ସବୁଠୁ ଧନୀ ମୁଖ୍ୟମନ୍ତ୍ରୀ କିଏ?

ପ୍ରକାଶ ପାଇଛି ଏଡିଆର ଧନୀ ମୁଖ୍ୟମନ୍ତ୍ରୀଙ୍କ ତାଲିକା । ଏବେ ସଭିଁଙ୍କ ମନରେ ଗୋଟିଏ ପ୍ରଶ୍ନ । କିଏ ସବୁଠାରୁ ଧନୀ ମୁଖ୍ୟମନ୍ତ୍ରୀ । କାହା ପାଖରେ ଅଛି ସବୁଠାରୁ ଅଧିକ ଟଙ୍କା ଓ ସମ୍ପତି । ପୁଣି କେଉଁ ମୁଖ୍ୟମନ୍ତ୍ରୀ ସବୁଠୁ ଗରିବ । କ’ଣ ତାଙ୍କ ପାଖରେ କିଛି ନାହିଁ । ଏପରିକ୍ଷେତ୍ରରେ ଏଡିଆର ପକ୍ଷରୁ ପ୍ରକାଶ ପାଇଥିବା ତାଲିକାରେ ଦେଶର ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀଙ୍କ ସମ୍ପତି ରିପୋର୍ଟ ଉଲ୍ଲେଖ ରହିଛି । ଦେଶର ୨୮ଟି ରାଜ୍ୟ ଓ ୨ କେନ୍ଦ୍ରଶାସିତ ଅଞ୍ଚଳର ମୁଖ୍ୟମନ୍ତ୍ରୀଙ୍କ ସମ୍ପତି ତାଲିକା ପ୍ରକାଶ କରିଛି ଏଡ଼ିଆର । ଧନୀ ତାଲିକାରେ ତୃତୀୟ ସ୍ଥାନରେ ଅଛନ୍ତି ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେହିପରି ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇ.ଏସ. ଜଗନମୋହନ ରେଡ୍ଡୀ ଏହି ତାଲିକାର ଶୀର୍ଷରେ ଥିବା ବେଳେ ସବୁଠାରୁ ଗରିବ ମୁଖ୍ୟମନ୍ତ୍ରୀ ହେଉଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଏଡ଼ିଆର ରିପୋର୍ଟରୁ ଜଣାପଡ଼ିଛି ଜଗନ ମୋହନ ରେଡ୍ଡୀଙ୍କ ମୋଟ୍ ସମ୍ପତିର ମୂଲ୍ୟ ୫୧୦କୋଟି ଯାହାକି ସବୁ ମୁଖ୍ୟମନ୍ତ୍ରୀଙ୍କଠାରୁ ଅଧିକ । ସେହିପରି ଅରୁଣାଚଳପ୍ରଦେଶ ମୁଖ୍ୟମନ୍ତ୍ରୀ ପେମା ଖାଣ୍ଡୁଙ୍କ ସମ୍ପତିର ମୂଲ୍ୟ ହେଉଛି ୧୬୩ କୋଟି ଟଙ୍କା । ସେ ହେଉଛନ୍ତି ଦେଶର ଦ୍ୱିତୀୟ ଧନୀ ମୁଖ୍ୟମନ୍ତ୍ରୀ । ଏହି ୨ ମୁଖ୍ୟମନ୍ତ୍ରୀଙ୍କୁ ବାଦ୍ ଦେଲେ ଅନ୍ୟକୌଣସି ମୁଖ୍ୟମନ୍ତ୍ରୀଙ୍କ ସମ୍ପତି ୧୦୦କୋଟି ପାର ହୋଇନି ।

ସେହିପରି ତାଲିକାରେ ସବୁଠାରୁ ଗରିବ ମୁଖ୍ୟମନ୍ତ୍ରୀ ହେଉଛନ୍ତି ମମତା ବାନାର୍ଜୀ । ମମତାଙ୍କର ମୋଟି ସମ୍ପତିର ମୂଲ୍ୟ ହେଉଛି ମାତ୍ର ୧୫ଲକ୍ଷ ଟଙ୍କା । ୧କୋଟି ତଳେ ଥିବା ଅନ୍ୟତମ ୨ମୁଖ୍ୟମନ୍ତ୍ରୀ ହେଲେ କେରଳ ମୁଖ୍ୟମନ୍ତ୍ରୀ ପିନାରାଇ ଭିଜୟନ ଓ ହରିୟାନା ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟର । ପିନାରାଇ ଓ ମନୋହରଙ୍କର ସମ୍ପତିର ମୂଲ୍ୟ ୧ କୋଟି ଟଙ୍କା । ଅନ୍ୟପଟେ ଧନୀ ତାଲିକାର ତୃତୀୟ ସ୍ଥାନରେ ରହିଛନ୍ତି ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନବୀନଙ୍କର ମୋଟ୍ ସମ୍ପତି ହେଉଛି ୬୩କୋଟି ଟଙ୍କା । ସେହିପରି ଚତୁର୍ଥସ୍ଥାନରେ ନାଗାଲାଣ୍ଡ ମୁଖ୍ୟମନ୍ତ୍ରୀ ନେଫ୍ୟୁ ରିଓ ଥିବା ବେଳେ ତାଙ୍କର ମୋଟ୍ ସମ୍ପତି ହେଉଛି ୪୬କୋଟିରୁ ଅଧିକ । ତାଲିକାରେ ପଞ୍ଚମ ସ୍ଥାନରେ ଅଛନ୍ତି ପୁଡୁଚେରୀ ମୁଖ୍ୟମନ୍ତ୍ରୀ ଏନ. ରଙ୍ଗାସ୍ୱାମୀ ଓ ତାଙ୍କର ମୋଟ୍ ସମ୍ପତି ୩୮କୋଟିରୁ ଅଧିକ ଥିବା ଜଣାପଡ଼ିଛି ।