EMI ଡେରି ହେଲେ ଲାଗିବନି ଜରିମାନା

ଋଣଧାରୀଙ୍କ ପାଇଁ ଖୁସି ଖବର । ଆରବିଆଇ ଜାରି କରିଛି ନୂଆ ନିୟମ । ଏଣିକି ଇଏମଆଇ ଦେବାକୁ ଡେରି ହେଲେ ଦେବାକୁ ପଡିବନି ଜରିମାନା । ବିଭିନ୍ନ କାରଣରୁ ଋଣ ପରିଶୋଧ କରିବାରେ ଅକ୍ଷମ ହେଉଥିବା ଲୋକଙ୍କୁ ଆଉ ପୂର୍ବଭଳି ଭାରି ଜରିମାନା ଦେବାକୁ ପଡ଼ିବନି । ଏନେଇ ଭାରତୀୟ ରିଜର୍ଭ ବ୍ୟାଙ୍କ ପକ୍ଷରୁ ଜାରି ହୋଇଛି ଚିଠା ନିୟମ । ଋଣଧାରୀଙ୍କ ଉପରେ ଲାଗୁ ହୋଇଥିବା ଜରିମାନା ଉପରେ ବ୍ୟାଙ୍କ କିମ୍ବା ଆର୍ôଥକ ସଂସ୍ଥା ସୁଧ ଅସୁଲ କରିବା ବେଆଇନ ବୋଲି କହିଛି ଆରବିଆଇ । ଜରିମାନା ଆଦାୟ ବ୍ୟାଙ୍କ ପାଇଁ ଆୟର ମୂଳଉତ୍ସ ନୁହେଁ ବୋଲି ଆରବିଆଇ ଚିଠାରେ କୁହାଯାଇଛି । ଜରିମାନାକୁ ସୁଧ ନୁହେଁ ବରଂ ଏକ ଫି’ ଭାବେ ଆଦାୟ କରାଯାଉ । ଏହାସହ ଆରବିଆଇ କହିଛି, ଏହା ବ୍ୟାଙ୍କଗୁଡିକ ଋଣଧାରୀଙ୍କ ଉପରେ ଦଣ୍ଡବିଧାନ କରିବାର ଅଧିକାର ଦେଇଛି, କିନ୍ତୁ ଏହାର ଅପବ୍ୟବହାର କରାଯାଉଛି ।

ବ୍ୟାଙ୍କଗୁଡିକ ଇଏମଆଇ ଫାଇନକୁ ଏକ ରାଜସ୍ୱ ଅଭିବୃଦ୍ଧିର ଉପକରଣ ଭାବେ ବ୍ୟବହାର କରୁଛନ୍ତି । ଆରବିଆଇର ଚିଠା ନିୟମ ଅନୁଯାୟୀ ଅନେକ ନିୟନ୍ତ୍ରିତ ସଂସ୍ଥା ଜରିମାନା ସୁଧହାର ଆଦାୟ କରିଥାଆନ୍ତି । ଚିଠା ନିୟମରେ କୁହାଯାଇଛି, ମୂଳ ସୁଧହାର ବ୍ୟତୀତ ଜରିମାନା ସୁଧହାରକୁ ବ୍ୟାଙ୍କ କିମ୍ବା ଆର୍ôଥକ ସଂସ୍ଥାଗୁଡିକ ରାଜସ୍ୱ ଅଭିବୃଦ୍ଧି ଉପକରଣ ଭାବେ ବ୍ୟବହାର କରାଯିବା ଅନୁଚିତ୍ । ସମୀକ୍ଷାରୁ ଜଣାପଡ଼ିଛି ଯେ, ଦଣ୍ଡିତ ସୁଧ ଆଦାୟକୁ ନେଇ ନିୟନ୍ତ୍ରିତ ସଂସ୍ଥାଗୁଡ଼ିକ ମଧ୍ୟରେ ବିଭିନ୍ନ ନିୟମ ରହିଛି । ଏହାକୁ ନେଇ ଗ୍ରାହକଙ୍କ ଆଡୁ ବହୁ ଅଭିଯୋଗ ଆସୁଛି ଯାହା ବିବାଦ ସୃଷ୍ଟି କରୁଛି । ଚିଠା ନିୟମରେ ଆରବିଆଇ ପ୍ରସ୍ତାବ ଦେଇଛି ଯେ, ଏଣିକି ବିଳମ୍ବିତ ଇଏମଆଇ ପୈଠ ପାଇଁ ବ୍ୟାଙ୍କ ଜରିମାନା ସୁଧହାର ଆକାରରେ ଆଦାୟ କରାଯାଇପାରିବନି । ଆରବିଆଇର ଏହି ନିର୍ଦ୍ଦେଶନାମାକୁ କଡ଼ାକଡ଼ି ଭାବେ ପାଳନ କରାଯିବା ଉଚିତ୍ ବୋଲି ସର୍କୁଲାରରେ କୁହାଯାଇଛି ।