ବାହାର ରାଜ୍ୟର ଗୁଣ୍ଡା ପଶ୍ଚିମବଙ୍ଗରେ ହିଂସା କରୁଛନ୍ତି: ମମତା ବାନାର୍ଜୀ

ରାମନବମୀ ପରଠାରୁ ପଶ୍ଚିମବଙ୍ଗରେ ହିଂସାକାଣ୍ଡ କମିବାର ନା ଧରୁନାହିଁ । ବର୍ତ୍ତମାନ ଏହି ହିଂସାକାଣ୍ଡକୁ ନେଇ ମମତା ବାନାର୍ଜୀ ମୁହଁ ଖୋଲିଛନ୍ତି । ସେ କହିଛନ୍ତି ପଶ୍ଚିମବଙ୍ଗର ଲୋକ ଶାନ୍ତିପ୍ରିୟ, ସେମାନେ ହିଂସା ଚାହାନ୍ତି ନାହିଁ । କିନ୍ତୁ ବିଜେପି ନେତାମାନେ ବାହାରୁ ଗୁଣ୍ଡା ଆଣି ପଶ୍ଚିମବଙ୍ଗରେ ହିଂସା କରାଉଛନ୍ତି ।

ପଶ୍ଚିମବଙ୍ଗରେ ହିଂସା ପାଇଁ କେବଳ ବିଜେପି ହିଁ ଦାୟୀ । ଏହାଛଡା ମମତା ଆହୁରି ମଧ୍ୟ କହିଛନ୍ତି ଦଙ୍ଗାକାରୀଙ୍କର କୌଣସି ଧର୍ମ ନଥାଏ, ସେମାନେ କେବଳ ରାଜନୈତିକ ଗୁଣ୍ଡା ହୋଇଥାନ୍ତି ।
ସୂଚନାନୁସାରେ ରାମନବମୀ ଦିନଠାରୁ ପଶ୍ଚିମବଙ୍ଗରେ ଦଙ୍ଗା ବଢିଚାଲିଛି । ବିଭିନ୍ନ ସ୍ଥାନରେ ହିନ୍ଦୁ ମୁସଲିମଙ୍କ ମଧ୍ୟରେ ପଥର ମାଡ, ମାଡପିଟ୍ ଇତ୍ୟାଦି ଦେଖିବାକୁ ମିଳୁଛି ।