ରାହୁଲ ଗାନ୍ଧୀଙ୍କୁ ମିଳିଲା ଜାମିନ୍‌

ଅପରାଧିକ ମାନହାନୀ ମାମଲାରେ ରାହୁଲଙ୍କୁ ମିଳିଛି ଆଶ୍ୱସ୍ତି । ଏହାର ପରବର୍ତି ଶୁଣାଣୀ ଆସନ୍ତା ୧୩ତାରିଖରେ ହେବ ବୋଲି କହିଛନ୍ତି କୋର୍ଟ । ଏପ୍ରିଲ ୧୦ତାରିଖ ସୁଦ୍ଧା ରାହୁଲଙ୍କୁ ଲିଖିତ ଜବାବ ଦେବାକୁ ନିର୍ଦ୍ଦେଶ ଦେଇଛନ୍ତି ସୁରତ କୋର୍ଟ । ଏହି ମାମଲାରେ ୨ବର୍ଷ ଜେଲ ଦଣ୍ଡାଦେଶ ହେବାପରେ ଏହାକୁ ଚ୍ୟାଲେଞ୍ଜ୍ କରି ସୁରତ୍ କୋର୍ଟରେ ପହଞ୍ଚିଥିଲେ କଂଗ୍ରେସର ପୂର୍ବତନ ସାଂସଦ ରାହୁଲ ଗାନ୍ଧୀ ।

ଅଧିକ ପଢନ୍ତୁ

ରାହୁଲଙ୍କ ସହ ଭଉଣୀ ପ୍ରିୟଙ୍କା ଗାନ୍ଧୀ ଓ ୩ ରାଜ୍ୟର ମୁଖ୍ୟମନ୍ତ୍ରୀ ବି କୋର୍ଟରେ ହାଜର ହୋଇଥିବା ବେଳେ ତାଙ୍କୁ ଜାମିନ୍ ମିଳିଛି । ମାମଲାର ପୂର୍ବ ଶୁଣାଣୀର ଦୀର୍ଘ ୧୨ଦିନ ପରେ ସୁରତ୍ କୋର୍ଟରେ ଏକ ଯାଚିକା ଦାଏର କରିଥିଲେ ରାହୁଲ । ଆଜି ମାମଲାର ଶୁଣାଣୀ ତାରିଖ ଥିବା ବେଳେ କୋର୍ଟରେ ପହଞ୍ଚିଥିଲେ ରାହୁଲ । ରାହୁଲଙ୍କ ସହ ଭଉଣୀ ପ୍ରିୟଙ୍କା ଗାନ୍ଧୀ ଭଦ୍ରା, ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍‌, ଛତିଶଗଡ଼ ମୁଖ୍ୟମନ୍ତ୍ରୀ ଭୁପେଶ ବାଘେଲ ଓ ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ ପ୍ରମୁଖ କୋର୍ଟରେ ଉପସ୍ଥିତ ଥିଲେ ।

ଆହୁରି ପଢନ୍ତୁ

ସୂଚନା ମୁତାବକ ଗତ ୨୦୧୯ରେ ମୋଦୀ ସରନେମ୍ ବିବୃତି ପାଇଁ ସୁରତ୍ କୋର୍ଟ ରାହୁଲ ଗାନ୍ଧୀଙ୍କୁ ୨ବର୍ଷ ଜେଲ ଦଣ୍ଡରେ ଦଣ୍ଡିତ କରିଛନ୍ତି । ସେହିପରି ଏହି ମାମଲାରେ ରାହୁଲଙ୍କ ସାଂସଦ ପଦ ରଦ୍ଦ ହେବା ସହ ତାଙ୍କ ସରକାରୀ କ୍ୱାର୍ଟର ବି ହାତରୁ ଚାଲିଯାଇଛି । ଅପରପକ୍ଷରେ ରାହୁଲ ଗାନ୍ଧୀଙ୍କୁ ଜାମିନ୍ ପ୍ରଦାନ ବେଳେ କୋର୍ଟ ଏହି ଦଣ୍ଡକୁ ୩୦ଦିନ ଯାଏଁ ସ୍ଥଗିତ ରଖିଥିଲେ ।

କୋର୍ଟଙ୍କ ରାୟ ମୁତାବକ ଯଦି ରାହୁଲ ୩୦ଦିନ ମଧ୍ୟରେ ଅଦାଲତରୁ ରାହତ୍ ନପାଆନ୍ତି ତେବେ ତାଙ୍କୁ ଜେଲ୍ ଯିବାକୁ ପଡ଼ିବ । ଏବେ ଉଭୟ ପରିସ୍ଥିତି ପାଇଁ କଂଗ୍ରେସ ସମ୍ପୂର୍ଣ୍ଣ ପ୍ରସ୍ତୁତି ଚଳାଇଛି । ଆଗାମୀ ଦିନରେ ନିଶ୍ଚିତ କୋର୍ଟରେ ଶୁଣାଣି ସମୟରେ ଟ୍ରାଏଲ କୋର୍ଟରେ ତ୍ରୁଟି ପ୍ରତି ଧ୍ୟାନ ଦିଆଯିବ ଏବଂ ଶୀଘ୍ର ନିଷ୍ପତି ନିଆଯିବ ବୋଲି ଦଳ ପକ୍ଷରୁ କୁହାଯାଇଛି ।