ପୁଣିଥରେ ସଲମାନ ଖାନଙ୍କୁ ହତ୍ୟା ଧମକ; ମୁମ୍ବାଇ ପୁଲିସକୁ ଆସିଲା ଫୋନକଲ

ପୁଣି ଥରେ ବଲିଉଡ ଅଭିନେତା ସଲମାନ ଖାନଙ୍କୁ ମିଳିଛି ହତ୍ୟା ଧମକ । ସୋମବାର ସୁପରଷ୍ଟାର ସଲମାନ ଖାନଙ୍କୁ ହତ୍ୟା କରିବା ପାଇଁ ମୁମ୍ବାଇ ପୋଲିସକୁ ଧମକପୂର୍ଣ୍ଣ ଫୋନ କଲ୍ ଆସିଥିଲା । ଏପ୍ରିଲ୍ 30ରେ ଅଭିନେତାଙ୍କୁ ହତ୍ୟା କରିବାକୁ ଧମକ ଦେଇଛି ସମ୍ପୃକ୍ତ ଦୁର୍ବୃତ୍ତ । ଘଟଣା ନେଇ ପୋଲିସ ଅଧିକ ତଦନ୍ତ ଚଳାଇଥିବା ଜଣାପଡିଛି।

ଏପ୍ରିଲ୍ 10ରେ ମୁମ୍ବାଇ ପୋଲିସ୍ କଣ୍ଟ୍ରୋଲ୍ ରୁମକୁ ଏହି ଫୋନ କଲ୍ ଆସିଥିଲା । ସୋମବାର ସଲମାନ ଖାନଙ୍କ ଅଭିନୀତ ଫିଲ୍ମ ‘କିସି କା ଭାଇ କିସି କି ଜାନ’ର ଟ୍ରେଲର ରିଲିଜ ହୋଇଛି । ଟ୍ରେଲର ଲଞ୍ଚ ସମୟରେ ସଲମାନଙ୍କ ସମେତ ପୁରା ଫିଲ୍ମର କାଷ୍ଟ ଇଭେଣ୍ଟରେ ଉପସ୍ଥିତ ରହିଥିଲେ । ଏହାପରେ ବିଳମ୍ବିତ ରାତିରେ ସଲମାନଙ୍କୁ ଜୀବନରୁ ମାରିଦେବାକୁ ଏକ ଧମକପୂର୍ଣ୍ଣ ଫୋନ କଲ୍ ମୁମ୍ବାଇ ପୋଲିସକୁ ଆସିଛି ।

ମୁମ୍ବାଇ ପୋଲିସ ସୂଚନା ଅନୁଯାୟୀ, ରାତି 9ଟାରେ ରାଜସ୍ଥାନର ଯୋଧପୁରରୁ ରକି ଭାଇ ନାମକ ଜଣେ ବ୍ୟକ୍ତିଙ୍କ ନିକଟରୁ ପୋଲିସ କଣ୍ଟ୍ରୋଲ ରୁମକୁ ଫୋନ କଲ୍ ଆସିଥିଲା । ​ଯେଉଁଥିରେ ସେ ଅଭିନେତା ସଲମାନ ଖାନଙ୍କୁ ଏପ୍ରିଲ 30ରେ ହତ୍ୟା କରିବ ବୋଲି ଧମକ ଦେଇଥିଲା । ସଲମାନଙ୍କୁ ପୁଣି ହତ୍ୟା ଧମକ ନେଇ ଚାରିଆଡେ ହଇଚଇ ଖେଳିଯାଇଥିବା ବେଳେ ଘଟଣାକୁ ଗୁରୁତ୍ୱର ସହ ନେଇ ପୋଲିସ ଅଧିକ ତଦନ୍ତ ଚଳାଇଛି । ଅନ୍ୟପକ୍ଷରେ ଫୋନ୍‌ କଲ୍ କରିଥିବା ବ୍ୟକ୍ତିଙ୍କ ଠିକଣା ପୋଲିସ ଜାଣିପାରିଥିବା କୁହାଯାଉଛି ।

ସୂଚନା ଅନୁସାରେ ଗତ ମାର୍ଚ୍ଚ 18 ତାରିଖରେ ସଲମାନଙ୍କ ମ୍ୟାନେଜର ପ୍ରଶାନ୍ତ ଗୁଞ୍ଜଲକରଙ୍କୁ ଏକ ଧମକପୂର୍ଣ୍ଣ ଇ-ମେଲ ଆସିଥିଲା । ଏହାପରେ ମୁମ୍ବାଇ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ରାଜସ୍ଥାନ ପୋଲିସ ସହାୟତାରେ ଅଭିଯୁକ୍ତ ଯୋଧପୁର ଜିଲ୍ଲା ଲୁନି ଗାଁର ଧାକଡ ରାମଙ୍କୁ ଗିରଫ କରିଥିଲା ମୁମ୍ବାଇ ପୋଲିସ । ସେହିପରି ମାଫିଆ ଡନ୍ ଲରେନ୍ସ ବିଷ୍ଣୋଇଙ୍କ ନିକଟରେ ଏକ ସାକ୍ଷାତକାରରେ ସଲମାନ ଖାନଙ୍କୁ ହତ୍ୟା କରିବା ତାଙ୍କ ଜୀବନର ଲକ୍ଷ ବୋଲି କହିଥିଲା । ଏହାରି ମଧ୍ୟରେ ଏବେ ପୁଣି ସଲମାନ ଖାନଙ୍କୁ ହତ୍ୟା ଧମକ ମିଳିବା ନେଇ ପୁଣି ହଇଚଇ ସୃଷ୍ଟି ହୋଇଛି ।