ବିଜେପି ବିଧାୟକଙ୍କୁ ଫିଙ୍ଗିଦେଲେ ମାର୍ସଲ୍

ବିଧାନସଭା ବାହାରକୁ ବିଧାୟକଙ୍କୁ ଟେକି ଫିଙ୍ଗିଦେଲେ ମାର୍ସଲ । ରାମନବମୀ ପରେ ରାଜ୍ୟର କେତେକ ସ୍ଥାନରେ ଉପୁଜିଥିବା ହିଂସାକାଣ୍ଡ ଉପରେ ବିଧାନସଭାରେ ଆଲୋଚନା ଚାଲିଥିଲା । ହେଲେ ଏହି ସମୟରେ ବିଭ୍ରାଟ କରିବାକୁ ବିହାର ବିଜେପି ବିଧାୟକ ଜୀବେଶ କୁମାରଙ୍କୁ ଉଠାଇ ନେଇ ବିଧାନସଭା ବାହାରେ ଫିଙ୍ଗି ଦିଆଯାଇଥିବା ଜଣାପଡ଼ିଛି । ବିଧାନସଭା ବାହାରେ ଉଠାଯାଇଥିବା ଏହି ଭିଡ଼ିଓଟିରେ ଦେଖାଯାଉଛି ୪ଜଣ ମାର୍ସଲ ବିଜେପି ବିଧାୟକ କୁମାରଙ୍କୁ ଉଠାଇ ନେଉଛନ୍ତି । ସେତେବେଳେ ବିଧାୟକ ଜୀବେଶ କୁମାର କହୁଛନ୍ତି, ବିରୋଧୀ ନେତାମାନଙ୍କ ସହ ସେମାନଙ୍କର ଏମିତି ବ୍ୟବହାର କାହିଁକି ।

ସେପଟେ ଜୀବେଶ କୁମାରଙ୍କ ଉପରେ ଗ୍ରହଣ କରାଯାଇଥିବା କାର୍ଯ୍ୟାନୁଷ୍ଠାନ ବିଷୟରେ ରାଜ୍ୟ ସରକାର କହିଛନ୍ତି ସେ ବାଚସ୍ପତିଙ୍କୁ ଅପମାନିତ କରିଥିଲେ । ବିହାର କୃଷିମନ୍ତ୍ରୀ କୁମାର ସରବଜୀତ୍ ଗଣମାଧ୍ୟମକୁ କହିଛନ୍ତି, ବିରୋଧୀ ଦଳର କେତେକ ନେତା ବାଚସ୍ପତିଙ୍କୁ ଅପମାନିତ କରିଛନ୍ତି । ସେମାନେ ତାଙ୍କୁ ନିର୍ଲଜ ବୋଲି ବି କହିଛନ୍ତି । ଏହା ହେଉଛି ବିଧାନସଭା ପ୍ରତି ବଡ଼ ଅପମାନ । ବିହାରରେ ହିଂସାକାଣ୍ଡ ଘଟିବା ପରେ ଅତିରିକ୍ତ ପାରାମିଲିଟାରିୀ ଫୋର୍ସ ପଠାଇବାକୁ କେନ୍ଦ୍ର ଗୃହମନ୍ତ୍ରଣାଳୟ ସ୍ଥିର କରିଥିଲା । ହେଲେ ସରବଜୀତ ଗୁରୁତ୍ୱାରୋପ କରି କହିଛନ୍ତି, ସମ୍ପ୍ରତି ସମଗ୍ର ରାଜ୍ୟରେ ପରିସ୍ଥିତି ଶାନ୍ତିପୂର୍ଣ୍ଣ ରହିଛି । ବିହାର ମୁଖ୍ୟମନ୍ତ୍ରୀ ନୀତିଶ କୁମାର କହିଛନ୍ତି, କେତେକ ଲୋକଙ୍କ ବିଶୃଙ୍ଖଳିତ ନୀତି ଯୋଗୁଁ ରାଜ୍ୟରେ ସାମ୍ପ୍ରଦାୟିକ ଉତେଜନା ଦେଖାଦେଇଥିଲା । ସେ କହିଛନ୍ତି, ରାମ ନବମୀ ମହୋତ୍ସବ ସମୟରେ ସାସାରାମ ଓ ବିହାର ଶରିଫରେ ସାମ୍ପ୍ରଦାୟିକ ଉତେଜନା ଅତ୍ୟନ୍ତ ଉଦବେଗଜନକ । ଏ ଅଞ୍ଚଳରେ ଏ ପ୍ରକାର ଘଟଣା ପ୍ରଥମ । ଏହା ସ୍ୱାଭାବିକ ନୁହେଁ ବୋଲି କହିଛନ୍ତି ବାଚସ୍ପତି ।