ସୀମା ବିବାଦ: ଭଦ୍ରକରେ ୧୪୪ ଜାରି

ଦୁଇ ଗାଁ ମଧ୍ୟରେ ସୀମା ବିବାଦ । ଏହାକୁ କେନ୍ଦ୍ର କରି ଭଦ୍ରକରେ ୪୮ଘଣ୍ଟିଆ ୧୪୪ ଧାରା ଜାରି କରିଛି ଭଦ୍ରକ ଜିଲ୍ଲା ପ୍ରଶାସନ । ଭଦ୍ରକ ଜିଲ୍ଲା ବଅନ୍ତ ନଳକ ଆପଣ୍ଡା ଛକରୁ ୨ଶହ ମିଟର ପର୍ଯ୍ୟନ୍ତ ୧୪୪ଧାରା ଜାରି କରାଯାଇଛି । ଭଦ୍ରକ ଓ କେନ୍ଦୁଝର ଜିଲ୍ଲାର ସୀମା ବିବାଦ ପାଇଁ ଓରାଳି ଛକରେ ବ୍ୟାପକ ଭଙ୍ଗାରୁଜା ଓ ପୋଡାଜଳା ପରେ ପ୍ରଶାସନିକ ପଦକ୍ଷେପ ନିଆଯାଇଛି ।

ଆସନ୍ତା ୧୮ତାରିଖ ଦିନ ୧୧ଟା ଯାଏଁ ବଳବତ୍ତର ରହିଛି ୧୪୪ଧାରା । ସୀମା ବିବାଦ ପ୍ରସଙ୍ଗରେ ଉଭୟ ଜିଲ୍ଲାର ପ୍ରଶାସନିକ ଅଧିକାରୀ ଉପସ୍ଥିତ ରହି କ୍ଷତ୍ରିୟ ତଦନ୍ତ ପରେ ନିଷ୍ପତ୍ତି ନିଆଯିବ ବୋଲି ଜଣାପଡ଼ିଛି । ବହୁବର୍ଷ ପୂର୍ବରୁ ଏହି ଛକଟି ଓରାଳି ଛକ ନାଁରେ ନାମିତ ହୋଇଥିଲା । ହେଲେ ଆପଣ୍ଡା ଗାଁର ଲୋକମାନେ ଏହାକୁ ଆପଣ୍ଡା ଛକ ଭାବେ ନାମକରଣ କରିବାକୁ ଦୀର୍ଘଦିନ ହେବ ଦାବି କରିଆସୁଥିଲେ । ଯାହାକୁ ନେଇ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା । ଆପଣ୍ଡା ଛକ ଲେଖା ଥିବା ସୂଚନା ଫଳକ ଲଗାଯାଉଥିବା ବେଳେ ଏହାକୁ ବିରୋଧ କରିଥିଲେ ଓରାଳି ଗାଁଲୋକେ । ଉଭୟଙ୍କ ମଧ୍ୟରେ ସଂଘର୍ଷ ଘଟି ପରସ୍ପର ଉପରକୁ ଟେକାପଥର ମାଡ ଆରମ୍ଭ କରିଦେଇଥିଲେ । ପରେ ବଅନ୍ତ ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତି ଉପରେ ନଜର ରଖିଛି ।