ରାଜଧାନୀରେ ନୂଆ ନିୟମ: ମନଇଚ୍ଛା ଲୁଟିପାରିବେନି ଅଟୋଚାଳକ

ରାଜଧାନୀ ଭୁବନେଶ୍ୱରେ ଲାଗୁହୋଇଛି ନୂଆ ନିୟମ । ଏଣିକି ଗ୍ରାହକଙ୍କଠାରୁ ଆଉ ମନଇଚ୍ଛା ଭଡ଼ା ଆଦାୟ କରିପାରିବେନି ଅଟୋଚାଳକ । ଇଚ୍ଛା ଅନୁସାରେ ମୂଲ୍ୟ ବଢାଇ ଆଦାୟ କରିପାରିବେନି ଭଡ଼ା । ରାଜଧାନୀରେ ଅଟୋଚାଳକଙ୍କ ପାଇଁ ଖୁବଶୀଘ୍ର ନୂଆ ପଲିସି ଆଣୁଛି ବିଏମସି । ସହରରେ ଅଟୋ ଯାତାୟତ ଓ ଚାଳକଙ୍କ ପାଇଁ ଦିଆଯାଇଥିବା ପ୍ରସ୍ତାବରେ ରହିଛି ଅନେକ ନୂଆ ନିୟମ । କୋଲକାତା, ଦିଲ୍ଲୀ ଏବଂ ମୁମ୍ବାଇ ଭଳି ଏକ ନିର୍ଦ୍ଦିଷ୍ଟ ଭଡ଼ା ଲାଗୁହେବ ଅଟୋଚାଳକଙ୍କ ପାଇଁ । ଅଟୋ ଷ୍ଟାଣ୍ଡରେ ଏକ ରେଟ୍ ଚାର୍ଟ ଲାଗିବା ସହ ଅଟୋରେ ମଧ୍ୟ ଏ ସମ୍ପର୍କରେ ଉଲ୍ଲେଖ କରାଯିବ । ସେହିପରି ନିର୍ଦ୍ଦିଷ୍ଟ ରୁଟ୍ ପାଇଁ ଫିକ୍ସ ହେବ ଭଡ଼ା ।

କିଲୋମିଟର ହିସାବରେ ନିର୍ଦ୍ଧାରିତ ରେଟଚାର୍ଟ ଅନୁସାରେ ଗ୍ରାହକ ଭଡ଼ା ଦେବେ । ଫଳରେ ସବୁବର୍ଗର ଲୋକେ ଏହାଦ୍ୱାରା ଉପକୃତ ହୋଇପାରିବେ । ସାଧାରଣତଃ ବାହାରୁ ଆସୁଥିବା ପର୍ଯ୍ୟଟକଙ୍କଠାରୁ କିଛି ଅଟୋଚାଳକ ମନଇଚ୍ଛା ଭଡ଼ା ଆଦାୟ କରୁଥିବା ଘଟଣା ବହୁବାର ସାମ୍ନାକୁ ଆସିଛି । ଫଳରେ ରାଜଧାନୀରେ ଅଟୋଚାଳକଙ୍କୁ ନେଇ ପର୍ଯ୍ୟଟକମାନେ ଅସନ୍ତୋଷ ବ୍ୟକ୍ତ କରିଥାଆନ୍ତି ।

ତେଣୁ ଏ ଦିଗରେ ବିଏମସି ଓ ପୋଲିସ କର୍ମଚାରୀଙ୍କ ମଧ୍ୟରେ ଆଲୋଚନା କରାଯାଇ ନୂଆ ପଲିସି ଅଣାଯିବ ବୋଲି ସୂଚନା ମିଳିଛି । ଏଭଳି ନିଷ୍ପତିକୁ ସ୍ୱାଗତ କରିଛନ୍ତି ବିଭିନ୍ନ ଅଟୋ ଆସୋସିଏସନ କର୍ମକର୍ତ୍ତା । ଏହାଦ୍ୱାରା ସହରରେ ଏକ ଶୃଙ୍ଖଳିତ ଅଟୋ ଯାତାୟତ ସହ ଲୋକେ ମଧ୍ୟ ଭଲ ଅନୁଭୂତି ପାଇବେ ବୋଲି ଆଶା ବ୍ୟକ୍ତି କରିଛନ୍ତି ବିଭିନ୍ନ ଅଟୋଚାଳକ ସଂଘ ।