ଫାସ୍‌ଟ୍ୟାଗ୍ ପାଇଁ ଟୋଲ ଆଦାୟ ୫୮ ପ୍ରତିଶତ ବୃଦ୍ଧି

ଜାତୀୟ ରାଜପଥରେ ଟୋଲ ଆଦାୟ ପାଇଁ କରାଯାଇଛି ଫାସ୍‌ଟ୍ୟାଗ୍ ବ୍ୟବସ୍ଥା । ଏହି ବ୍ୟବସ୍ଥା କାର୍ଯ୍ୟକାରୀ ହେବା ପରଠାରୁ ବୃଦ୍ଧି ପାଇବାରେ ଲାଗିଛି ସରକାରଙ୍କ ରାଜସ୍ୱ । କେବଳ ଯେ ରାଜସ୍ୱ ବଢୁଛି ତାହା ନୁହେଁ, ଫାସ୍‌ଟ୍ୟାଗ୍ ପାଇଁ ମିଳୁଛି ଅନେକ ସୁବିଧା । ଗାଡିଚାଳକମାନେ ବି ଏହାଦ୍ୱାରା ବେଶ୍ ଉପକୃତ ହେଉଛନ୍ତି । ଫାସ୍‌ଟ୍ୟାଗ୍ ବ୍ୟବସ୍ଥା ଲାଗୁ ନହେବା ପୂର୍ବରୁ ଗୋଟିଏ ଗାଡି ପାର୍ ହେବା ପାଇଁ ଲାଗୁଥିଲା ୮ମିନିଟ୍‌, ଯାହା ଏବେ ମାତ୍ର ୪୭ସେକେଣ୍ଡକୁ ହ୍ରାସ ପାଇଛି । ଏକ ରିପୋର୍ଟ ମୁତାବକ ଗତ ୨୦୧୭-୧୮ରେ ମୋଟ ଟୋଲ ଆଦାୟ ରାଶି ୨୧ହଜାର ୯୪୮କୋଟି ଟଙ୍କା ରହିଥିଲା । ସେହି ସମୟରେ କେବଳ ୧୬ ପ୍ରତିଶତ ଗାଡିରେ ରହିଥିଲା ଫାସଟ୍ୟାଗ୍ ସୁବିଧା ।

ସେହିପରି ୨୦୨୧-୨୨ ଆର୍ôଥକବର୍ଷ ବେଳକୁ ୯୬ପ୍ରତିଶତ ଗାଡିରେ ରହିଥିଲା ଫାସଟ୍ୟାଗ୍ ବ୍ୟବସ୍ଥା । ଖାସ୍ ଏଥିପାଇଁ ଟୋଲ ଆଦାୟ ରାଶି ୩୪ହଜାର ୪୭୮କୋଟିରେ ପହଞ୍ଚିଥିଲା । ଯେଉଁଥିପାଇଁ ୨୦୨୨-୨୩ରେ ଉକ୍ତ ରାଶି ବୃଦ୍ଧି ପାଇ ୫୦ହଜାର ୮୫୫କୋଟିରେ ପହଁଚିଛି । ସୂଚନା ମୁତାବକ ଦେଶରେ ମୋଟ୍ ୧୧୮୧ଟି ଟୋଲ୍ ବୁଥ୍ ଥିବା ବେଳେ ଏଥିରୁ ଏନଏଚଆଇ ଅଧୀନରେ ୮୬୫ଟି ଟୋଲ୍ ବୁଥ୍ ରହିଛି ।

ଦେଶର ସବୁଠୁ ଅଧିକ ୧୦୪ଟି ଟୋଲ୍ ରହିଛି କେବଳ ରାଜସ୍ଥାନରେ । ହେଲେ ମଧ୍ୟ ରାଜସ୍ୱ ଆଦାୟ କ୍ଷେତ୍ରରେ ଉତ୍ତର ପ୍ରଦେଶ ସବୁଠୁ ଆଗରେ ରହିଛି । ଉତ୍ତରପ୍ରଦେଶର ୯୦ଟି ବୁଥରୁ ୩ହଜାର ୯୪୯କୋଟି ଟଙ୍କା ଆଦାୟ ହୋଇଥିବା ଜଣାପଡ଼ିଛି । ହେଲେ ରାଜସ୍ଥାନରେ ଉକ୍ତ ରାଶି ମାତ୍ର ୩ହଜାର ୪୯୧କୋଟି ଟଙ୍କା ଆଦାୟ କରାଯାଇଛି । ସରକାର ଆଗାମୀ ଦିନରେ ଅଟୋମେଟିକ୍ ନମ୍ବର ପ୍ଲେଟ୍ ରିକଗନିସନ୍ ସିଷ୍ଟମ୍ କାର୍ଯ୍ୟକାରୀ କରିବାକୁ ଯାଉଛନ୍ତି । ଯାହାଫଳରେ ଟୋଲ ବୁଥରେ ଆଉ ଗାଡିକୁ ଅଟକିବାର ଆବଶ୍ୟକତା ହିଁ ପଡିବନି ।