୫ବର୍ଷରେ ୧୩ହଜାରରୁ ଅଧିକ ଛାତ୍ରଛାତ୍ରୀଙ୍କ ଆତ୍ମହତ୍ୟା

ଏବେ ଭାରତର ସ୍ଥିତି ଅତ୍ୟନ୍ତ ଉଦବେଗଜନକ । ଦେଶରେ ୫ବର୍ଷରେ ଆତ୍ମହତ୍ୟା କଲେଣି ୧୩ହଜାର ୮୯ଜଣ ଛାତ୍ରଛାତ୍ରୀ । ପ୍ରମୁଖ ଶିକ୍ଷାନୁଷ୍ଠାନ ଆଇଆଇଟି, ଏନଆଇଟି, ଆଇଆଇଏମ୍‌, କେନ୍ଦ୍ରୀୟ ବିଶ୍ୱବିଦ୍ୟାଳୟ, ଏମ୍ସ ଏବଂ ଅନ୍ୟାନ୍ୟ ଶିକ୍ଷାନୁଷ୍ଠାନଠାରେ ୨୦୧୭ରୁ ୨୦୨୧ ମଧ୍ୟେ;ର ୭ହଜାର ୩୯୬ଜଣ ଛାତ୍ର ଏବଂ ୫ହଜାର ୬୯୩ଜଣ ଛାତ୍ରୀ ଆତ୍ମହତ୍ୟା କରିଛନ୍ତି । ଲୋକସଭାରେ ଏହି ତଥ୍ୟ ଦେଇଛନ୍ତି ଖୋଦ୍ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଧର୍ମେନ୍ଦ୍ର କହିଛନ୍ତି, ଗତ ୫ବର୍ଷରେ ଓଡ଼ିଶାରେ ଥିବା ଆଇଆଇଟି, ଏନଆଇଟି, ଆଇଆଇଏମ୍ ଏବଂ କେନ୍ଦ୍ରୀୟ ବିଶ୍ୱବିଦ୍ୟାଳୟରେ କୌଣସି ଛାତ୍ରଛାତ୍ରୀ ଆତ୍ମହତ୍ୟା କରିନାହାନ୍ତି ।

କେବଳ ୨୦୨୦ରେ ଭୁବନେଶ୍ୱର ଏମ୍ସରେ ଜଣେ ଆତ୍ମହତ୍ୟା କରିଥିବା ସେ ସୂଚନା ଦେଇନାହାନ୍ତି । ଉଚ୍ଚତର ଶିକ୍ଷା ଅନୁଷ୍ଠାନଗୁଡିକରେ ଆତ୍ମହତ୍ୟା ପ୍ରବଣତା ରୋକିବାକୁ ଆଇଆଇଟି ବମ୍ବେ ପକ୍ଷରୁ ବନ୍ଧୁ ନାମକ ୱେବସାଇଟ୍ ଆରମ୍ଭ କରାଯାଇଥିବା ବେଳେ ସଚେତନତା କାର୍ଯ୍ୟକ୍ରମ ସହ ଛାତ୍ରଛାତ୍ରୀଙ୍କ ଲାଗି ବିଭିନ୍ନ ସେଲ୍ ଓ କମିଟି ଗଠନ କରାଯାଇଛି ।ଚଳିତ ବର୍ଷ ଦେଶରେ ଉଚ୍ଚତର ପ୍ରତିଷ୍ଠାନଗୁଡିକରେ ୧୫ଜଣ ଛାତ୍ରଛାତ୍ରୀ ଆତ୍ମହତ୍ୟା କରିଥିବା ଜଣାପଡ଼ିଛି । ଦେଶରେ ଥିବା ଆଇଆଇଟି, ଏନଆଇଟି, ଆଇଆଇଏମ୍‌, କେନ୍ଦୀୟ ବିଶ୍ୱବିଦ୍ୟାଳୟ ଏବଂ ଏମ୍ସରେ ୨୦୧୮ରେ ୨୦ଜଣ, ୨୦୧୯ରେ ୨୦, ୨୦୨୦ରେ ୧୩, ୨୦୨୧ରେ ୧୦ ଓ ୨୦୨୨ରେ ୨୫ଜଣ ଛାତ୍ରଛାତ୍ରୀ ଆତ୍ମହତ୍ୟା କରିଥିବା ଜଣାପଡ଼ିଛି ।