ପୁଅର ଆଇପିଏଲ ଡେବ୍ୟୁ ପରେ ଭାବୁକ ହେଲେ ସଚିନ

ଗତକାଲି ଆଇପିଏଲର ୨୨ ତମ ମ୍ୟାଚ ମୁମ୍ବାଇ ଓ କୋଲକାତା ମଧ୍ୟରେ ଅନୁଷ୍ଠିତ ହୋଇଥିଲା । ଏହି ମ୍ୟାଚରେ ଡେବ୍ୟୁ କରିଛନ୍ତି କ୍ରିକେଟ ଗଡ ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ । ଅର୍ଜୁନଙ୍କ ଡେବ୍ୟୁ ପରେ ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଛି । କିନ୍ତୁ ପୁଅ କ୍ରିକେଟ ଜଗତରେ ଡେବ୍ୟୁ କରିବା ପରେ ବେଶ ଭାବୁକ ହୋଇଛନ୍ତି ଭାରତୀୟ ପୂର୍ବତନ କ୍ରିକେଟର ସଚିନ ତେନ୍ଦୁଲକର ।

ସୂଚନାନୁସାରେ ଗତକାଲି ମ୍ୟାଚରେ ମୁମ୍ବାଇ ପକ୍ଷରୁ ପ୍ରଥମ ଥର ପାଇଁ ପଡିଆକୁ ଓହ୍ଲାଇଥିଲେ ଅର୍ଜୁନ ତେନ୍ଦୁଲକର । ମ୍ୟାଚ ଆରମ୍ଭରୁ ହିଁ ତାଙ୍କୁ ଦଳର ବୋଲିଂ କମାଣ ସମ୍ଭାଳିବାର ଦାୟିତ୍ୱ ଦିଆଯାଇଥିଲା । ଅର୍ଜୁନ ପୁରା ମ୍ୟାଚରେ ୨ଟି ଓଭର ବୋଲିଂ କରିଥିବା ବେଳେ ମାତ୍ର ୧୭ ରନ୍ ଦେଇଥିଲେ । କିନ୍ତୁ ଗୋଟିଏ ବି ୱିକେଟ ହାସଲ କରିପାରି ନଥିଲେ । ମ୍ୟାଚ ସରିବା ପରେ କ୍ରିକେଟର ସଚିନ ତେନ୍ଦୁଲକର ସୋସିଆଲ ମିଡିଆରେ ଅର୍କୁନଙ୍କ ପାଇଁ ପୋଷ୍ଟ କରିଥିଲେ । ଏଥିରେ ସଚିନ ଲେଖିଛନ୍ତି ଅର୍ଜୁନ ଆଜି କ୍ରିକେଟର ଭାବରେ ନିଜ ଯାତ୍ରାରେ ଆଉ ପାଦେ ଆଗକୁ ବଢିଛି । ସେ ଆହୁରି ମଧ୍ୟ ଲେଖିଛନ୍ତି ମୁଁ ଜାଣିଛି ତୁମେ ଖେଳ ପ୍ରତି ଥିବା ତୁମ ସମ୍ମାନକୁ ଆଗକୁ ମଧ୍ୟ ଜାରି ରଖିବ । ଏହା କହିବା ସହ ସଚିନ୍ ଅର୍ଜୁନଙ୍କୁ ଶୁଭେଚ୍ଛା ମଧ୍ୟ ଜଣାଇଛନ୍ତି । ବର୍ତ୍ତମାନ ସଚିନ୍‌ଙ୍କ ଏହି ପୋଷ୍ଟ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି ।

ସୂଚନାଯୋଗ୍ୟ ଗତକାଲି ମୁମ୍ବାଇ ଟସ୍ ଜିତି ପ୍ରଥମେ କୋଲକତାଙ୍କୁ ବ୍ୟାଟିଂ ପାଇଁ ଆମତ୍ରଣ କରିଥିଲା । କୋଲକତା ପ୍ରଥମେ ବ୍ୟାଟିଂ କରି ୧୮୫ ରନ୍‌ର ଲକ୍ଷ୍ୟ ଦେଇଥିଲା । କିନ୍ତୁ ମୁମ୍ବାଇ ୧୭.୪ ଓଭରରେ ମୁମ୍ବାଇ ୧୮୬ ରନ୍ କରି ବିଜୟ ହାସଲ କରିନେଲା ।