ୟୁପିରେ ହାଇଆଲର୍ଟ: ୧୪୪ଧାରା ଜାରି, ଇଣ୍ଟରନେଟ୍ ବନ୍ଦ୍‌

ଉତ୍ତରପ୍ରଦେଶରେ ରାସ୍ତା ଜନଶୂନ୍ୟ । ସବୁଠି ଖେଳିଯାଇଛି ଚାଞ୍ଚଲ୍ୟ । ଏବେ ରାଜ୍ୟର ମାଫିଆ ଓ କୁଖ୍ୟାତ ଅପରାଧୀଙ୍କ ମନରେ ଭୟ ଓ ଆଶଙ୍କା । କାରଣ ଗତକାଲି ବିଳମ୍ବିତ ରାତିରେ ପୋଲିସ ଓ ମିଡିଆ ଉପସ୍ଥିତିରେ ଦୁର୍ଦ୍ଦାନ୍ତ ଗ୍ୟାଙ୍ଗଷ୍ଟର ଅତିକ୍ ଅହମ୍ମଦ ଓ ଭାଇ ଅସରଫକୁ ଗୁଳିକରି ହତ୍ୟା କରାଯାଇଛି । ସାମ୍ବାଦିକ ବେଶରେ ଆସି ଦୁଇଭାଇଙ୍କୁ ହତ୍ୟା କରିଛନ୍ତି ୨ଅଜଣା ଦୁର୍ବୁତ୍ତ । ଖାସ୍ ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ୟୁପିରେ ଜାରି ହୋଇଛି ହାଇଆଲର୍ଟ । ସମଗ୍ର ୟୁପିରେ ୧୪୪ ଧାରା ଲାଗୁ ହୋଇଥିବା ବେଳେ ପ୍ରୟାଗରାଜରେ ଇଣ୍ଟରନେଟ୍ ସେବାକୁ ବନ୍ଦ କରିଦେଇଛନ୍ତି ୟୁପି ସରକାର । ସୂଚନା ମୁତାବକ ଗତକାଲି ରାତି ସାଢେ ୧୦ଟା ବେଳେ ପ୍ରୟାଗରାଜ ମେଡିକାଲକୁ ସ୍ୱାସ୍ଥ୍ୟ ପରୀକ୍ଷା ପାଇଁ ନିଆଯାଉଥିବା ବେଳେ ଦୁଇ ଭାଇ ଅତିକ୍ ଅହମ୍ମଦ ଓ ଅସରଫ୍ ଅହମ୍ମଦକୁ ଗୁଳିକରି ହତ୍ୟା କରିଥିଲେ ୩ ସୁଟର । ହତ୍ୟାକାଣ୍ଡର ମାତ୍ର ଘଣ୍ଟାଏ ଭିତରେ ଦୁଇଅଭିଯୁକ୍ତଙ୍କୁ ଗିରଫ କରିବାରେ ସମର୍ଥ ହୋଇଛି ପୋଲିସ । ଉଭୟଙ୍କୁ ପଚରାଉଚରା ବେଳେ ସେମାନେ କେବଳ ଏହି ଦୁଇ ଗ୍ୟାଙ୍ଗଷ୍ଟରଙ୍କୁ ହତ୍ୟା କରିବାକୁ ଆସିଥିବା କଥା ପୋଲିସ ଆଗରେ ସ୍ୱୀକାର କରିଛନ୍ତି । ଗୁଳିକାଣ୍ଡରେ ଅତିକ୍ ବ୍ରଦର୍ସଙ୍କ ମୃତ୍ୟୁ ହୋଇଥିବା ବେଳେ ଜଣେ ସାମ୍ବାଦିକ ଓ ଜଣେ କନଷ୍ଟେବଳ ଆହତ ହୋଇଛନ୍ତି । ପ୍ରତ୍ୟକ୍ଷଦର୍ଶୀଙ୍କ କହିବା ମୁତାବକ ୨ରୁ ୩ଜଣ ଲୋକ ଅତିକ୍ ଓ ଅସରଫ୍ ଉପରକୁ ଗୁଳିମାଡ଼ କରିଥିଲେ ।

