ନୂଆ ପ୍ରାର୍ଥୀ ନଦେଲେ ‘ନୋଟା’ରେ ଭୋଟ୍‌

ଆସନ୍ତା ୨୦୨୪ ନିର୍ବାଚନରେ ନୂଆ ପ୍ରାର୍ଥୀ ନଦେଲେ ନୋଟାରେ ଭୋଟ୍ ଦେବୁ । ମନ୍ତ୍ରୀ ଅଶ୍ୱିନୀ ପାତ୍ରଙ୍କୁ ଏଭଳି ଖୋଲାଖୋଲି ଚେତାବନୀ ଦେଇଛନ୍ତି ଦଳୀୟକର୍ମୀ । ଲାଗୁଛି ସତେ ଯେମିତି ଜଳେଶ୍ୱରରେ ଦୁଇଭାଗ ହୋଇଯାଇଛି ଶାସକ ବିଜେଡ଼ି । ମନ୍ତ୍ରୀ ଓ କର୍ମୀଙ୍କ ମଧ୍ୟରେ ଯୁକ୍ତିତର୍କ ହେବା ସହ ଅଶ୍ୱିନୀ ପାତ୍ରଙ୍କୁ ଘୋର ବିରୋଧ କରିଛନ୍ତି ଦଳୀୟ ନେତା । ସୂଚନା ମୁତାବକ ସ୍ଥାନୀୟ ବିଧାୟକ ଅଶ୍ୱିନୀ ପାତ୍ରଙ୍କ ଦ୍ୱାରା ଖୁଦିଆ ମାଝୀସାହି ପଞ୍ଚାୟତ ଗାଡିବିଲ ପଡ଼ିଆରେ ଏକ ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା ।

ଅଧିକ ପଢନ୍ତୁ

ଆହୁରି ପଢନ୍ତୁ

ଉକ୍ତ ପର୍ବରେ ପୂର୍ବତନ ବ୍ଲକ୍ ଉପାଧ୍ୟକ୍ଷ ବ୍ରଜମୋହନ ପ୍ରଧାନଙ୍କ ନେତୃତ୍ୱରେ ହଜାର ହଜାର ବିଜେଡ଼ି କର୍ମୀ ଯୋଗଦେଇ ମନ୍ତ୍ରୀଙ୍କ ବିରୋଧରେ ସ୍ୱର ଉତ୍ତୋଳନ କରିଛନ୍ତି । ଫଳରେ ପୁଣିଥରେ ଦଳୀୟ ଫାଟ ସାମ୍ନାକୁ ଆସିଛି । ଏପରିକି ଏହି ଘଟଣାକୁ ନେଇ ଦଳ ମଧ୍ୟରେ କମ୍ପନ ସୃଷ୍ଟି ହୋଇଛି । ଏଠାରେ ଧାମନଗର ଉପନିର୍ବାଚନ ଭଳି ପରିସ୍ଥିତି ସୃଷ୍ଟି ହେବ ବୋଲି ଆଲୋଚନା ଜୋର ଧରିଛି ।

କର୍ମୀ ସଫା ସଫା ଶୁଣାଇଛନ୍ତି ଯଦି ଜଳେଶ୍ୱରରେ ନୂଆ ପ୍ରାର୍ଥୀ ଦିଆନଯାଏ ତେବେ ହାରାହାରି ୩୦ହଜାର ଭୋଟ୍ ନୋଟାରେ ପଡ଼ିବ । ଏଣୁ ଆୟୋଜିତ ସଭାରେ ବିଜେଡି କର୍ମୀମାନେ ଜଳେଶ୍ୱରରେ ନୂଆ ନେତୃତ୍ୱ ପାଇଁ ଦାବି କରିଛନ୍ତି । ଏ ସମ୍ପର୍କରେ ମନ୍ତ୍ରୀ ଅଶ୍ୱିନୀ ପାତ୍ରଙ୍କୁ ପଚାରାଯିବାରୁ ତାଙ୍କୁ ସ୍ଥାନୀୟ ନେତା ଓ କର୍ମୀ ବିରୋଧ କରିଥିବା କଥା ସେ ସ୍ୱିକାର କରିଛନ୍ତି । ହେଲେ ଆସନ୍ତା ୨୦୨୪ ସାଧାରଣ ନିର୍ବାଚନରେ ଏହାର କୌଣସି ପ୍ରଭାବ ପଡବନି ବୋଲି ଦୃଢୋକ୍ତି ପ୍ରକାଶ କରିଛନ୍ତି ମନ୍ତ୍ରୀ ଅଶ୍ୱିନୀ ପାତ୍ର ।