ବେଦାନ୍ତ ଫେକରରେ ଦୁର୍ଘଟଣା: ୨ ଗୁରୁତର

ଭଦ୍ରକ ଜିଲ୍ଲା ରାନ୍ଦିଆସ୍ଥିତ ବେଦାନ୍ତ ଫେକର ସଂସ୍ଥାରେ ୨ ଶ୍ରମିକ ଜଳିଯାଇ ଗୁରୁତର ଆହତ ହୋଇଛନ୍ତି । ଦୁଇ ଶ୍ରମିକଙ୍କୁ ଗୁରୁତର ଅବସ୍ଥାରେ କଟକ ସ୍ଥାନାନ୍ତର କରାଯାଇଛି । ଦୁଇ ଗୁରୁତର ହେଲେ ଭଦ୍ରକ ଜିଲ୍ଲା ବରପଦା ଗାଁର ବିଜୟ ମହାପାତ୍ର ଓ କୋରନ୍ଦ ଗାଁର ପୁନିଆ ସୁତାର ।

ସୂଚନା ମୁତାବକ ଭଦ୍ରକ ରାନ୍ଦିଆସ୍ଥିତ ବେଦାନ୍ତ ଫେକର ସଂସ୍ଥାର ଉପର ମହଲାରେ କାମ କରୁଥିବା ବେଳେ ଫେନର୍ସର ଏକ ନିଆଁହୁଳା ବିସ୍ଫୋରିତ ହୋଇ ୨ଶ୍ରମିକଙ୍କ ଉପରେ ପଡିଥିଲା । ଉଭୟେ ଗୁରୁତର ଆହତ ହୋଇଥିଲେ । ପ୍ରଥମେ ସେମାନଙ୍କୁ ଭଦ୍ରକ ଜିଲ୍ଲା ଚିକିତ୍ସାଳୟରେ ଭର୍ତି କରାଯାଇଥିଲା ।

ପରେ ସେମାନଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ଉଭୟଙ୍କୁ କଟକ ଏସସିବି ମେଡିକାଲକୁ ସ୍ଥାନାନ୍ତର କରାଯାଇଛି । ସୂଚନା ମୁତାବକ ୧୫ଦିନ ପୂର୍ବେ ଠିକ୍ ଏଭଳି ଏକ ଅଘଟଣର ସମ୍ମୁଖୀନ ହୋଇଥିଲେ ଜଣେ ଯୁବ ଶ୍ରମିକ । ସେ ଗୁରୁତର ହେବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଥିଲା, ହେଲେ ସେଠାରେ ଡାକ୍ତର ତାଙ୍କୁ ବଞ୍ଚାଇପାରିନଥିଲେ । ଏବେ ୧୫ଦିନ ପରେ ପୁଣିଥରେ ଏଭଳି ଘଟଣାର ପୁନରାବୃତି ହେବାରୁ ବେଦାନ୍ତ ପରିସରରେ ଉତ୍ତେଜନା ସୃଷ୍ଟି ହୋଇଛି ।