨ ଜୁନରେ ଦିଲ୍ଲୀ ହାଇକୋର୍ଟ ହାଇକୋର୍ଟ ବ୍ରିନ୍ଦା ଓ କେ.ଏମ. ତିୱାରୀଙ୍କ ଆବେଦନ ଖାରଜ କରିଥିଲେ । ଉଭୟ ଟ୍ରାଏଲ କୋର୍ଟଙ୍କ ରାୟକୁ ହାଇକୋର୍ଟରେ ଚ୍ୟାଲେଞ୍ଜ୍ କରିଥିଲେ । ଦୁଇ ବିଜେପି ନେତାଙ୍କ ବିରୋଧରେ ଏଫଆଇଆର ରୁଜୁ ପାଇଁ ହୋଇଥିବା ଆବେଦନ ଟ୍ରାଏଲ କୋର୍ଟ ପ୍ରଥମେ ଖାରଜ ହୋଇଯାଇଥିଲା । ଆବେଦନକାରୀ ଉଭୟ ଟ୍ରାଏଲ କୋର୍ଟ ଓ ହାଇକୋର୍ଟରେ ନିରାଶ ହେବାରୁ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଏବେ ସର୍ବୋଚ୍ଚ ନ୍ୟାୟାଳୟ ଏହି ଆବେଦନର ଶୁଣାଣି କରି ଉଭୟ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ଓ ସାଂସଦ ପରଭେଶ ଶର୍ମାଙ୍କୁ ନୋଟିସ୍ ଜାରି କରିଛନ୍ତି । ରିପୋର୍ଟ ମୁତାବକ ନାଗରିକତ୍ୱ ସଂଶୋଧନ ଆଇନ୍ ବା ସିଏଏକୁ ନେଇ ଦିଲ୍ଲୀରେ ବିକ୍ଷୋଭ ହେଉଥିବା ବେଳେ ୨୦୨୦ ବିଧାନସଭା ନିର୍ବାଚନ ପାଇଁ ମଧ୍ୟ ପ୍ରଚାର କରାଯାଉଥିଲା । ଏହି ସମୟରେ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ଓ ଏମପି ପରଭେଶ ଶର୍ମା ଏହି ବିବାଦୀୟ ବୟାନ ଦେଇଥିଲେ ।