ପୁଅର ଶେଷକୃତ୍ୟରେ ସାମିଲ ହୋଇପାରିବନି ଗ୍ୟାଙ୍ଗଷ୍ଟର ଅତୀକ

ଜଣେ ପ୍ରଖ୍ୟାତ ଗ୍ୟାଙ୍ଗଷ୍ଟରରୁ ରାଜନେତା ବନିଥିବା ପୂର୍ବତନ ସାଂସଦ ଅତିକ୍ ଅହମ୍ମଦର ପୁଅ ଅସଦ୍ ଅହମ୍ମଦକୁ ଏନକାଉଣ୍ଟର କରିଛି ୟୁପି ଏସଟିଏଫ୍ । ଅସଦ ଅହମ୍ମଦର ସହଯୋଗୀ ମହମ୍ମଦ ଗୁଲାମ ମଧ୍ୟ ଏହି ଏନକାଉଣ୍ଟରରେ ନିହତ ହୋଇଛି । ଉଭୟଙ୍କର ଗତକାଲି ବିଳମ୍ବିତ ରାତିରେ ଝାନସୀର ମହାରାଣୀ ଲକ୍ଷ୍ମୀବାଇ ହସ୍ପିଟାଲରେ ଶବ ବ୍ୟବଚ୍ଛେଦ ହୋଇଥିବା ବେଳେ ଆଜି ଉଭୟଙ୍କୁ ସମାଧି ଦିଆଯିବ । ତେବେ ପୁଅର ଶେଷ ଶୋଭାଯାତ୍ରାରେ ସାମିଲ ହେବା ନିମେନ୍ତ ଅତିକ୍ ଅହମ୍ମଦକୁ ଶେଷ ପର୍ଯ୍ୟନ୍ତ ମିଳିଲାନି ଅନୁମତି ।

ସୂଚନା ମୁତାବକ ଗତକାଲି ଅତିକ୍ ଅହମ୍ମଦ ଓ ତା’ର ଭାଇ ଅସରଫକୁ ପ୍ରୟାଗରାଜର ଏକ କୋର୍ଟରେ ହାଜର କରାଯାଇଥିବା ବେଳେ ଏହି ଏନକାଉଣ୍ଟର ହୋଇଥିଲା । କୋର୍ଟରେ ଥିବା ସମୟରେ ହିଁ ଅତିକ୍ ଅହମ୍ମଦ ପୁଅର ଏନକାଉଣ୍ଟର ଖବର ପାଇ ସମ୍ପୂର୍ଣ୍ଣ ଭାଙ୍ଗି ପଡିଛି । ଏପରି କି ପୁଅ ଅସଦର ଶେଷକୃତ୍ୟ ବେଳେ ଉପସ୍ଥିତ ରହିବାକୁ ଅତିକ୍ ଅହମ୍ମଦ ପ୍ରୟାଗରାଜର ଏକ କୋର୍ଟଙ୍କୁ ଅନୁମତି ମାଗିଥିଲେ ବି ତା’କୁ ନିରାଶ ହେବାକୁ ପଡ଼ିଛି । ସୁରକ୍ଷା ଦୃଷ୍ଟିରୁ ଏଥିନିମନ୍ତେ ତା’କୁ ଅନୁମତି ଦେବାକୁ କୋର୍ଟ ସ୍ପଷ୍ଟ ଭାବେ ମନା କରିଦେଇଛନ୍ତି । ଏବେ ପୁଅର ଶେଷ ଦର୍ଶନ କରିପାରିବନି କି ତା’ର ଅନ୍ତ୍ୟେଷ୍ଟିକ୍ରିୟାରେ ବି ଯୋଗଦେଇପାରିବନି ଗ୍ୟାଙ୍ଗଷ୍ଟର ଅତିକ୍ ଅହମ୍ମଦ ।