ସେହିପରି ଅନ୍ୟ କେତେଜଣଙ୍କ କହିବା ମୁତାବକ ୩ଜଣ ନୁହେଁ ବରଂ ୨ଜଣ ସାମ୍ବାଦିକ ବେଶରେ ଆସି ଉଭୟଙ୍କୁ ଗୁଳିମାଡ଼ କରିଛନ୍ତି । ଉଭୟ ଅଭିଯୁକ୍ତ ଅତିଫ୍ ଓ ଅସରଫକୁ ହତ୍ୟା କରିବା ପରେ ପୋଲିସ ନିକଟରେ ସରେଣ୍ଡର କରିଥିଲେ, ହେଲେ କାହାରି ପରିଚୟ ଜଣାପଡ଼ିନି । ଉମେଶ ପାଲ ହତ୍ୟା ମାମଲାରେ ଅତିକ୍ ଏବଂ ଅସରଫ୍ ପୋଲିସ ହେଫାଜତରେ ଥିଲେ । ଏହି ହତ୍ୟାକାଣ୍ଡ ପରେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ତୁରନ୍ତ କାର୍ଯ୍ୟରେ ଖିଲାପ ପାଇଁ ୧୬ଜଣ ପୋଲିସଙ୍କୁ ସସପେଣ୍ଡ କରିଥିଲେ । ପରେ ହତ୍ୟାକାଣ୍ଡର ଉଚ୍ଚସ୍ତରୀୟ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ । ଏପରି କି ୩ଜଣିଆ ବିଚାର ବିଭାଗୀୟ କମିଶନ ମଧ୍ୟ ଗଠନ କରାଯାଇଛି । ସୁରକ୍ଷା ଦୃଷ୍ଟିରୁ ଉତ୍ତର ପ୍ରଦେଶରେ ୧୪୪ ଧାରା ଲାଗୁ କରାଯାଇଛି । ଉତ୍ତେଜନାକୁ ଦୃଷ୍ଟିରେ ରଖି ପ୍ରୟାଗରାଜରେ ଇଣ୍ଟରନେଟ୍ ସେବା ବନ୍ଦ କରାଯାଇଛି । ସେହିପରି ୟୁପିର ସମସ୍ତ ପୋଲିସ କର୍ମଚାରୀଙ୍କ ଛୁଟି ମଧ୍ୟ ବାତିଲ୍ କରାଯାଇଛି । ପୋଲିସ ଉପସ୍ଥିତିରେ ଏହି ହତ୍ୟାକାଣ୍ଡ ପୋଲିସର ଚରମ ଅବହେଳାକୁ ସ୍ପଷ୍ଟ କରିଛି । ଗତ ୧୩ତାରିଖରେ ଅତିକର ପୁଅକୁ ୟୁପି ଏସଟିଏଫ୍ ଏନକାଉଣ୍ଟର କରିଥିଲା । ଅପରପକ୍ଷରେ ଅତିକ୍‌ର ସ୍ତ୍ରୀ ଏବେ ମଧ୍ୟ ଫେରାର ରହିଛି । ଗତ ୪୦ବର୍ଷ ହେବ ଅପରାଧ ଦୁନିଆରେ ନିଜର ଆଧିପତ୍ୟ ବିସ୍ତାର କରିଆସୁଥିବା ବେଳେ ସାଧାରଣ ଜନତା ଓ ବଡ ଶୀଳ୍ପପତିଙ୍କ ମନରେ ସୃଷ୍ଟି କରିଥିଲା ଭୟ ଓ ଆତଙ୍କ । ହେଲେ ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ପୋଲିସ ହେପାଜତରେ ଥାଇ ବି କିଭଳି ଅତିକକୁ ହତ୍ୟା କରାଗଲା ତା’କୁ ନେଇ ପୋଲିସ ପ୍ରଶାସନ ଉପରେ ସନ୍ଦେହ ସୃଷ୍ଟି କରିଛି । ସେପଟେ କେନ୍ଦ୍ର ଗୃହବିଭାଗ ପକ୍ଷରୁ ମାମଲାର ତଦନ୍ତ ପାଇଁ ରାଜ୍ୟ ସରକାରଙ୍କୁ ନୋଟିସ୍ ଜାରି କରାଯାଇଛି ।