ୟୁପିରେ ପୁଣି ଗୁଳି: ବିଚ୍ ରାସ୍ତାରେ ଛାତ୍ରୀଙ୍କୁ ହତ୍ୟା

ଉତ୍ତରପ୍ରଦେଶରେ ପୁଣି ଚାଲିଛି ଗୁଳି । ସ୍ପଷ୍ଟ ଦିବାଲୋକରେ ୨ଜଣ ବନ୍ଧୁକଧାରୀ ଯୁବକ ଗୁଳି କରି ଜଣେ କଲେଜ ଛାତ୍ରୀଙ୍କୁ ହତ୍ୟା କରିଛନ୍ତି । ଛାତ୍ରୀ ଜଣଙ୍କ ପରୀକ୍ଷା ଦେଇ ଘରକୁ ଫେରିବା ବାଟରେ ଏଭଳି ଅଭାବନୀୟ ଘଟଣା ଘଟିଛି । ୟୁପିର ଜଲାଉନ୍ ଜିଲ୍ଲାରେ ଆଜି ଏଭଳି ଘଟଣା ରାଜ୍ୟର ଆଇନଶୃଙ୍ଖଳା ପରିସ୍ଥତିର ଅସଲ ଚେହେରା ପଦାରେ ପକାଇଛି । ଗୁଳି କରିବା ପରେ ୨ଜଣ ଯୁବକ ଘଟଣାସ୍ଥଳରେ ସେମାନଙ୍କ ବନ୍ଧୁକ ଛାଡ଼ି ଫେରାର ହୋଇଯାଇଥିଲେ । ସ୍ଥାନୀୟ ପୋଲିସ ଷ୍ଟେସନଠାରୁ ମାତ୍ର ୨ଶହ ମିଟର ଦୂରରେ ଏହି ଘଟଣା ଘଟିବା ସମସ୍ତଙ୍କୁ ଆଶ୍ଚର୍ଯ୍ୟରେ ପକାଇଛି । ଗୁଳିମାଡ଼ରେ ପ୍ରାଣ ହରାଇଥିବା ଛାତ୍ରୀ ଜଣଙ୍କ ହେଲେ ୨୧ବର୍ଷିୟା ରୋଷନୀ ଅହରିୱାରା ।

ସେ ଯୁକ୍ତ ୩ର ଛାତ୍ରୀ । ଆଜି ସେ ଆଇତରେ ଥିବା ରାମ ଲକ୍ଷ୍ମଣ ପଟେଲ ମହାବିଦ୍ୟାୟରେ ପରୀକ୍ଷା ଦେଇ ଘରକୁ ଫେରୁଥିଲେ । ସମୟ ପ୍ରାୟ ଦିନ ୧୧ଟାରେ ସେ ଫେରିବା ରାସ୍ତାରେ ୨ଯୁବକ ପଲସର ଗାଡି ଧରି ତାଙ୍କ ପାଖରେ ପହଞ୍ଚିଥିଲେ । ଉଭୟଙ୍କ ହାତରେ ଗୋଟିଏ ଦେଶୀ ବନ୍ଧୁକ ରହିଥିଲା । ଗାଡିଟି ରୋଶନୀଙ୍କ ପାଖରେ ପହଞ୍ଚିବା କ୍ଷଣି ୨ଜଣ ଯୁବକଙ୍କ ମଧ୍ୟରୁ ଜଣେ ଦେଶୀ ବନ୍ଧୁକରୁ ଗୁଳିମାଡ଼ କରିଥିଲେ । ଗୁଳିଟି ରୋଶନୀଙ୍କ ମୁଣ୍ଡରେ ବାଜିଥିବା ବେଳେ ସେ ଘଟଣାସ୍ଥଳରେ ପ୍ରାଣ ହରାଇଛନ୍ତି । ବିଚ୍ ରାସ୍ତାରେ ଏଭଳି ଘଟଣା ଘଟିଥିବା ବେଳେ ସ୍ଥାନୀୟଲୋକେ ଗୁଳିମାଡ଼ କରିଥିବା ୨ଜଣ ଯୁବକଙ୍କୁ ଧରିବାକୁ ଚେଷ୍ଟା କରିଥିଲେ ବି ସେମାନେ ତୁରନ୍ତ ଚମ୍ପଟ୍ ମାରିଥିଲେ । ରୋଶନୀ କଲେଜ ୟୁନିଫର୍ମ ପିନ୍ଧିଥିବା ବେଳେ ବନ୍ଧୁକଟି ତାଙ୍କ ପାଖରେ ପଡିଥିବା ଦେଖିବାକୁ ମିଳିଛି ।