ସୁଖୋଇ-୩୦ରେ ଉଡ଼ିବେ ରାଷ୍ଟ୍ରପତି

ଭାରତର ପ୍ରଖ୍ୟାତ ଲଢୁଆ ବିମାନ ସୁଖୋଇ-୩୦ରେ ଉଡିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଆଜିଠାରୁ ୮ତାରିଖ ପର୍ଯ୍ୟନ୍ତ ରାଷ୍ଟ୍ରପତି ମୁର୍ମୁ ଆସାମ ଗସ୍ତରେ ଯିବେ । ଆସନ୍ତାକାଲି ସେ କାଜିରଙ୍ଗା ଜାତୀୟ ଉଦ୍ୟାନରେ ଗଜ ଉତ୍ସବ-୨୦୨୩ ଉଦଘାଟନ କରିବେ । ପରେ ଶନିବାରଦିନ ସେ ଗୌହାଟିରେ ମାଉଣ୍ଟ୍ କାଞ୍ଚନଜଙ୍ଗା ଏକ୍ସେପେଡିସନ-୨୦୨୩ର ଶୁଭାରମ୍ଭ କରିବେ ।

ଅଧିକ ପଢନ୍ତୁ

ଏହାସହ ଗୌହାଟି ହାଇକୋର୍ଟର ୭୫ବର୍ଷ ପୂର୍ତି ଅବସରରେ ଆୟୋଜିତ ଜନସଭାକୁ ସମ୍ବୋଧିତ କରିବେ ମହାମହିମ । ଏପ୍ରିଲ ୮ତାରିଖରେ ରାଷ୍ଟ୍ରପତି ମୁର୍ମୁ ତେଜପୁର ଏୟାରଫୋର୍ସ ଷ୍ଟେସନରୁ ସ୍ୱଳ୍ପ ସମୟ ପାଇଁ ‘ସୁଖୋଇ-୩୦ ଏମକେଆଇ’ ଲଢୁଆ ବିମାନରେ ବୁଲିବେ ବୋଲି ସୂଚନା ମିଳିଛି । ଭାରତର ପ୍ରଥମ ମହିଳା ରାଷ୍ଟ୍ରପତି ପ୍ରତିଭା ପାଟିଲ ୨୦୦୯ ନଭେମ୍ବର ୨୫ରେ ପୁନେରେ ୩୦ମିନିଟ୍ ଧରି ସୁଖୋଇ-୩୦ ଏମକେଆଇରେ ବୁଲିଥିଲେ । ତାଙ୍କ ପୂର୍ବରୁ ରାଷ୍ଟ୍ରପତି ଏ.ପି.ଜେ. ଅବଦ୍ଦୁଲ କଲାମ ୨୦୦୬ ଜୁନ୍ ୮ତାରିଖରେ ପୁନେ ବାୟୁସେନା ବିମାନ ଘାଟିରୁ ସୁଖୋଇ-୩୦ ଏମକେଆଇ ଲଢୁଆ ବିମାନରେ ଯାତ୍ରା କରିଥିଲେ ।