‘ସିବିଆଇ ଦ୍ୱାରା ଦେଶକୁ ଦୁର୍ନୀତିମୁକ୍ତ କରାଯିବ’

ସିବିଆଇ ଦ୍ୱାରା ହିଁ ଦେଶକୁ ଦୁର୍ନୀତିମୁକ୍ତ କରାଯିବ । ଦୁର୍ନୀତି ଯୋଗୁଁ ଲୋକେ ଉପଯୁକ୍ତ ନ୍ୟାୟ ପାଇବାକୁ ବଞ୍ଚିତ ହେଉଛନ୍ତି । ଦୁର୍ନୀତି ଦେଶର ଗଣତନ୍ତ୍ର ପାଇଁ ବଡ଼ ପ୍ରତିବନ୍ଧକ ସାବ୍ୟସ୍ତ ହୋଇଛି । ତେଣୁ ଦେଶକୁ ଦୁର୍ନୀତିମୁକ୍ତ କରିବା ସହ ଲୋକଙ୍କୁ ଉପଯୁକ୍ତ ନ୍ୟାୟ ପ୍ରଦାନ କରିବାର ଦାୟୀତ୍ୱ ସିବିଆଇ ଉପରେ ନ୍ୟସ୍ତ ରହିଛି ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ସିବିଆଇ ପ୍ରତିଷ୍ଠାର ହୀରକ ଜୟନ୍ତୀ ଉତ୍ସବରେ ଯୋଗଦେଇ ମୋଦୀ କହିଛନ୍ତି, ସିବିଆଇ ଏବେ ନ୍ୟାୟ ଓ ସତ୍ୟର ଚିହ୍ନ ପାଲଟିଛି । ଏହା ସାଧାରଣଲୋକଙ୍କୁ ଆଶା ଓ ଶକ୍ତି ଦେଉଛି । ସିବିଆଇ ଭଳି ଦକ୍ଷ ଓ ପ୍ରଭାବଶାଳୀ ତଦନ୍ତକାରୀ ଏଜେନ୍ସି ବିନା ଦେଶ ଆଗକୁ ବଢିପାରିବନି । ବ୍ୟାଙ୍କ ଠକେଇଠାରୁ ଆରମ୍ଭ କରି ବନ୍ୟପ୍ରାଣୀ ସମ୍ପର୍କିତ ଜାଲିଆତି ସବୁ କ୍ଷେତ୍ରରେ ସିବିଆଇ ଦୁର୍ନୀତିର ପରଦା ହଟାଇବାରେ ସଫଳ ହୋଇଆସିଛି । ଦୁର୍ନୀତି ଯୋଗୁଁ ସାଧାରଣ ଗରିବଟିଏ ନିଜର ଅଧିକାର ଓ ସୁବିଧା ସୁଯୋଗରୁ ବଞ୍ଚିତ ହୋଇଥାଏ ।

ଯାହା ପରୋକ୍ଷରେ ଅନେକ ଅପରାଧୀଙ୍କୁ ଜନ୍ମ ଦେଇଥାଏ । ସିବିଆଇର କାର୍ଯ୍ୟକୁ ପ୍ରଶଂସା କରି ମୋଦୀ କହିଛନ୍ତି, କୌଣସି ଦୁର୍ନୀତି ବା ଅପରାଧ ଯେତେବେଳେ ଅସମାହିତ ହୋଇରହେ ସେତେବେଳେ ସିବିଆଇ ତଦନ୍ତ ପାଇଁ ଦାବି କରାଯାଏ । ଏହା ସିବିଆଇର ସଫଳତା ଓ ବିଶ୍ୱସନୀୟତାକୁ ପ୍ରତିପାଦିତ କରିଥାଏ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଅପରପକ୍ଷରେ ରାଜନୀତି ପାଇଁ କେବଳ ସିବିଆଇକୁ ମୁଖ୍ୟଅସ୍ତ୍ର କରୁଛି ଏନଡିଏ ସରକାର ବୋଲି କହିଛନ୍ତି ବିରୋଧୀ ଦଳ ନେତା । ବାଛିବାଛି ବିରୋଧୀ ଦଳର ନେତାଙ୍କ ବିରୋଧରେ କେନ୍ଦ୍ରୀୟ ତଦନ୍ତ କାରୀ ସଂସ୍ଥା ସିବିଆଇ ଓ ଇଡିକୁ ନିୟୋଜିତ କରାଯାଉଛି । ଏହାକୁ ନେଇ ସୁପି୍ରମକୋର୍ଟରେ କଂଗ୍ରେସ ସମେତ ୧୪ଟି ବିରୋଧୀଦଳ ପକ୍ଷରୁ ଏକ ମାମଲା ରୁଜୁ ହୋଇଛି । ଗତ ୨୦୦୪ରୁ ୨୦୧୪ ମଧ୍ୟରେ ସିବିଆଇ ଦ୍ୱାରା ହୋଇଥିବା ମାମଲାରେ ୭୨ଜଣ ରାଜନେତା ଛନ୍ଦି ହୋଇଥିବା ବେଳେ ଏମାନଙ୍କ ମଧ୍ୟରୁ ୬୦ପ୍ରତିଶତ ବିରୋଧୀଦଳରୁ ଥିଲେ । ହେଲେ ବର୍ତମାନ ଏହା ୯୫ପ୍ରତିଶତରେ ପହଞ୍ଚିଛି ବୋଲି କହିଛନ୍ତି ବିରୋଧୀ ।